Job 18
18
Bildat mi de kua ala: Dauna mi nga gunda kä yam sama asa’atna
1Bildat ma Suwa-na mi de mi Job kua ala:
2Ni mindja ba, ang ba zla mang nga de ndata ge?
Ni mindja ba, ang kak tchugot ami dang zlad’a ge?
3Ni kayam me ba, ang golomi d’igi ambureina na ge?
Ni kayam me ba, ang golomi irang d’igi suma yazi nga d’uo na na ge?
4Ang ma b’lak tang ngei kur ayî mangîna,
a mba mbut andagad’a vama hawana kayam ang zu?
A mba djok ahinad’a woi yima dingâ kang ang zu?
*
5Gagazi, b’od’a hi sama asa’atnid’a mba d’i mit teyo,
sin aku mam mba nga d’i trâd’a mba d’i b’o woi d’uo mi.
6B’o d’a avo hatamba mba d’i b’o d’i,
lalam mba nga tinda kamba mba d’i mit tei mi.
7Tit mam mba kad’engid’a mba d’i hlum abod’a,
d’al mama tamba mba mi bam mbeyo.
8Kayam asem nga mi im kur abei d’a nga gunda kä d’a,
nga mi i á ve kabei ndata.
9Dauna mi vum dodogasemu,
ziyom mi siram ad’enga ngingring mi.
10Ziyo ma a vum ki na, mi ni ngeid’a kä aduk andagad’a,
abeid’a ti nga gunda kä kur lovot mamba.
11Ahlena a mba pad’am vunadigam ata yina pet,
a mba digim ad’um mi.
*
12Meid’a mba d’i dabam ad’engêm mbeyo,
ndaka mba d’i kak gevemu.
13Ti mba d’i tum babagam mba ar nde nded’a,
tugud’ei d’a tcho d’a tchi matna mba d’i tum ir hliwimu.
14A mba vumî woi kur aziyam ma mam tin hurum kama
á im mamul ma mbut suma mandarîna#18.14 amul ma mbut suma mandarîna: Nala, matna..
15Sama ding mi ndak á kak kur aziyam
mala nga ni mama d’uo d’angû na,
kayam a tchuk aku d’a sufred’a kur aziyamu.
16Mam mba mi soï woi ki sideyem ad’u kä dei,
abom ma akulona a mba kam mbei mi.
*
17Sa mba mi djib’er kam yam andagad’a ka hî d’i,
simiyêm mba mi yi ata yima ding nguo mi.
18A mba digim mbei kur b’od’a á im kur nduvunda,
a mba digim mbei yam andagad’a mi.
19Mi mba mi ar gorom
mboze gorom ngolo aduk sum mama d’i,
sa mba mi ar ki iram ata yima mam nga kaka kuana d’uo mi.
20Suma abo ma fladegena a mba le atchap yam b’lak mamba,
suma abo ma yorogona a mba le mandarâ mi.
21Wana ni yima kaka hi sama d’ingêr ruo na,
wana ni yina hi sama mi we nga Alona d’uo na mi.
Currently Selected:
Job 18: BA
Highlight
Share
Compare
Copy
Want to have your highlights saved across all your devices? Sign up or sign in
Azumeina Bible © Alliance Biblique du Tchad, 1999.
