Jeremi 51
51
1Ma didina mi dala:
Gola! An nga ni tchol ki simet ma b’lak yina
yam azì ma Babilon-na,
yam suma a nga kaka kuruma mi.
2Gola! An nga ni sun suma sir ahlena yam Babilon,
a mba sirit teyo,
a mba dap ahlena woi kur ambas mata.
Suma a mba tcholï abo yina pet,
a nde kat kur bur mat ma ndaka.
3Ar agi ndirigi yeûd’a ata sama nga mi ndir yeûd’a á yetina,
ar agi yed’egi sama mi tin hurum yam kongrong mamina.
Agi aragi azungeî matna d’i,
agi tchagi azigar matna woi kakaf.
4Ar a puk kä ki mbuleina,
a bo kä yam ambas sa Babilon-nda,
ar a tchogozi mbuleina ir palumba hazì mat ma ngolîd’a.
5Kayam ambas sa Babilon-nda
ti oî ki tchod’a avok Ma tin tam irat vat yam Israel-lîna.
Hina pet pî, Israel-lâ ki suma Juda-na,
Alo mazi Ma didin ma ad’engêm kal petna mi arazi nga woi d’i.
6Agi ringîgi woi kur Babilon,
ar nge nge pî mi sut tamu,
ar a tchagi woi yam tcho mata d’i,
kayam ni yima sä atchugula hi Ma didinina,
mba mi wuragat yam sun mata.
7Adjeu Babilon ni kop ma lor
ma mi nga ved’a abo Ma didinina,
ni ma mi gurut suma yam andaga woi petna.
Andjaf suma a tche süm guguzlu mata.
Ni kayam ndata ba,
andjaf suma yazi d’i b’lak ki wana!
8Atogo hina zak Babilon ti puk kä, ti b’lak keyo.
Agi tchigi kad’u,
agi yogi kumana á tinda ata mbil matna.
Dam mba d’i tchil kla?
9Adjeu ami min á tchilimi Babilon,
wani ndat tchil nga d’i.
Ki tchetchemba, ei arat teyo,
nge nge pî mi i yam ambas mamba,
kayam sariya d’a a kattchi kata
ti i akulo hur alona,
gak ti doï d’ugula.
10Ma didina mi ndeï ad’u d’ingêr meid’a woi abu da’.
Mbeyegïya, ei i vei ad’ud’a woi
yam sunda hi Ma didina Alo meinid’a kur Siyon.
11Agi gurugi sï yeû magid’a,
agi yogizi kur aziyad’u.
Ma didina mi djiu wa hur amulei suma Mede-na akulo,
kayam mi nga hurum á b’lak Babilon ndei da’,
kayam natchugul la sad’a hi Ma didina
d’a mi sat yam gong mam mba kud’orid’a.
12Agi pagi drapo d’a taka akulo,
agi durugi gulumun ma Babilon-na,
agi hagi ad’enga mi ma ndjola,
agi tinigi suma ndjola,
agi tinigi suma a bur suma kä na.
Kayam Ma didina mi nga hurum da’,
nga mi ndak vun zla d’a mi dat
yam suma a nga kaka Babilon-nid’a.
13Ndak Babilon nda nga kaka avun mbiyo ma nglonid’a,
ndak ka tok ndjondjoîd’a ngola avo hataka,
zlak dap da’, d’od’ok maka dap wa mi.
14Ma didin ma ad’engêm kal petna
mi gun tam ki mam tamba ala:
Gagazi, an mba ni oî suma kuruk d’igi djera na,
a mba siwel siwel la ayîna kagu.
15Ma didina mi landagad’a ni ki sib’ik mamba,
mi gäd’u duniyad’a ni ki ne mamba,
mi b’eng akulod’a woi ki wäd’u mamba mi.
16Ata yima mi he vunina,
mbina mi tok kur akulod’a.
D’ugula ti tcholï avun dabid’a handagad’id’a teteng.
Wiled’a nga d’i wile á salona,
simetna mi buzugï woi
ata yam ma ngei ahlena mi.
17Kayam ndata, suma pet a mbut
ni suma yazi nga d’uo na abo we mamba.
