Jeremi 29
29
Jeremi mi b’ir mbaktumba mi suma a yozi magombina
1Wana ni mbaktum mba ma djok vun Alona Jeremi mi b’irit avo Jerusalem mi sunut mi suma nglona, suma ngat buzuna, suma djok vuna ki suma pet suma Nebukanezar mi yozi avo Jerusalem mi izi magomba Babilon-na. 2Mi sun mbaktum ndata ni bugol la amulâ Jekoniya kasum ki suma sunda ki suma nglo suma Juda-na ki suma Jerusalem-ma ki suma d’alâ ki suma tchafa a ar Jerusalem dad’a. 3Mi he mbaktum ndata abo Elasa Safan goroma ki Gemariya Hilkiya goroma suma Sedekiyas amul ma Juda-na mi sunuzi gen Nebukanezar amul ma Babilon-nina. Mi de kur ala: 4Ma didin ma ad’engêm kal petna, Alona hi Israel-lîna, mi dala: Ang de mi suma pet suma an yozï Jerusalem ni izi magomba Babilon-na ala: 5Agi minigi azina, agi kagagi kuru; agi pagi aguna hur asinena, agi tagizi vud’umu; 6agi vigigi aropma, agi vud’ugi gro andjofâ ki gro aropma; agi vigigi grogina aropma, agi hagi grogi suma aropma ndjufâ, ar azi vut gro andjofâ ki gro aropma. Agi zulugi ata yima agi nga kuana, ar agi feyêgi d’i. 7Agi halagi b’leng nga halasa yam azì ma an igi magomba kuana, agi tchenegi an Ma didina kamu. Le azì máma mi kak lafiya ni, agi mba kagagi ki halasa mi.
8Ma didin ma ad’engêm kal petna, Alona hi Israel-lîna, mi de kua ala: Ar suma djok vun suma a nga adigagina ki suma a nga de zlad’a yam vama nga mi mbana a vid’igi woi d’i, ar agi tinigi humagi yam suma a nga vagi ad’u adïd’ina d’uo mi. 9Ma didina mi dala: Azi nga djogogi vun ma ka zlad’a ki simiyênu, wani an sunuzi nga d’i.
10Gola! Ma didina mi dala: Fata biza d’a dok kid’iziya d’a ngat yam Babilon-nda ndaka, an mba ni mba á d’ugiya, an mba ni ndak vun zla d’a djivi d’a an hlagi vunan kata, an mba ni mbagi ka hî. 11Ma didina mi dala: An we nga hur ma an ngam kagina. Ni nga hur ma halasâ, nga ni ndaka d’i, á hagi vama djivi ma nga mi mba ma agi mba tinigi hurugi kama. 12Ata yi máma, le agi yanu, le agi tchenenu ni, an mba ni humugiya. 13Agi mba halanu, agi mba fanu, kayam agi mba halan ki hur ma tuna. 14Ma didina mi dala: An mba ni tak tan ndei iragiya, an mba ni buzugugï woi kur magomba, an mba ni togogi woi aduk andjaf suma pet ata yima lara ma an ndjoyôgi woi kuana, an mba ni hulongôgï ka hî ata yima an yogi ni igi magomba woi kuana. An Ma didina ni de na.
15Ma didina mi dagi hina kayam agi nga dagi ala: Ma didina mi tcholei suma djok vuna avo Babilon ka hî.
