Josue 10
10
A kus yam amulei suma Amor-râ
1Adoni-Sedek amul ma Jerusalem-ma, mi hum ala Josue mi hle wa azì ma Aï-na, mi b’lagam wa woi kakazeî, mi lazì ma Aï-na ni d’igi mi le ki Jeriko kamul matna na. Mi hum kua ala suma Gabawon-na a ndjak wa vunazi ki Israel-lâ yam b’leng nga halasa, a kak wa adigazi mi d’a. 2Ata yi máma a mbut mandarâ ngola, kayam azì ma Gabawon-na nazì ma ngolâ d’igi azì ma ngol ma amula na, mi ngola kal azì ma Aï-na; suma kuruma pet ni suma a we durîna mi. 3Ni kayam ndata ba, Adoni-Sedek amul ma Jerusalem-ma, mi ge sunda ata Hoham amul ma Hebron-na, ata Piram amul ma Jarmut-na, ata Jafiya amul ma Lakis-sâ, ata Debir amul ma Eglon-na mi ala: 4Agi mbeï ndjunun-ngiya, ei duri suma Gabawon-na. Kayam a ndjak wa vunazi ki Josue ki Israel-lâ yam b’leng nga halasa.
5Amulei suma Amor suma vahl ndazina a ndjak vunazi tu, nala, ma Jerusalem-ma, ma Hebron-na, ma Jarmut-na, ma Lakis-sâ ki ma Eglon-na mi. A i ki azigar mazina pet, a ngui Gabawon, a ndazi durâ.
6Suma Gabawon-na a ge sunda ata Josue kur kangâ avo Gilgal, a dum ala: Ang arami ami azungeî mangâ woi d’i, ang mbeï atogo zak, ang prud’umi woyo! Ang ndjunumiya, kayam amulei suma Amor suma a nga kaka yam ahinad’ina pet a tok wa tazi á durumiya!
7Josue mi tchol avo Gilgal ki azigar mama pet ki azigar suma a we durîna pet mi. 8Ma didina mi de mi Josue ala: Ang lazi mandarazi d’i! An hangziya wa abong da’. Sama adigazi ma mba mi tchol avorongâ nga d’i.
9Josue mi tchol ki azigar mama pet, a tit andjege gagak a mba nde yam sum ndazina durâ dumuzi. 10Ma didina mi ndjoyôzi woi avok Israel-lâ. A tchazi tchi d’a tchod’a avo Gabawon, a nga digizi kur lovot ta i akulo Bet-Horon-nda, a tchazi gak a mbaza Azeka ki Makeda. 11Kid’a azi nga ring avok Israel-lâ a sulugot kä Bet-Horon-nda, Ma didina mi sazi mogoi ma nglona kazi ei akulo gak a mba Azeka; a bo ablaud’a. Suma a bo abo mogoinina ablaud’a kal suma Israel-lâ a tchazi ki mbigeu d’a fiyakina.
12Kur bur máma Ma didina mi he suma Amor-râ abo Israel-lâ. Josue mi tchen Ma didina avok Israel-lâ, mi dala: Ndak afata, ndak tchol akulo yam suma Gabawon-na hina djang! Ang tilâ, ang tchol akulo yam Hor ra Ajalon-nda hina djang mi! 13Afata ti ar tchola ata yatna, tilâ mi ar tchola ata yam mi, gak Israel-lâ a hlatchuguluzi ki mazi suma djangûna. A b’ir nga zla ndata kä kur Mbaktumba hi Ma d’ingêrîd’a d’uo zu? Afata ti ar tchola aduk akulod’a bei d’i b’at tat á i ata yat ma nika gak go ki burâ tu. 14Avok bur máma d’oze bugol bur máma Ma didina mi hum nga vun sa d’igi mi hum vun Josue kur bur máma na d’i, kayam ni Ma didina tamba ba, mi dur yam Israel-lâ.
15Bugol ahle ndazina, Josue azi ki azigar Israel-lâ pet a hulong kur kangâ avo Gilgal.
Josue mi tchamuleina woi vahl
16Wani amulei suma vahl ndazina a ring a ngei tazi kur zul ahina d’a Makeda-d’a. 17A mba de mi Josue ala: Amulei suma vahl ndazina a ngei nga tazi kur zul ahina d’a Makeda-d’a.
18Josue mi dazi ala: Agi ligad’agi ahina d’a nglod’a avun zul ndata, agi tinigi suma avun á ndjola. 19Wani agi igi avogovok á dik magi suma djangûna, agi tchagi mazi suma asezi mi ar bugolâ woyo, agi arazi á kal avo hatazi d’i. Kayam Ma didina mi hagiziya wa abogiya.
20Bugol la Josue azi ki azigar suma Israel-lâ a tchazi tchi d’a tchod’a a lazi á dap pa woid’a, suma adigazi suma a sutna a ring gak a kal kur azì mazi ma ad’eng ma ngunguna. 21Ata yi máma azigar suma Israel-lâ a hulong gen Josue kur kangâ avo Makeda ki halasa bei sa mi dazi zla d’a tcho ba.
