Job 3
3
ZLAD’A HI JOB AZI KI BUNIYÔMID’A
(3—31)
Job mi yor tam yam vut mamba
1Bugol ahle ndazina, Job mi mal vunam mi yahlena yam bur ma mam vut kurâ, 2mi dala:
3Ar bur ma an vut kurâ a tchum mbei
kandjege d’a ti dala:
A ve wirâ gor mandjufâ ini d’a mi!
4Ar bur máma mi mbut nduvunda!
Ar Alo ma akulona mi djib’er kam mbi!
Ar b’od’a ti b’o kam mbuo mi!
5Ar nduvunda kanguza matna a vum mbeyo!
Ar d’ugula ti kak kam akulo!
Ar nduvun nda mba ki ndaka yam sumid’a,
ti mbut bur máma mandarâ!
6Ar andjege ndata nduvunda ti vad’u!
Ar ti vit tei aduk burâ hi bizad’ina!
Ar a ndumut aduk bur tilâ d’uo mi!
7Â! Ar andjege ndata sa mi vut gor kur ri!
Ar sa mi le furî kurut tuo mi!
8Ar suma kuma suma yahlena yam burîna
a yahlena yam andjege ndata!
Ar suma a nga ki wed’a á zlit ambur ma ngol
ma a yum ala Leviyatan-na#3.8 Leviyatan-na: Mi hle tamî d’igi huruma d’oze gariyama na. Ki tchetchemba, mi nga d’i. akulona
a yahlena kat mi!
9Ar ti we avevel ma yorogona d’i!
Ar ti djup yima fod’a tatâ, wani ti fum mbi!
Ar ti djup gak ti we yima grad’a ki irat tuo mi!
10Kayam ti d’el nga lovota masun á van wirin ndi,
ti ngeyen nga ndaka woi iran nduo mi!
*
11Ni kayam me ba, an mit sä kur asun nduo ge?
Ni kayam me ba, muzugan mi dap sä
ata yima an ndei woi kurutna d’uo ge?
12Ni kayam me ba, a van akulo adigazi ge?
Ni kayam me ba, a han apona á tched’a ge?
13Ladjï an mid’a ni, an kak wa tchugot;
ladjï an bur sena ni, tan tuk wa halas
14zlapa kamuleina ki suma de d’al suma yam andagad’a
suma a min asu d’a ge humba kazi azi tazid’ina,
15zlapa ki suma nglo suma a nga tok lora
suma a oî aziyazi ki bege d’a hapina.
16Ni kayam me ba, wirin mi nde woi
d’igi kem mba vud’ï ki matna pang
bei we b’od’ina na d’uo ge?
17Sä ata yi máma suma asa’atna a nga le murud’umba kua d’i.
Sä ata yi máma suma a kau suma ad’engêzi nga d’uo na a tuk tazi kua.
18Ata yi máma suma dangeina pet a nga kaka kua tchugot,
ata yi máma a nga hum del sama djop vun sa kua d’uo mi.
19Ni yima kemba ki suma nglona a nga kuana,
ni yima magoma mi wal lei ki salama kuana mi.
*
20Ni kayam me ba, a ar yina mi b’o yam sama nga kur ndakina ge?
Ni kayam me ba, a ar suma a nga ki hur ma wuranina a kak ki irazi ge?
21Ni suma a nga hal matna a nga fum mbuo na,
ni suma a nga le d’od’oka kam kal ndjondjoîd’ina.
22A le furîd’a ki hur ma hapma,
ata yima a i kä azuleina!
23Ni kayam me ba, a ar sama lovot mamba tos sei iram
ma Alona mi nguyum kä ki kangâna
mi d’elem á kak ki irama ge?
24Zam tad’a ti mbut navu man ma ted’a,
tchi mana nga mi djang kä d’igi mbina na.
25Vama an le mandarâ aboma ni vama mba kä na,
vama an nga ni le gigrit kama ni vama fana mi!
26An nga kaka tchugot toze halas soze tuk tan ndi;
ni ndaka ba, nga d’i mba kanu.
Currently Selected:
Job 3: BA
Highlight
Share
Compare
Copy
Want to have your highlights saved across all your devices? Sign up or sign in
Azumeina Bible © Alliance Biblique du Tchad, 1999.