Suma yor lora pet a mbut zulona
kangus ahle suma azi yorozina,
kayam filei mazina ni filei ma ka zlad’a,
nga mi muzuk kuo mi.
18Azi nahle suma hawa ya’â,
ni sun nda lop ira.
Fata mba mi ngobozid’a, a mba dap peyo.
19Wani ma ala ni ndjondjoîd’a hi Jakob-pa na,
mi nga na d’i.
Mam mi Ma ad’engêm kal petna,
Israel-lâ ni sum mama mi.
Simiyêm ala Ma didin ma ad’engêm kal petna.
Dabid’a hi Babilon-nda
20Ma didina mi dala:
Ndak Babilon, adjeu nda’î marto mana,
ni va man ma sï ma dur ayîna.
Ni ki ndak ba,
an kizak kandjaf suma woyo,
ni ki ndak ba,
an b’lak ki leu d’a tetenga woi mi.
21Ni ki ndak ba,
an kus kakuluma ki sama djangâma,
ni ki ndak ba,
an kus ki pus ma dur ayîna ki sama mi djangâma mi.
22Ni ki ndak ba,
an kus ki mandjufâ katchad’a,
ni ki ndak ba,
an kus ki mamarâ ki gogorâ,
ni ki ndak ba,
an kus kazongâ ki weid’a woi mi.
23Ni ki ndak ba,
an kus ki ma pola ki d’uwar mama,
ni ki ndak ba,
an kus ki ma zuma kahle mam suma zuma,
ni ki ndak ba,
an kus ki suma te yamba ki suma nglo suma ka sariyad’a mi.
24Ma didina mi dala:
An mba ni wurak Babilon
ki suma a nga kaka kurutna pet
yam tcho d’a azi lat mi Siyon-nda kä iragi na.
25Ma didina mi dala:
Ndak ahina d’a b’lak yina,
an nga ni iza atak á durâ.
Ndak ka b’lak suma yam andagad’a peta,
an mba ni mat abon ni durugu,
an mba ni zud’ugï kä yam ahuniyôna,
an mba ni mbud’u’î ahina d’a ngalat teid’a.
26Ma didina mi dala:
A mba fahina d’a djik gong kuruk kuo mi na,
a mba fahina d’a gäd’u gong kuruk kuo mi.
Ndak mba d’i arî djona ki irak fafat.
27Agi pagi drapo d’a taka akulo kur ambasa,
agi bugi adifa aduk andjaf suma,
agi minigi andjaf suma á durud’u,
agi yagï suma kur leu d’a Arat-ta,
kur ra Mini-d’a, kur ra Askenas-sa mi.
Agi i yagï nglo suma dur ayîna á durud’u,
agi aragi akulumeina a pir kurut d’igi djera ti pir na.
28Agi togogi andjaf suma zlapa kamulei suma Mede-na,
ki mazi suma nglona kamulei mazina pet,
ki suma kur ambas sa azi te kata pet á durud’u.
29Andagad’a ti giged’a, ti zlak mi,
kayam nga hurâ hi Ma didina
ma mi ngam yam Babilon-na, mi ndak wa.
Mi mbut wa ambas sa Babilon-nda djo
ma bei sa mi kak kua ba na.
30Suma dur suma Babilon-na a ar bei dur ayîna,
a ar kaka kur azì ma ad’eng ma ngunguna.
Mazi suma gangrangâ a mbut amangeîd’a,
a mbut ni d’igi aropma na.
Suma djangûna a nga dozi aziyazi akud’a,
a kus kawei mam ma murgulina woi mi.
31Ma gum sundina mi ring ad’u ma gum sundina,
suma a tchuguzi sundina a ring ad’u ndrozina
á i de mamul ma Babilon-na ala
azì mam ma ngolâ, a hlum wa ki zla tam pet!
32A hle wa yima a djak mbina kuana,
yi mazi ma ad’eng ma ngunguna a ngalam wa woyo,
suma dur ayîna a mbut mandarâ.
33Ma didin ma ad’engêm kal petna, Alona hi Israel-lîna, mi dala:
Babilon ti ni d’igi ambid’ak
ma a to awuna kuana na.
