Job Wana ni modo zla d’a kuruta
Wana ni modo zla d’a kuruta
Mbaktumba hi Job-pa tin ad’ud’a nga d’i de zlad’a yam zla d’a lädjeud’a. Gol sapitre d’a 1 ki 2. Job ni ma bei zlad’a kam ba na, ni ma nga kahlena ngolina mi. Wani mi ni sama d’engzengâ avok Alona ni kayamba nga mi fahlenid’a zu? Wani ahle mama a dap pei pet, nala, bege mamba ki groma. Bugola, tugud’eid’a tumum mi. Kur ndak mam mba ngol ndata hina ni, mba mi kak sama d’engzengâ avok Alona zu?
Wani Alona ni nge ge? Mi le ni ma d’ingêrâ ni, ni kayam me ba, ndak ndata ti fe Job ke? Suma hindina a min ve banazina ki zlad’a ala: Ndak ka mi fata ni ngop pa yam tcho d’a mi lat avok deid’a. Ni kayam ndata ba, tuguyo d’a ngola ti tchol adigaziya, a nga tin zlad’a yat tata. Zlad’a abuwat ta kur mbaktum ndatid’a ti fiyaka heî. Gol sapitre d’a 3 gak 31. Job buniyôm suma hindina a tchol ki zla mazid’a á dozom ki zla d’a Alona nga mi lat tei pid’ak ir sumid’a, wani Job nga mi tchi tuguyod’a ki sed’ezi ngola yam djib’er mazid’a, nga mi vazi ad’ud’a yam zla d’a irata ala: Tchod’a nga d’i le suma yam andagad’ina pet bei d’obota nga mi. Mi tchol djangûna ki zlad’a hi buniyôma d’a a hle simiyê Alona, a nga de ki zlad’a d’igi azi ndjun ni Alona na d’a, wani nga mi dugud’ozi ded’a ala mam zla nga kam mbi.
Sama dingâ mba mi kal ki zla mamba, nala, Elihu. Gol sapitre d’a 32 gak 37. Ni ma mi tchol ki zla mam mba ded’a á noî Job kur djib’er mamba ala: Alona mi sunï ndaka yam sana ná gum humamu na. Hina pet pî, sana ndak nga á djobom zla d’i.
Dabid’a, Alona tam mi mba, mi de zlad’a. Gol sapitre d’a 38.1 gak 42.6. Wani mi ar zla d’a mi hulongôm humba yam zla d’a a djobota ta mi djobomî djoba kua d’ei. Ata yi máma Job mi we tcho mam mba mi lata. Wani avoka mi de zlad’a yam Alona bei mi wum mbei tetet ala Alona mi ni na d’a ba.
Mbaktum ndata dabi mata ti hulongî yam zla d’a ti lädjeud’a. Gol sapitre d’a 42.7-17. Alona mi dala: Ni Job tu ba, ni sama de zla d’a irata kama. Mi hulong mi hum ahlena mbàmbà yam ahle mam suma a ba woina. t Wana ni wal mata
Kuk ka avoka hi Job-pa 1.1-22
Kuk ka mbàd’a hi Job-pa 2.1-10
Mbad’a hi Job buniyôm suma hindinid’a 2.11-13
Zlad’a hi Job azi ki buniyômid’a 3.1–31.40
Elihu mi vrak á de zlad’a 32.1–37.24
Ma didina nga mi de zlad’a 38.1–42.6
Ma didina mi hulong tin Job blangâm ma adjeuna 42.7-17
Currently Selected:
Job Wana ni modo zla d’a kuruta: BA
Highlight
Share
Compare
Copy
Want to have your highlights saved across all your devices? Sign up or sign in
Azumeina Bible © Alliance Biblique du Tchad, 1999.