Job 21
21
Job mi de kua ala: Kaka hi suma asa’atnid’a ni ki djivid’a
1Job mi hulong dala:
2Agi humugi zla manda!
Hina wani, agi mba b’lengên hurunu!
3Agi aran lovota á de zlad’a.
Le an de zlad’a ni, agi lazagiya.
4Na ni tchi ma an tchima ni yam sa zu?
Ni kayam me ba, an ndak á ve tan nduo ge?
5Agi golondiya, agi lagi atchap,
agi dugugi abogi avunagiya.
6Ata yima an nga ni djib’er yam ahle suma a mba kana,
vunadigan pat fek, an nga ni zlak mi.
*
7Ni kayam me ba, suma asa’atna a kak ki irazi ge?
Ni kayam me ba, a mbut momorogeid’a, a fad’enga mi ge?
8Andjavazi nga mi fad’enga ki sed’ezi kä iraziya,
grozina a nga zul avogovok kä irazi mi.
9A nga kaka avo hatazi ni ki halasa bei mandarâ ba,
Alona nga mi tozi ki totogo mamba d’uo mi.
10Amuhl mazina nga mi tchuk amuzlei suma aropma wirâ, a nga kid’ak ki,
amuzlei mazi suma aropma a nga vut grona,
huruzi nga mi tchuk kei d’uo mi.
11Sum ndazina a nga ar grozi suma gureina
a dub’ar d’igi d’uwar ma gureina na,
grozina a nga gal akulo ki furîd’a mi.
12A nga hle sawala kading ma nglona ki ma gureina ki delezi akulo,
a nga le furîd’a ad’u tchina hi taulâd’ina.
13Kak mazid’a yam andagad’id’a ni ki djivid’a,
a nga i kä azulei ki halasa bei ndaka ba.
14Wani a nga de mAlona ala:
Ang huttcha woi gevemi dei,
ami min tid’imi yam gat manga d’i.
15Ang Ma ad’engêng kal petna ni nge ba,
ami lang sun nda magomba ge?
Ami mba fami ni me ata yima ami nga tchenengâ ge?
16Gola! Djivi mazid’a naboziya,
wani vama ndolon nga ki d’alâ hi suma asa’at ndazinina d’i.
17Alona mi tchi lalamba hi suma asa’atnid’a woi ni yam ga ge?
Mi mba ki ndaka kazi ni yam ga ge?
Mi b’rawazi hur ma wurana kur ayî mama ni yam ga ge?
18Tala azi mbut d’igi hububu ma simetna nga mi felema na,
d’oze d’igi ahlapma mbirlimba nga d’i felema na d’a ge?
19Agi nga dagi ala:
Alona nga mi ngom ngop mamba ni yam ma asa’atna groma!
Wani nga na d’i!
Vama djivina Alona mi ngobomî mam tamba tala mi wumu d’a.
20Ni mam tamba ba, mi gol ndak mamba ki iramu,
ni mam tamba ba, mi tche ayîna hi Ma ad’engêm kal petnina mi.
21Le tilim ma a ngamzina mi dap wa da ni,
bugola, vama ndolom ni me ki groma d’ei ge?
22Na ni sana mi ndak á hat Alo
ma nga mi ka sariyad’a yam malaikana tazid’ina
á wäd’u ahle ndazina zu?
*
23Suma dingâ a nga kak ki djivid’a gak mat mazina,
azi nga kak bei djib’era kur halas sa memeta.
24A nga d’orâ duduguzlî,
asogozi mi nga ni oîd’a kandjulor ra ari d’a hûlîd’a.
25Suma dingâ a nga kaka kur yor tad’a gak mat mazina
bei a djuk djivid’a hina nde ba.
26Azi ki zla tazi djak a bur kä aduk andagad’a;
atogo hina zak ndjuvulâ mi tchuguziya.
27Gola! An we djib’er magid’a,
an we djib’er magi d’a kurugi d’a agi min lan ki tchod’id’a mi!
28Agi nga dagi ala:
Azina hi ma te yamba kad’engina,
mi nga ni lara ge?
Zlub’ud’a hi suma asa’atnid’a,
ti nga ni lara ge?
*
29Agi djobogi nga suma tita d’uo zu?
Agi min glangâs mazina d’uo zu?
30Kur bur ma ndaka a mba ar ma asa’atna hawa,
kur bur ma ayîna mam mba mi prut tei mi.
31Ni nge ba, mba mi ngobom yam tit mamba ge?
Ni nge ba, mba mi wuragam yam sun mam mba mi lata ge?
32A mba hlum im kur zula,
a mba ngomom asu mamba mi.
33Andaga d’a zigat ta kur horid’a tafefeta atamu.
Suma pet a nga i bugol mad’amu,
suma ablaud’a a nga i avorom mi!
*
34Ni kayam me ba, agi b’lengên hurun ki zla d’a hawa yaka ge?
Kayam zla d’a de magi d’a agi hulongôta ni zla d’a kad’a!
Currently Selected:
Job 21: BA
Highlight
Share
Compare
Copy
Want to have your highlights saved across all your devices? Sign up or sign in
Azumeina Bible © Alliance Biblique du Tchad, 1999.
