Josue 18
18
Andaga d’a a b’rawat ki togina mandjaf ma arîd’a
1Kid’a Israel-lâ a hlambasa dad’a, a tok tazi avo Silo, a ve zlub’u d’a ngaf tad’a kua kolâ. 2Andjafâ Israel-lâ ma ar bei hum ambasa djonina ni kid’iziya. 3Josue mi de mi Israel-lâ ala: Agi kagagi hina ndje ni, ni mindja ba, agi mba hlagi ambas sa Ma didina Alona habuyogi ngolona mi hagizid’a ge? 4Agi managi suma ad’u andjafâ hindi hindi; an mba ni sunuziya. Azi mba i nguï tita yam ambasa, a mba ngat yam b’rau mazid’a. Bugola, a mba hulongî gevenu. 5Azi mba b’rawat kä ad’u kid’iziya. Suma hi Juda-na a mba ar kaka abo ma sutna, suma hi Josef-fâ a mba ar kaka ir haga mazid’a abo ma norâ mi. 6Agiya, agi i walagi ambasa kä ad’u kid’iziya, agi b’irigizi kä kur mbaktumba, agi mbeyendjï ka hî. An mba ni le togina kagi avok Ma didina Alo meina.
7Wani suma hi Levi-na a mba fe b’raud’a adigagi d’i, kayam sun nda ngat buzuna hi Ma didinid’a ni djo mazina. Andjafâ hi Gad-na, andjafâ hi Ruben-na kabo andjafâ hi Manase-na, Moise azongâ hi Ma didinina mi haziya wa djo mazina sä abo alum ma Jurdê-na woi hî abo ma yorogona da’.
8Kid’a sum ndazina a tchol á id’id’a, Josue mi hazi vuna ala: Agi igiya, agi tid’igi yam ambasa, agi ngagiziya, agi mbeyegï gevenu. Bugola, an mba ni le togina kagi avok Ma didina avo Silo.
9Sum ndazina a tchol a i kur ambasa, a b’irid’î kä kur mbaktumba, a walat kä kid’iziya ad’u azì ma nglona. A hulongî gen Josue kur kangâ avo Silo. 10Josue mi le togina kazi avo Silo avok Ma didina, mi b’rau ambasa aduk Israel-lâ, nge nge pî mi fe b’rau mamba.
Andagad’a hi Benjamin-nda
11A handagad’a mandjafâ hi Benjamin-na ad’u adezezi ad’u adezezi ki togina. Haga mazid’a ti hleï aduk andagad’a hi suma Juda-nid’a ki d’a hi suma hi Josef-fîd’a. 12Haga mazid’a abo ma norîd’a, ti hleï avun alum ma Jurdê-na, ti kal Jeriko abo ma norâ, ti djak akulo yam ahinad’a abo ma fladegena, ti i ndeza woi hur ful ma Bet-Aven-na. 13Ti tcholï kolâ, ti i Lus, ti hleï gen Lus sa a yat ala Betel-la abo ma sutna, ti i sulugot kä Atarot-Adar yam ahina d’a Bet-Horon-nda kä ata yima ligitimid’a abot ma yorogona. 14Ti hleï abo ma fladegena, ti kal ti i kongî abo ma sutna, ti i ndeza woi Kiriyat-Bäl la a yat ala Kiriyat-Jarim-mba, nazì ma ngolâ handjafâ hi Juda-na. Wana ni haga d’a abo ma fladegenid’a.
15Haga d’a abo ma sutnid’a, ti tinï ad’ud’a ata Kiriyat-Jarim vunat ma dabid’a, ti i ndeza woi abo ma fladegena, ti kal gak ti ndeza woi avun mbiyo ma lau ma Neftowa-na. 16Ti sulugot kä avun dabid’a hahina d’a ngagad’a yam hor ra Bet-Hinom-mba d’ara, ti hleï kur hor ra Refa-d’a abo ma norâ, ti kal ti i kur hor ra Hinom-mba avo Jebus abo ma sutna, ti kal gak ti i En-Rogel. 17Ti kal ti i abo ma norâ, ti ndeza woi En-Semes, ti kal ti i Gelilot ta ngagad’a yam yima djak i Adumim-ma. Ti sulugot kä yam ahina d’a Bohan Ruben goroma mi tinita. 18Ti kal ti i Araba abo ma norâ, ti sulugot kä Araba. 19Ti kal gak ti i abo ma norâ hi Bet-Hogla-na, ti kal ndeza woi avun apo d’a Matna vunat ma mi ndeza kä woi kur alum ma Jurdê-na abom ma sutnina. Wana ni haga d’a abo ma sutnid’a. 20Haga d’a abo ma yorogonid’a, ti dabï navun alum ma Jurdê-na.
Wana nandaga d’a a hat djona mandjafâ hi Benjamin-na ad’u adezezi ad’u adezezi ki haga mat ta abo ma lara ge peta.
21Azì ma nglo ma a hum mandjafâ hi Benjamin ma ad’u adezezi ad’u adezezina ba wana: Jeriko, Bet-Hogla, Emek-Kesis, 22Bet-Araba, Semarayim, Betel, 23Avim, Para, Ofra, 24Kefar-Amona, Ofni ki Geba. Azì ma nglona ni dogo yam mbà kazì mazi ma gureina mi. 25Gabawon, Rama, Bërot, 26Mispe, Kefira, Mosa, 27Rekem, Jirpel, Tarala, 28Sela, Elef, Jebus sa a yat ala Jerusalem-mba, Gibeya ki Kiriyat. Azì ma nglona ni dogo yam fid’i kazì mazi ma gureina mi.
Wana nandaga d’a a hat djona mandjafâ hi Benjamin-na ad’u adezezi ad’u adezezid’a.
Currently Selected:
Josue 18: BA
Highlight
Copy
Compare
Share
Want to have your highlights saved across all your devices? Sign up or sign in
Azumeina Bible © Alliance Biblique du Tchad, 1999.
