Sunda hi suma hi Levi-nid’a 13
13
Gat ta yam libinid’a
1Ma didina mi de mi Moise azi ki Aron ala: 2Le sana tam mbi mbrudjuk koze d’ud’ub’od’a buzuk atam mboze tam mbi ndal hapa, le ni mbilâ hi libinina ni, agi im mi ma ngat buzuna Aron, d’oze mi sa tu aduk grom suma ngat buzuna. 3Ma ngat buzu máma mi gol mbil ma atam máma. Le tumus sa ata yima mbil mámid’a ti mbut hapa, le yima mbil máma mi djugot zula kä ni, ni libina. Ma ngat buzu máma mi gol yima mbil máma, mba mi de woi kam ala: Sama wana ni sama ndjendjed’a. 4Le babak ka atamba ti ndal hapa ndringîling ba, irat ti djugot nga kä d’uo, le tumus sa ata yi mámid’a ti mbut nga hapa d’uo mi ni, ma ngat buzu máma mi gum klavi gak burâ kid’iziya. 5Kur bur ma kid’iziya máma ma ngat buzu máma mi golomu. Le yam ma mbil máma vunam mi ve nga kä d’uo, mi ring nga woi avok kuo mi ni, mi hulongôm klavi kua burâ kid’iziya.
6Ma ngat buzu máma mba mi golom kua yam á mbàd’a kur bur ma kid’iziya máma. Le yam ma mbil máma mi hapa, mi ring nga woi d’uo ni, ma ngat buzu máma mi de woi kam ala: Sama wana ni sama yed’etna. Tugud’ei ndata ni d’ud’ub’od’a; sa máma mi mbus baru mama woyo, mba mi mbut yed’et mi.
7Wani le d’ud’ub’od’a ti ring ngei atam bugol la mam tak tam mi ma ngat buzu ma mi de woi kam adjeu ala: Sama wana ni sama yed’etna d’a ni, mi tak tam kua mi ma ngat buzu máma. 8Ma ngat buzu máma mi golom kua. Le d’ud’ub’od’a ti ring ngeyo ni, ma ngat buzu máma mi de woi kam ala: Sama wana ni sama ndjendjed’a! Vama atama ni libina.
9Le libina mi nde ata sana ni, agi im mi ma ngat buzuna. 10Ma ngat buzu máma mi golomu. Le tam mba mbrudjuk ndata ti ni hapa, ti mbud’um tumuzum hapa, le tam mba mbrudjuk ndata ti kä hleud’a kikringû ni, 11ni libi ma atam adjeu dedeina. Ma ngat buzu máma mi de woi kam ala: Sama wana ni sama ndjendjed’a. Mi gum klavit ti, kayam mi ni ndjendjed’a.
12Le libina mi buzuk kei atam pet, tinï ad’ud’a kam akulo dei i kä asemu, ata yima lara ge pet ma ma ngat buzu máma 13mba mi goloma, le libina mi dabam tam mbei ped’u ni, ma ngat buzuna mi de woi kam ala: Sama wana ni sama yed’etna, kayam hliwim pet mi mbut hapa. 14Wani bur ma lara ma a mba wum tam ndala ndundub’u’â mi mbut ni ndjendjed’a. 15Ata yima ma ngat buzu máma mi golom tam ndala ndundub’u’â, mi de woi kam ala: Sama wana ni sama ndjendjed’a. Tam mba ndala ndundub’uk ndata ti ni ndjendjed’a, ni libina. 16Le tam mba hleu d’a ndundub’uk ndata, le d’i mbut hapa ni, mi i gen ma ngat buzuna. 17Ma ngat buzu máma mi golomu. Le tam mba hleu ndata ti mbut hapa ni, ma ngat buzu máma mi de woi kam ala: Sama wana ni sama yed’etna! Tugud’ei nga atam mbi.
18Le mbilâ ge sana mi tchil tchil ba, 19bugol mi hulong ngei ba, yam máma mi mbut hapa d’oze mi mbut ndala hleud’a ni, sa máma mi i tak tam mi ma ngat buzuna. 20Ma ngat buzu máma mi golomu. Le ndal la atam ndata irat ti djugot kä, tumuzum ti mbut hapa mi ni, mi de woi kam ala: Sama wana ni sama ndjendjed’a! Ni tugud’ei libina ba, mi hubuk ir mbil máma wana.
