Job 12
12
Job mi dala: Alona nga mi ge yam kä ad’u sa d’i.
1Job mi hulong dala:
2Gagazi, zla magi d’a ded’a ni zlad’a hi suma hawid’a!
Agi mba bogi ki ne ndata tum!
3Wani an ni sama ned’a d’igi agi na!
Agi kalan nga d’i!
Ni nge mi we nga ahle suma agi dazi wana d’uo ge?
4Ata yima an yAlona mi hulongôn humbina,
an mbut ni sama buniyôma a san ad’uma!
An sama irat ma d’ingêrâ, ni mbut ni vama sanda!
5Ni zla d’a hohoud’a yam ma a golom isâ!
Wana ni djib’era hi suma a nga kaka ki halasina.
Azi nga de zla ndata ni mi suma asezi mi ka azlard’eid’ina.
6Suma murud’umba a nga ki djib’era avo hatazi d’i,
suma a nga djo Alona ki zlad’ina, va nga mi lazi d’i,
a nga walo ma ding ngi, nad’eng mazid’a hol!
*
7Ang djop ambureina, a mba had’angû,
aluwei suma akulona a mba dangzi mi.
8Ang de mandagad’a, ti mba d’i had’angû,
kuluf ma kur alum ma ngolîna mba mi vang ad’ud’a mi.
9Ni nge mi wazi nga ala:
Ahle ndazina pet Ma didina mi lazi ni mamu d’uo ge?
10Arid’a hahlenid’a pet nabomu,
muzuka hi sumid’a pet nabom mi.
11Humba nga d’i wal ir zlad’a woi
d’igi sinda nga d’i djuk tena na d’uo zu?
12Ned’a ang fat nata momorogeina,
d’alâ ang fumî ata sama le bizad’a ngola yam andagad’ina.
13Ned’a ki sib’ika a fazi nata Alona,
d’ala ki wad’ud’a a fazi natam mam mi.
*
14Le mi b’lak va woyo ni,
sama hulong mi minim akulona nga d’i.
Le mi ge sana dangeina ni,
sama gum akulona nga d’uo mi.
15Le mi d’el alona bei sed’a ni,
ahlena pet a so ni woyo.
Le mi aramu ni,
mi kus sei yam andagad’a pet mi.
16Ad’enga ki wed’a ni mamba,
sama vit tam mbeina
d’oze ma vit suma dingâ woina a ni mama.
17Mi nga mi yo suma de d’alâ magomba,
nga mi b’lak zlad’a hi suma avok sumina woyo.
18Nga mi but d’i’â hamuleinina woyo,
nga mi tchuguzi ziyona furuziya.
19Nga mi yo suma ngat buzuna magomba,
nga mi tchuk suma te yamba kä.
20Nga mi yo zlad’a woi avun suma a nda’â,
nga mi yo d’alâ hi momorogeinina woi mi.
21Nga mi mbut suma nglona vama a golom isâ,
nga mi b’at ahle suma sïna woi abo suma ad’engâ mi.
22Nga mi nde ki vama ngeid’a kur nduvun nda i’îlikina woi abu pid’agi,
nga mi tak nduvun nda matna woi abu pid’ak mi.
23Nga mi zul andjaf suma, nga mi tchazi woi mi;
nga mi izi avogovogo, nga mi izi magomba mi.
24Nga mi yo d’alâ hi suma nglo suma avok sumina woyo,
nga mi vid’izi woi abagei hur ful ma lovota nga kua d’uo na mi.
25A nga lam yina kur nduvunda ata yima bei b’od’a ba na,
nga mi tchazi tata d’igi suma a gurut ki sümina na.
Currently Selected:
Job 12: BA
Highlight
Share
Compare
Copy
Want to have your highlights saved across all your devices? Sign up or sign in
Azumeina Bible © Alliance Biblique du Tchad, 1999.
