Jeremi 31
31
*
1Ma didina mi dala: Fata yina ndaka, an mba ni arî Alona handjafâ hi Israel-lîna pet, azi tazid’a a mba mbut ni sum mana mi.
Hulonga hi Israel suma a sut teina
2Ma didina mi dala:
An we hohowa suma a sut tei
avun ayînina abagei hur fulâ.
Israel-lâ a nga i ata yi mazi ma tuk tad’a.
3Ma didina mi tagan tam adjeu dei mi dan ala:
An le ka’î ki o d’a bei dabid’a.
Kayam ndata, an nga ni tagak we hohou manda.
4Ndak gor wei d’a Israel-la,
an mba ni hulongôk blangâk ma adjeuna,
ndak mba min tak ki daliyâ mak ka djifâ min nda dinga kua
á nde ndjongâ aduk suma a nga lü ndjongâ ki furîd’ina.
5Ndak mba d’i pe guguzlu maka yam ahuniyô suma Samari-na.
Suma ped’a a mba pad’u,
a mba dud’ut vud’ut mi.
6Bur ma dingâ nga mba.
Kur bur máma suma ndjol suma akulo
yam ahuniyô suma Efraim-mina a mba yi akulo ala:
Agi tchologi akulo,
i djagei akulo Siyon gen Ma didina Alo meina.
*
7Kayam Ma didina mi dala:
Agi hlagi sawal la furîd’a yam suma hi Jakob-ma,
agi hlagi sawala yam andjaf ma ngol ma kal teglesâ,
agi eregi ad’ugi akulo,
agi gilegiziya, agi dagi woi ala:
Ma didina, ang sut mang suma Israel-lâ ad’uzi d’a ara.
8Gola! An nga ni hulongî ki sed’ezi abo ma norâ,
an mba ni togozi avun dabid’a handagad’id’a.
Suma duka ki suma dileîd’a,
arop suma wirâ ki suma huruzi nga tazi á vutina,
ki zla tazi pet a mba tok tok ka ngola ka hî.
9Azi mba mba ki tchina.
An mba ni b’lengêzi huruziya,
an mba ni i ki sed’ezi avun toliyon nda mbina
ki lovot ta papana d’a azi mba puk kä kua d’uo d’a.
Kayam an ni Israel Abumu, Efraim ni goron ma ngolâ mi.
*
10Agi andjaf suma, agi humugi zlad’a hi Ma didinid’a,
agi i dagi zla ndata woi
mi suma a nga kaka yam tila ata yima dedeinina,
agi dazi ala:
Ma didin ma mi ndjoî Israel-lâ woina,
nga mi togozïya, nga mi ngomozi
d’igi ma pola mi ngom tumiyô mama na.
11Kayam Ma didina mi tchuk Israel-lâ akulo,
mi prud’uzi woi abo mazi suma djangû suma kalazi kad’engina.
12Azi mba mba yam yima nding ma Siyon-na
ki sawal la furîd’a,
tazi mba d’i lazi djivid’a
yam ahle suma a mba fazi abo Ma didinina,
nala, gemena, süm guguzlu d’a awilid’a, mbulâ,
tumiyôna, b’ogeina kamuzleina mi.
Azi mba mbut ni d’igi asine ma a nga rabam mbinina na.
Va mba mi mbud’uzi mandar bugol luo d’a.
13Ata yi máma
yuguneina a mba buzuk ndjongâ ki furîd’a,
gro azungeîna ki momorogeina a mba le na mi.
Ma didina mi dala:
Yor ta mazid’a, an mba ni mbud’ut aîd’a,
an mba ni b’lengêzi huruziya,
an mba ni vragazi hur ma hapma balum hur mazi ma wurana.
14An mba ni hop man suma ngat buzuna
ki mbul ahle suma a tchazina,
an mba ni hop sum mana
kahle man suma djivi suma kalâ mi.
*
15Ma didina mi dala:
A hum dela avo Rama.
Ni hor ma tchina, ni tchi ma hat hurâ mi.
Rachel nga d’i tchi yam grotna,
ti noî b’leng hur ma suma a b’lengêt tchina yam grotna,
kayam a bo da’.
16Wani Ma didina mi de kua ala:
Ndak ba tchina, ndak set simina irak keyo.
Kayam an nga ni wuragak yam sun maka.
An Ma didina ni de na.
Gro’â a mba tcholï avo hi mazi suma djangûna, a mba mba.
17Ma didina mi de kua ala:
Hur ma tinda mi nga yam andjavagu;
gro’â a mba mba yam ambas mazid’a.
18An hum tchina hi suma Efraim-ma.
Gagazi, a nga tchi ala:
Ma didina, ang gad’ami ki gat ta ad’enga
d’igi a gat amuhl ma azong ma bei hatina na.
Wani ang vami atang
tala ami hulongômi geveng gagazi d’a,
kayam angî Ma didina Alo mamina.
19Gagazi, ata yima ami hang huyogomina,
ami mbud’umi hurumiya.
Ang tagami tcho mamid’a.
Ki tchetchemba, ami nga tchami abomi kurumiya,
ami mbud’umi zulona,
ami tchugumi susub’ok yam tcho
d’a ami lat kazungeî tamid’a.
20Ma didina mi dala:
Efraim goron ma an le kam heîna
ni goron ma tan lan djivid’a kama.
Ata yima lara ma an nga ni ngoboma,
an nga ni djib’er kam teteu,
an nga ni hat hurun kam ngola,
an nga ni ar bei wum hohowom mbi.