Ar hina ndjö, yima duta nga mi mba kad’u!
Alona nga mi sä atchugul sum mama
34Jerusalem ti dala:
Nebukanezar amul Babilon-na
mi kizagan ndeyo, mi b’lagan ndei mi.
Mi mbud’un ni d’igi dei ma va nga kua d’uo na na,
mi ni d’igi ambur ma a yum ala dragona na,
mi ligin wa,
mi hop wa hayam kahle man suma djivina,
mi vinin wa woyo.
35Suma nga kaka Siyon-na a dala:
Ar murud’um mba a leizi ateid’a,
ti hulong yam suma Babilon-na!
Suma Jerusalem-ma a dala: Ar buzuwei ma djang ngeina,
mi hulong yam suma a nga kaka Babilon-na!
*
36Ni kayam ndata ba, Ma didina mi dala:
Gola! An nga ni ndjun kagu,
an mba ni sak atchugulugu,
an mba ni so alum ma ngol ma Babilon-na woyo,
an mba ni so mbiyo mat ma laud’a woi mi.
37Babilon mba d’i mbut ni d’igi ahina d’a mola na,
mba d’i mbut ni domina hi hânina,
mba d’i mbut ni vama atchapma ki vama sanda,
sa mba mi kak kur ruo mi.
38Suma Babilon-na a mba tchi d’igi azlona na,
a mba gureî d’igi gro azlona na.
39Fata d’od’oka lazid’a,
an mba ni lazi te ma luna,
an mba ni gurud’uzi woi ki süma,
kayam azi le furîd’a.
Bugola, a mba bur sen ma ki irazi fafatna,
a mba zlit akulo d’uo d’a!
An Ma didina ni de na.
40An mba ni i ki sed’ezi ata yima ngata
d’igi a i ki gro tumiyôna na,
d’igi a i gamlâna ki mbekmberena na mi.
Hor ma tchi ma yam Babilon-na
41A le ni nana ba, a hle Sesak#51.41 Sesak: Nala, Babilon. ke!
Azi ma suma yam andagad’ina pet a suburuma, a hlum wa!
A le ni nana ba,
Babilon ti mbut djona aduk andjaf suma ge!
42Alum ma ngolâ mi hlup wa Babilon kä,
abil mam ma tetengâ, mi hlubut wa kä.
43Azì mat ma nglona mi mbut wa djona,
ti mbut wa ambas sa so d’a gangras sa hur fulîd’a,
nambas sa sa nga mi kak kua
d’oze sa nga mi kal kua d’uo d’a!
44An mba ni ngop Bel alo ma avo Babilon-na,
an mba ni pat vama mi ligima woi avunamu,
andjaf suma a mba i gevem mbuo d’a.
Gulumun ma Babilon-na tamba
mi to wa kä woyo.
45Agi sum mana, agi buzugugi woi kurud’u,
ar nge nge pî mi sut tam mbei
avok ayî man ma bibiliuna.
46Ar vunadigagi d’i pat ti, ar agi lagi mandarâ abo gandjau d’a mba d’i le kur ambasid’a d’i. Kayam biza d’a wanda, gandjaud’a mba d’i le kur ambasa; biza d’a avok hid’a, gandjaud’a mba d’i le kua d’ei, murud’umba mba d’i te yam ambasa, ma te yamba mba mi tchol dur ki ma te yam ma dingâ mi.
47Kayam ndata, burâ nga mi mba, kur bur máma
an mba ni mba á ngop filei ma tchet ma avo Babilon-na.
Ambas mamba mba d’i mbut zulona ki zla tat pet,
mat suma a tchazina pet a mba sam kä hur azina.
48Akulod’a kandagad’a kahle suma kuruzina pet,
a mba hle sawal la furîd’a yam Babilon,
kayam suma b’lak yina a tcholï abo ma norâ, a mba kad’u.
An Ma didina ni de na.
*
49Ma djok vuna mi dala:
D’igi Babilon ti tchi suma ablaud’a yam andagad’a pet na,
ar ti puk kä yam tchi d’a ti tchi Israel-lîd’a na mi.
50Agi suma sud’ugi woi avun ayînina, agi igiya,
ar agi tchologi ka hî go d’i.