21Le ma ngat buzu máma mi golom ba, tumus sa ata yima ndalid’a, ti mbut nga hapa d’uo, iram mbi djugot nga kä d’uo ba, ti mbut hapa patlazu ni, mi gum klavi gak burâ kid’iziya. 22Le tam mba ndal ndata ring ngeyo ni, ma ngat buzu máma mi de woi kam ala: Sama wana ni sama ndjendjed’a! Ni tugud’ei libina. 23Wani le ndal ndata ti i nga avok kuo, ti ring nga woi d’uo mi ni, doli nahura hi mbilîd’a, mi de woi kam ala: Sama wana ni sama yed’etna!
24Le akud’a ngal sana ba, yam máma mi ka hapa d’oze mi mbut hapa hleuhlewe ni, ma ngat buzuna mi golomu. 25Le tumuzum mba ata yima ndal mámid’a mbut hapa ba, ti djugot kä ata babagam ngola ni, ni libina ba, mi hubuk ata yam ma ngal máma. Ma ngat buzu máma mi de woi kam ala: Sama wana ni sama ndjendjed’a! Ni tugud’ei libina.
26Le ma ngat buzu máma mi golom ba, tumus sa ata yima ndalid’a, ti mbut nga hapa d’uo, iram mbi djugot nga kä d’uo ba, ti mbut hapa patlazu ni, mi gum klavi gak burâ kid’iziya. 27Kur bur ma kid’iziya máma mi golomu. Le yam ma ndal máma mi ring ngeyo ni, mi de woi kam ala: Sama wana ni sama ndjendjed’a! Ni tugud’ei libina.
28Wani le yam ma ndal máma mi ba ata yama, mi ring nga woi d’uo, mi mbut hapa patlazu ni, ni hubuka hakud’id’a. Ma ngat buzu máma mi de woi kam ala: Sama wana ni sama yed’etna! Nahura hakud’id’a.
29Le atchad’a d’oze mandjufâ mbilâ mi nde kam mboze dudumamu ni, 30ma ngat buzuna mi gol mbil máma. Le iram mbi djugot kä, tumus sa kuad’a ti mbut grumgrum tafefeta mi ni, ma ngat buzu máma mi de woi kam ala: Sama wana ni sama ndjendjed’a! Mi ni bigriuna. Doli ni libi ma nde yam sanina d’oze mi nde dudumama.
31Le ma ngat buzu máma mi gol bigriu máma, iram djugot nga kä d’uo, tumus sa kuad’a ti mbut nga wurad’a d’uo mi ni, mi ge sama bigriu máma klavi gak burâ kid’iziya. 32Kur bur ma kid’iziya máma mi gol sama bigriu máma. Le bigriuna mi ring nga woi d’uo, le tumus sa kuad’a ti mbut nga grumgrum mbuo, iram mbi djugot nga kä d’uo mi ni, 33a wel sa máma yam mbeyo, wani a wel yima bigriuna kuana woi d’i. Ma ngat buzu máma mi hulongôm klavi yam á mbàd’a gak burâ kid’iziya.
34Kur bur ma kid’iziya máma mi gol bigriu máma. Le mi ring nga woi d’uo, iram le djugot nga kä d’uo mi ni, ma ngat buzu máma mi de woi kam ala: Sama wana ni sama yed’etna! Sa máma mi mbus baru mama woyo; mba mi mbut yed’et mi. 35Le bigriu máma mi ring ngei bugol la mi de woi kam ala mi ni yed’ed’u d’a ni, 36mi golomu. Le bigriu máma mi ring ngeyo ni, ar ma ngat buzu máma mi hal ad’u d’ala tumuzum ni hapa grumgrum zi ge d’a d’uo d’a, mi ni ndjendjed’a. 37Le bigriu máma mi i nga avok kuo, tumus sa wurad’a ti dei kua ni, bigriu máma mi tchilî tchila, sa máma mi ni yed’et. Ma ngat buzu máma mi de woi kam ala: Sama wana ni sama yed’etna!
38Le atchad’a d’oze mandjufâ tam mbi ndal hapa ni, 39ma ngat buzuna mi golomu. Le yima ndal máma mi hapa patlazu ni, tam mbi ndalî hapa hawa; mi ni yed’et.
40Le sana tumus sa kamba tor reyo ni, ni yam mba yod’a; mi ni yed’et. 41Le yam mbi yo navoromu ni, ni yam mba yod’a; mi ni yed’et. 42Wani le d’i yo nad’u azigam mboze avorom ba, yima yo máma mi hapa hleuhlewe ni, ni libina ba, mi buzuk ad’u azigam mboze avorom wana. 43Ma ngat buzuna mi golomu. Le tugud’ei ndata ti huruguk hapa hleuhleu ad’u azigam mboze avorom d’igi libi ma ata sanina na ni, 44mi ni libina, mi ni ndjendjed’a. Ma ngat buzu máma mi de woi kam ala: Sama wana ni sama ndjendjed’a! Tugud’eid’a ni kamu.