22Ata yi máma Josue mi dala: Agi i malagi vun zul ahinad’a, agi buzugunï amulei suma vahl ndazina woyo. 23A buzugumï amulei suma vahl ndazina woyo, nala, ma Jerusalem-ma, ma Hebron-na, ma Jarmut-na, ma Lakis-sâ ki ma Eglon-na mi. 24Kid’a azi buzuguzï woi avok Josue-d’a, Josue mi yi azigar suma Israel-lâ pet, mi de mi suma avogozi suma a nga tit ki sed’ema ala: Agi hud’ugïya, agi tinigi asegi kä kel amulei ndazina. A hud’ïya, a tin asezi kä keleziya.
25Josue mi dazi ala: Agi lagi mandar ri, agi ar vunadigagi pat ti! Agi vagi tagi ad’enga! Agi sogi tagiya! Kayam Ma didina mba mi le ki magi suma djangû suma agi mba duruzina ni hina.
26Bugola, Josue mi tchamulei ndazina, mi tchuguzi ziyona keleziya, mi djinizi akulo ata aguna vahl. A ar akulo ata aguna gak tcha fladege. 27Kid’a afata i nikid’a, Josue mi he vuna ala a pad’azi mad’azi kä ata aguna. A tchuguzi kur zul ahina d’a azi ngei tazi kuad’a, a duk ahina d’a nglod’a avun zul ndata mi. Ahina ndata ti nga tchuka avun zula gak ini.
Josue mi yo azì ma nglo ma abo ma sutnina
28Kur bur máma tamba, Josue mi hlazì ma Makeda-na, mi tchi amul mama ki suma kuruma woi pet, mi ar nga sa bei tchi tu d’i. Mi le kamul ma Makeda-na ni d’igi mi le kamul ma Jeriko-na na mi.
29Josue azi ki azigar suma Israel-lâ a tchol Makeda, a i Libina, a ndazì ma Libina-na durâ. 30Ma didina mi hazì máma kamul mama abo Israel-lâ. A tchi suma kuruma woi pet bei ar sa tu ba, a le kamul máma ni d’igi a le kamul ma Jeriko-na na mi.
31Josue ki azigar suma Israel-lâ pet a tchol Libina, a i Lakis, a ve kangâ huyok azina, a ndum durâ. 32Kur bur ma mbàna, Ma didina mi hazì ma Lakis-sâ abo Israel-lâ. A tchi suma kurâ woi pet bei ar sa tu ba, d’igi a le kazì ma Libina-na na mi. 33Ata yi máma Horam amul ma Gezer-râ, mi tchol á ndjun suma Lakis-sâ. Wani Josue mi tchum mbei ki sum mama pet bei ar sa tu ba.
34Josue azi ki azigar suma Israel-lâ a tchol Lakis, a i Eglon, a ve kangâ huyok azina, a ndum durâ. 35A hlumî kur bur máma baba d’igi a hle Lakis na, a tchi suma kurâ woi pet mi.
36Josue azi ki azigar suma Israel-lâ a tchol Eglon, a i gak Hebron, a ndazì máma durâ. 37A hlazì máma, a tchi amul mama ki suma kurâ woi pet. A hlazì ma go ki sed’ema pet mi, a tchi suma kurâ woi pet d’igi a tchi suma Eglon-na woi na mi. Josue mi b’lak azina woi kakazeî. Mi tchi suma kurâ woi pepet bei ar sa tu ba.
38Bugola, Josue azi ki Israel-lâ a hulong kazigazi, a i Debir, a ndazi durâ. 39A hlazì máma kamul mama kazì ma go ki sed’ema pet mi. A tchi suma kurâ woi pet bei ar sa tu ba. Josue mi le kazì ma Debir-râ kamul mama ni d’igi mi le kazì ma Hebron-na na, ni d’igi mi le kazì ma Libina-na kamul mama na mi.
40Josue mi hlambas sa abo ma sutnid’a kamulei suma a nga kaka yam ahuniyôna ki suma a nga kaka ata yima kikid’i’îna ki suma a nga kaka kä ata yima ligitimina ki suma a nga kaka ata yima ndingîna, mi ar nga sa tu d’i. Mi dap ahle suma a nga muzu’â woi pepet d’igi Alona hi Israel-lîna mi he vuna na mi. 41Josue mi kus kaziya, tinï ad’ud’a Kades-Barneya dei gak a mba Gaza, a kal gak a i Gosen gak a mba Gabawon. 42Josue mi hlambasa kamulei matna pet ni kur nde d’a mi ndeza durâ yam tu ndata, kayam Ma didina Alona hi Israel-lîna nga mi dur kaziya. 43Bugol tua ba, Josue ki Israel-lâ a hulong avo Gilgal.
Currently Selected:
Josue 10: BA
Highlight
Copy
Compare
Share
Want to have your highlights saved across all your devices? Sign up or sign in
Azumeina Bible © Alliance Biblique du Tchad, 1999.