Sä ata yima deina, agi djib’eregi yam Ma didina,
ar humagi gagi yam Jerusalem mi.
*
51Suma hAlonina a dala:
Zulona mi vami
yam ngul la a nga ngulumid’a.
Zulona mi vami kekei,
kayam andjaf suma dingâ a mba,
a tchuk kur gong nga a tinit
irat vata hi Ma didinid’a.
*
52Ma didina mi dala:
Ni kayam ndata ba, burâ nga mi mba,
kur bur máma an mba ni mba á ngop
filei ma tchet ma Babilon-na.
Suma kur ambas mambina pet
a mba hum oîd’a hi suma a fe dakina.
53Ladjï Babilon ti djak gak ti i akulo,
ladjï ti min azì mat ma ad’eng ma ngunguna
gak nga mi giget tuo pî,
suma b’lak yina a mba durut yam vun man ma hed’a.
An Ma didina ni de na.
*
54Ma djok vuna mi dala:
A mba hum del la tchina avo Babilon,
ni siwel la yam b’lak ka ngol la ti tcholï yam ambas matid’a.
55Kayam Ma didina nga mi b’lak Babilon ndeyo,
nga mi seng vunazi ma tchi wü na.
Suma b’lak yina delezi nga d’i b’ik kä b’ib’ik
d’igi abilâ halum ma ngolîna
vunam nga mi tchi wü na.
56Ma b’lak yina nga mi djï yam Babilon,
grang matna a nga yoziya,
agu yeû mazid’a nga d’i kus seyo.
Kayam Ma didina nAlo ma mi we á sä atchugulina,
nga mi wurak nge nge pî yam sun mam mba mi lata.
57An mba ni gurut mat suma nglona, mat suma ned’a, mat suma te yamba, mat suma nglo suma ka sariyad’a ki grang matna. Sum ndazina a mba bur sen ma ki irazi fafatna, a mba zlit akulo d’uo d’a. An amul ma simiyên ala Ma didin ma ad’engên kal petna na ni de na.
58Ma didin ma ad’engêm kal petna mi de kua ala:
Gulumun ma ngol ma Babilon ma bubud’a
a mba hôm kä woi ki zla tam pet.
Vun agrek mat ma fuyogeina a mba ngalam mbei kakud’a.
Suma a tchi tazi á le sunda ni hawa na,
andjaf suma a kau tazi ni makud’a mi.
Sun nda a gat avun alum ma Efrat-nid’a
59Wana ni vun ma he ma ma djok vun Alona Jeremi mi hum mi Seraya Neriya gorom ma Mäseya gorom ngolonina, kid’a nga mi i Babilon zlapa ki Sedekiyas amul ma Juda-na kur biza d’a fid’i d’a mam nga mi tamulid’a. Seraya ni ma ngolâ hi azigar suma avo hamulîna. 60Jeremi mi b’ir ndak ka mba d’i mba yam Babilon-nda kä kur mbaktumba pet, nala, zla d’a pet ta mi b’irit kä yam Babilon-nda. 61Jeremi mi de mi Seraya ala: Le ang mbaza wa Babilon-nu ni, ang ve tang ad’enga á ndum zla d’a kur mbaktum ndatid’a woi djivi tetet. 62Bugola, ang dala: Ma didina, ni ang ba de zlad’a yam yima wana ala a mba b’lagam mbeyo, ar sa d’oze d’uwar mi kak kua d’i, wani mi arî djona ki iram fafat.
63Le ang dap wa mbaktumba ndumba da ni, ang djin mbaktum ndata zlapa kahinad’a, ang gat aduk alum ma Efrat-na, 64ang dala: Babilon mba d’i hlup kä hina dedege, mba d’i tchol akulo abo ndak ka an mba ni mbattchi kata d’i, wani mba d’i puk kä, mba d’i dap peyo.
Zla d’a ded’a hi Jeremi-d’a dap da’.
Currently Selected:
Jeremi 51: BA
Highlight
Copy
Compare
Share
Want to have your highlights saved across all your devices? Sign up or sign in
Azumeina Bible © Alliance Biblique du Tchad, 1999.
