Josue 4
4
Ahuniyô suma ge humba
1Kid’a suma a djak alum ma Jurdê-na woi peta, Ma didina mi de mi Josue ala: 2Ang yo suma dogo yam mbà aduk suma, agi hlagi sana ad’u andjafâ gagang, 3agi hazi vuna ala: Agi igi kä kur alum ma Jurdê-na ata yima suma ngat buzuna a tchola kuana. Agi yogi ahuniyôna dogo yam mbà, agi i tchugugizi ata yima agi i vagi ini kangâ kua á burîna.
4Josue mi yi suma dogo yam mbà suma mam manazi aduk Israel-lîna, sana ad’u andjafâ gagang, 5mi dazi ala: Agi kalagi avok zandu’â hi Ma didina Alo maginina kä kur alum ma Jurdê-na; nge nge pî mi hlahinad’a kelemu, ngad’a yam andjafâ hi Israel ma dogo yam mbàna, 6kayambala ahuniyô ndazina a ka’î vama simata adigagi ata yima grogina a mba djobogi ndjivin ala: Ahuniyô ndazina ad’uzi nana ge na. 7Ata yi máma agi hulong dazi ala: Nahuniyô suma ami yozi kur bur ma alum ma Jurdê-na mi wal lei aduk mbà ata yima zandu’â hi Ma didina nga mi djagam mbeina. Ahuniyô ndazina a arî vama ge humba mi Israel-lâ gak didin.
8Israel-lâ a le vama Josue mi hazi vuna kama. A yo ahuniyôna dogo yam mbà kur alum ma Jurdê-na, ngad’a yam andjafâ hi Israel ma dogo yam mbàna d’igi Ma didina mi de mi Josue na. Azi djak kahuniyôna, a i tchuguzi kä kur kangâ ata yima azi i bur kuana. 9Josue mi tin ahuniyô suma dingâ akulo kad’uzi kur alum ma Jurdê-na, ata yima suma ngat buzu suma a nga zi zandu’â hi Ma didinina a tchol kuana. Ahuniyô ndazina a ar nga ata yi máma gak ini mi.
10Suma ngat buzu suma a nga zi zandu’îna, a nga tchola hur alum ma Jurdê-na baba gak a lahlena pet suma Ma didina mi he vuna kazi mi Josue á dazi mi sumina d’igi Moise mi de mi Josue na mi. Israel-lâ a nde b’at tazi á djak aluma. 11Kid’a suma pet a djak aluma woi dad’a, suma ngat buzuna a kal ki zandu’â hi Ma didinina avok suma. 12Suma dur ayî suma ad’u andjafâ hi Ruben-na kandjafâ hi Gad-na kabo andjafâ hi Manase-nina, a kal avok Israel-lâ d’igi Moise mi hazi vuna na. 13Suma dur ayî suma a min tazi á durâ ndazina, a ni go ki 40.000. Sum ndazina a kal avok Ma didina, a i irazi hur ful la Jeriko-d’a. 14Kur bur máma Ma didina mi tin Josue ngola avok Israel-lâ pet. A nga ge yazi kä avorom kur kak mam mba yam andagad’id’a pet d’igi a ge yazi kä avok Moise adjeu na.
15Ma didina mi de mi Josue ala: 16Ang he vuna mi suma ngat buzu suma a nga zi zandu’â hi an Ma didinina, a buzuk kei kur alum ma Jurdê-na.
17Ata yi máma Josue mi he vuna mi suma ngat buzuna ala: Agi buzugugi woi kur alum ma Jurdê-na. 18Suma ngat buzu suma a nga zi zandu’â hi Ma didinina a buzuk kei kur alum ma Jurdê-na. Ata yima a tin asezi yam andaga d’a sod’ina, alum ma Jurdê-na mi hulong djangâ kä blangâma d’igi avok dei na, mi kus sei avun gongôd’id’a pupuli. 19Israel-lâ a djak alum ma Jurdê-na ni kur bur ma dogona hi til ma avo’â, a ve kangâ avo Gilgal abo ma yorogona hi Jeriko-na.
20Josue mi ndjar ahuniyô suma dogo yam mbà suma a yozï kur alum ma Jurdê-nina akulo kad’uzi avo Gilgal. 21Bugola, Josue mi de mi Israel-lâ ala: Le grogina a mba djobogi avin ala: Ahuniyô ndazina ad’uzi nana ge ni, 22agi vagi ad’ud’a mi grogina ala: Ami Israel-lâ ami djagami alum ma Jurdê-na asemi sod’a tching tching. 23Kayam Ma didina Alo meina mi so alum ma Jurdê-na woi avoromi gak ami djagami woi d’igi mi so alum ma ngol ma Tchereuna woi avogomi gak ami djagami woi na mi. 24Mi le na kayambala suma yam andagad’ina pet a wala Ma didina ni ma sib’ika, kayambala agi lagi mandara Ma didina Alo magina burâ ki burâ d’a.
Currently Selected:
Josue 4: BA
Highlight
Copy
Compare
Share
Want to have your highlights saved across all your devices? Sign up or sign in
Azumeina Bible © Alliance Biblique du Tchad, 1999.
