Job 14
14
Job mi de kua ala: Wana ni zla d’a hohou d’a yam sanid’a
1Job mi de kua ala:
Sama atchad’a vud’uma, burumî akid’eid’a hina yegre,
mi ni oîd’a ki ndaka mi.
2Nga mi buzur rei d’igi b’od’a na, mi yak keyo,
nga mi kal lei d’igi angusâ na, nga mi kak tatâ d’i.
3Ni mam ba, ang so irang kam gola,
ang i ki sed’em#14.3 ki sed’em: Mbut ta dinga ala: ki sed’em, wani vun Hebre-na ala: ki sed’en. kur sariyad’a!
4Ni nge ba, mba mi ndeï vama yed’etna woi
ata vama ndjendjed’a ge?
Sa tu pî mi ndak á le hina d’i!
5Le ang ngam burumu, le ang ndum til mama,
le ang ngam yima ndak á tchila woi kam mbuo na ni,
6ar ang hle irang ngei kamu,
ar mi tuk tam
mbala mi le furîd’a nde d’igi sama mi le sun nda beged’a
mi le furîd’a kur dabid’a hi bur mam ma sunda na d’a.
*
7Hur ma tinda nga yam aguna ala
le a kam mbeyo ni, mam mi d’uva,
mba mi ba bei tchuk grona d’i.
8Le sideyem mi mbut mamara kä aduk andagad’a,
le abuwam mi nde kä aduk andagad’a pî,
9fata alona mi tchuk kä d’a, mi d’uva,
abom mba mi d’uf d’igi agu ma a pum awilina na.
10Wani le sana mi mid’a ni, zlam dap da’.
Gagazi, sana mi mid’a, a dok fumî lara d’ei ge?
11Mbiyo alum ma nglona pî, mi ndak á val leyo,
mbiyo aluma pî, mi sid’am kä, mi so woi mi.
12Hina mi, le sana mi mid’a ni, nga mi hulong tchol akulo d’uo d’a;
bei akulod’a kal lei ba ni, mi nga mi zlit akulo d’i,
sa mba mi zlid’im akulo kur sen mam ma dabid’a d’uo mi.
*
13Ladjï ang ngeyen kä ata yima azuleina,
ladjï ang ngeyen kä gumun gak ayî mangâ mi kal lei kanu,
ladjï ang ngan yima ala ang mba hulong djib’era kanu na,
14ladjï sana mi mit mi hulong mi kak karid’a ni,
an mba ni djup bur man ma sunda
gak bur ma ang mba á hulongôn blangânina!
15Ang mba yanu.
Ata yi máma an mba ni hulongông humba,
kayam ang min á wan an ma ang lan kabongâ!
16Ki tchetchemba, ang nga ndumun asen ma tita,
wani ang mba tin irang yam tcho manda d’i.
17Ang mba ngeyen tcho manda kä kur bid’imba,
ang mba kulubun yam tchila manda kä mi.
*
18Ahinad’a fiyaka ti nde kä ti to woyo,
ahina d’a mba d’i djok keyo,
19mbina nga mi lot ahuniyôna woyo,
mbiyo ma djangâ mi vrik andagad’a woyo.
Ni hina ba, ang nga b’lak tin hurâ hi sanina woyo.
20Ang nga aram bei ved’a kä d’i, mam nga mi iya,
ang nga mbud’um iram tchod’a, bugola, ang digimu.
21Le a nga he ngola mi groma ni, mam nga mi we d’i;
le a nga hulongôzi yazi kä ni, va ndolom nga d’i.
22Mam tamba nga mi fe ndak mamba kur hliwimu,
mam tamba nga mi yor tam kur muzugam mam tamba mi.
Currently Selected:
Job 14: BA
Highlight
Share
Compare
Copy
Want to have your highlights saved across all your devices? Sign up or sign in
Azumeina Bible © Alliance Biblique du Tchad, 1999.