45Sama libina nde atama mi tchu’î baru ma haûd’a atamu, mi ar yam mbei hawa. Mi d’ut dudumam mbeyo, mi er ad’um akulo ala: An mbut ndjendjed’a! An mbut ndjendjed’a! 46Kid’a tugud’ei libina nga atam tatâ tua d’a, mba mi ka’î ndjendjed’a, kayam mam mi sama ndjendjed’a. Mba mi ka’î vam tu. Zlub’u mamba a mba vat sä ni woi bugol kangâ.
Guvura hi barunid’a
47Ma didina mi de kua ala: Ata yima baruna mi buzuk guvurina, le ni baru ma tumusa d’oze le ni baru ma luluîna, 48d’oze le ni vayirâ, d’oze le ni baru ma aduburok ma tumusa d’oze ma luluîna, d’oze le ni ata ba’â, d’oze ata vama lara ma a lum ki ba’îna, 49le guvur ndata ti ni avovovovo d’oze hleud’a kikring ata baruna, d’oze ata ba’â, d’oze ata vayirâ, d’oze ata baru ma aduburo’â, d’oze ata vama lara ma a lum ki ba’îna ni, ni guvur ra ndak á tagat mi ma ngat buzunid’a.
50Mi duk vuna yam vama guvur máma gak burâ kid’iziya. 51Kur bur ma kid’iziya máma mi gol guvur ndata. Le nga d’i i avogovok ata baruna, d’oze ata vayirâ, d’oze ata baru ma aduburo’â, d’oze ata ba’â, d’oze ata vama lara ma a lum ki ba’îna ni, ni guvur ra atam dedeid’a; va máma mi ni ndjendjed’a. 52Ar ma ngat buzu máma mi ngal baruna, d’oze vayirâ, d’oze baru ma aduburo’â, d’oze ba’â, d’oze vama lara ma a lum ki ba’â ma guvur ndata nde atama. Kayam guvura natam adjeu dedei, ma ngat buzu máma mi ngalam mbei kakud’a.
53Wani le ma ngat buzu máma mi wala guvur ndata nga d’i i avogovok ata baruna, d’oze ata vayirâ, d’oze ata baru ma aduburo’â, d’oze ata vama lara ma a lum ki ba’îna d’uo ni, 54mi he vuna ala a mbus yima guvura kua máma woyo, mi hulong dugum klavi yam á mbàd’a gak burâ kid’iziya. 55Bugol bur ma kid’iziya ma a mbuzum kuana, mi golom kua. Le guvur ndata ti djok nga zla d’a ding nguo, ti i nga avogovok kuo ni, va máma mi ni ndjendjed’a; ar a ngalam mbei kakud’a, kayam nabom ma ding ma ad’u kä na tu ba, mi b’laga.
56Wani le ma ngat buzu máma mi wala guvur ndata ti mbut hapa patlas bugol mbus sa a mbuzut teid’a ni, ar mi ngat baruna, d’oze ba’â, d’oze vayirâ, d’oze baru ma aduburo’â yam máma woyo. 57Le d’i hulong nde ata baruna, d’oze ata baru ma aduburo’â, d’oze ata vama lara ma a lum ki ba’îna ni, ni guvura ba, ti huruguk kua wana; vama guvur máma a ngalam mbei kakud’a. 58Baruna d’oze vayirâ, d’oze baru ma aduburo’â, d’oze vama lara ma a lum ki ba’â ma a mbuzum mbei ma guvur mamba pat teina, a mbuzum mbei yang á mbàd’a; mba mi mbut yed’et mi.
59Wana ni gat ta yam guvur ra ata baru ma tumusid’a, d’oze ata baru ma luluîna, d’oze ata vayirâ, d’oze ata baru ma aduburo’â, d’oze ata vama lara ma a lum ki ba’îna. Ni ndat ba, mba d’i tak kei ala nahle suma yed’etna d’oze nahle suma ndjendjed’a na.
Currently Selected:
Sunda hi suma hi Levi-nid’a 13: BA
Highlight
Share
Compare
Copy
Want to have your highlights saved across all your devices? Sign up or sign in
Azumeina Bible © Alliance Biblique du Tchad, 1999.