*
21Ma didina mi dala:
Ndak gor wei d’a Israel-la,
ndak pe vama tak lovota,
ndak pagu ma tak lovota,
Ndak djib’er yam lovot maka,
yam lovot ta lara d’a ndak tit kua adjeud’a.
Ndak hulongîya,
ndak hulongî kur azì mak ma nglona.
22Ndak gor wei d’a bei hum vuna ba d’a,
ni mindja ba, ndak mba d’i ar tcha mak ka tatad’a woi ge?
Kayam an Ma didina ni min nga vama awilina yam andagad’a,
natchad’a ba, mba d’i hal mandjufâ.
Ma didina mba mi djin vunam djin nda awilid’a
23Ma didin ma ad’engêm kal petna, Alona hi Israel-lîna, mi dala: Fata an hulongôzï woi kur magombid’a, a mba de yam ambas sa Juda-d’a kazì mat ma nglona ala:
Yima kak ma d’ingêrâ,
ahina d’a a tinit irat vata,
ar Ma didina mi b’e vunam kagu!
24Ata yi máma suma abagei kelâ ki suma kur azì ma nglo ma Juda-na a mba kak kur ambasa zlapa tu ki suma zuma ki suma a nga tit ki d’uwarîna mi. 25Kayam an mba ni had’enga mi suma a seîna, an mba ni hop suma a nga lá matnina mi.
26Ni kayam ndata ba, an Jeremi ni dala: Ata yima an zlit akulona, sen mana mi djivid’a iran heî!
27Ma didina mi dala: Gola! Burâ nga mi mba an mba ni zar suma ki d’uwarâ kur azì ma Israel-lâ kur azì ma Juda-na d’igi sana mi zar awuna kur asinena na. 28D’igi an tin iran kazi avok á pad’azi woi á tozi woi á b’lagazi woi á dabazi woi á lazi tchod’a na, an mba ni tin iran kazi á minizi akulo, á pazi ka hina dedege mi. An Ma didina ni de na. 29Kur bur máma sa mba mi dala:
Abuyod’a a te guguzlu d’a bei ned’a,
grod’a siyazi mi zleyâ
d’uo d’a. 30Wani nge nge pî mba mi mit ni yam tcho mamba tata. Sama lara ma mba mi te guguzlu d’a bei ned’ina, siyam mba mi zleyâ.
31Ma didina mi dala: Gola! Burâ nga mi mba. Kur bur máma an mba ni djin vunan djin nda awilid’a ki Israel-lâ ki suma Juda-na mi. 32Vun ma djin máma nga ni d’igi vun ma djin ma an djinim kabuyozi ngolo kur bur ma an vazi abozi ni buzuguzï woi kur ambas sa Ezipte-nid’ina na d’i. Vun ma djin máma, an ni salazina pî, azi bud’um mbeyo. An Ma didina ni de na.
33Ma didina mi de kua ala: Wana ni vun ma djin ma an mba ni djinim ki Israel-lâ bugol bur mámina: An mba ni tin gat manda kuruziya, an mba ni b’irit krovo kur mugulazi mi. An mba ni ka’î Alo mazina, azi mba ka’î sum mana mi. 34Sa mba mi dok hat ndram mboze mba mi de wiyema ala: Ang we Ma didina na nga d’i, kayam azi pet a mba wanu, tin ad’ud’a ata suma yâna dei gak mba yam suma gangrangâ. An Ma didina ni de na. Kayam an mba ni vat hurun ndei yam tchila mazid’a, an mba ni djib’er yam tcho mazid’a d’uo d’a.
*
35Wana ni zlad’a hi Ma didin ma hafata á b’o yina faleina,
ni ma he gata mi tilâ ki tchitchiud’a á b’o yina andjegena,
ni ma nga mi zut alum ma ngolâ
nga mi lum abilim á tchina mi na.
Simiyêm ala Ma didin ma ad’engêm kal petna.
36Ma didina mi dala:
Ladjï gat ta an hat mahlena ndata ti dap pei avoronu ni,
andjafâ hi Israel-lîna pî
mba mi kak andjafâ avoron gak didin nduo mi.
37Ma didina mi de kua ala:
Ladjï sana mi ndak á nga fiyak ka akulod’a
d’oze mi fek ad’u ged’a handagad’id’a ni,
an pî ni mba mi tchuk andjafâ hi Israel-lîna woi
yam tcho d’a azi lata na mi.
*
38Ma didina mi de kua ala: Gola! Burâ nga mi mba. Kur bur máma a mba hulong min azì ma ngolâ akulo yam an Ma didina. Mba tinï ad’ud’a ata gong nga fiyak ka akulod’a hi Hananel-la yam gulumun ma ngui azì ma ngolîna dei gak mba ata vun agrek ma gulumuna mi kong kuana. 39Ziyo ma ngad’a a mba ndirim aduk d’ingêr gak mi ndeza yam yima nding ma Garep-ma, mi kong gak mi i Gowa. 40Hor ra a tchuk matna kuad’a pet ki yima butna ki yima hawa ma i gak avun toliyon nda Kedron-nda gak mi ndeza ata yima gulumuna kong kua ma avun Agre’â hAkulumeina ma abo ma yorogonina pet, a mba tinim iram vam mi an Ma didina. Bugola, vama mba pad’am mbei d’oze mba mi hôm mbeina nga d’uo gak didin.
Currently Selected:
Jeremi 31: BA
Highlight
Copy
Compare
Share
Want to have your highlights saved across all your devices? Sign up or sign in
Azumeina Bible © Alliance Biblique du Tchad, 1999.