16Wana ni zla d’a Ma didina mi dat yam amul ma nga kaka yam zlam mba amula hi David-tina, yam suma pet suma a nga kaka Jerusalem-ma, yam b’oziyogi suma a izi nga magomba ki sed’egi d’uo na. 17Ma didin ma ad’engêm kal petna mi dala: Gola! An nga ni sun ayî ma durâ ki baktarad’a ki tugud’ei d’a tcho d’a tchi matna kaziya, an mba ni mbud’uzi d’igi tulum ma tchim ma tcho ma sana mi ndak á tum mbuo na na. 18An mba ni digizi kayî ma durâ ki baktarad’a ki tugud’ei d’a tcho d’a tchi matna, an mba ni mbud’uzi vama mandarâ ir suma a nga kur leu d’a yam andagad’ina pet, an mba ni mbud’uzi vama ge vuna, vama atchapma, vama sanda ki vama ngula aduk andjaf suma pet suma an mba ni ndjoyôzi woi kuana. 19Ma didina mi dala: An nga ni le hina kayam azi hum nga zla d’a an sunuzizï avun azungeî man suma djok vun suma an nga ni sunuzizi kur bur ma lara ge petnid’a d’i.
20Wani agi suma an yogi Jerusalem ni igi magomba Babilon-na, agi humugi zlad’a hi an Ma didinid’a.
21Wana ni zla d’a Ma didin ma ad’engêm kal petna, Alona hi Israel-lîna, mi dat yam Ahap Kolaya goroma ki Sedekiyas Mäseya goroma suma a nga djok vun ma ka zlad’a ki simiyêma. Mi dala: An mba ni hazi abo Nebukanezar amul ma Babilon-na. Mam mba mi tchazi kä iragiya. 22Suma Juda suma a yozi a izi magomba Babilon-na a mba ge vuna mi suma ki simiyêzi ala: Ar Ma didina mi lang d’igi Sedekiyas azi ki Ahap suma amul ma Babilon-na mi ngalazi kakud’ina na! 23Kayam azi le sun nda tchod’a aduk Israel-lâ, a le mizeuna karopma hi ndrozinina, a de zla d’a ka d’a an hazi nga vuna kat tuo d’a ki simiyênu. An ni we, an ni glangâsâ. An Ma didina ni de na.
Mbaktum mba Semaya mi b’irita
24-25Ma didin ma ad’engêm kal petna, Alona hi Israel-lîna, mi de mi Jeremi ala mi de zlad’a mi Semaya ma Nehelam-ma, kayam Semaya mi sun wa mbaktumba ki simiyêm mam tamba mi suma Jerusalem-ma pet, mi Sofoni Mäseya gorom ma ngat buzuna ki suma ngat buzuna pet mi, mi dala: 26Ma didina mi tining ma ngat buzuna balum Jehojada ma ngat buzuna, ni kayambala ang tin irang kur gong nga kud’ora hi Ma didinid’a yam sama lara ma mi kaï guruta mi yi tam ala mam mi ma djok vun Alona na, ang gum aleina asemu, ang tchugum erdje ma kaweina kelem mi d’a. 27Ki tchetchemba, ni kayam me ba, ang ar Jeremi ma Anatot ma mi yi tam ala mam mi ma djok vun magina na, bei ngopa ge? 28Ni mam ba, mi sunumi mbaktumba Babilon ala: Agi mba kagagi tatâ kur magom magid’a. Agi minigi azina, agi kagagi kuru; agi pagi aguna hur asinena, agi tagizi vud’umu.
29Ma ngat buzuna Sofoni mi ndum mbaktum ndata avok ma djok vun Alona Jeremi. 30Ata yi máma Ma didina mi de mi Jeremi ala: 31Ang sun de mi suma a yozi magombina pet ala: Ma didina mi de yam Semaya ma Nehelam-ma ala: Semaya mi djogogi vuna ni bei an sunum ba, mi zud’ugi á tinigi hurugi yam zla d’a kad’a. 32Ni kayam ndata ba, an Ma didina ni dala: An mba ni mba á ngop Semaya kandjavamu. Sa mam mba mi kak adigagi á we djivi d’a an mba ni lat mi sum manid’a d’i, kayam mam zut sum mana á kak djangûna ki sed’enu.
Currently Selected:
Jeremi 29: BA
Highlight
Copy
Compare
Share
Want to have your highlights saved across all your devices? Sign up or sign in
Azumeina Bible © Alliance Biblique du Tchad, 1999.
