Jeremi 20
20
A galeina asem Jeremi
1Ma ngat buzuna Pasehur Imer gorom ma ngol ma yam gong nga kud’ora hi Ma didinid’ina mi hum zla djok vun ma Jeremi nga mi djogoma. 2Ata yi máma mi to Jeremi, mi vum mi gum aleina asem avun agrek ma akulo nding ma Benjamin ma kur gong nga kud’ora hi Ma didinid’ina. 3Tcha ndjivinda, Pasehur mi galeina asem Jeremi woyo. Jeremi mi dum ala: Ma didina nga mi yang ala Pasehur ruo d’a, wani nga mi yang ala Mandarâ mi ngui ata yina pet. 4Kayam Ma didina mi dala: Gola! An mba ni mbud’ung ang tanga mandarâ ki buniyôngâ pet mi. Mazi suma djangûna a mba tchazi avun ayîna, ang mba wazi ki irangû. An mba ni he suma Juda-na pet abo amul ma Babilon-na. Mba mi yozi magomba, mba mi i ki sed’ezi Babilon, mba mi tchazi ki mbigeu d’a fiyaka mi. 5An mba ni he ndjondjoî d’a kur azì mámid’a pet kahle suma azi fazina pet kahle mazi suma guzuzi kal teglesâ zlapa ki ndjondjoîd’a hamuleinid’a pet abo mazi suma djangûna. A mba hurumuziya, a mba yozi a i ki sed’ezi Babilon. 6Wani ang tang Pasehur ki suma a nga kaka avo hatangâ pet, a mba yogi magomba, a mba ing Babilon. Ang mba mit sä kua, a mba tozong sä kua zlapa ki buniyông suma ang djogozi vun ma ka zlad’ina pet mi.
Jeremi nga mi tchi yam Alona
7Jeremi mi de mAlona ala:
Ma didina, ang lobonu,
ang vanu, ang kal kan kad’enga.
An mbut ni vama sanda burâ ki burâ,
suma pet a nga lazan mi.
8Ata yima lara ma an de zlad’ina,
an erï ad’un akulo mbeî ala:
Murud’umba ki djop vuna a mba.
Kayam ndata, zlad’a hi ang Ma didinid’a,
ti mbut ni vama ngula ki vama sanda kan burâ pet.
9Le an dala: An min dang zlang ngei d’uo,
an min de zlad’a ki simiyêng nguo d’angû ni,
gol wani, hurun nga mi ngalan d’igi akud’a na,
ti nga d’i ngalan aduk asogonu,
an kau á vad’u, an ndak á ve tan nduo mi.
10An hum ndjak vuna hi suma ablaud’a ala:
Ar mandarâ mi nguyum ata yina pet.
A nga de tazi ala: Agi dumu! Ei dumu!
Buniyôn suma kokodjona pet a nga djup puk manda,
a nga dala: Ei i lobomu, dam ei mba kuzï kamu,
ei mba hlei atchuguli ki sed’em mi.
11Wani Ma didina, angî ma sib’ika,
angî ma dur kana.
Kayam ndata, suma a nga djobon vunana a mba puk kä.
Azi mba kus kan ndi,
azi mba tchuk susub’ok abo kus sa azi kus nga kan nduo d’a,
azi mba mbut zulona burâ ki burâ.
Ni zulo ma sa mba mi mar kam mbuo na mi.
12Ma didin ma ad’engêng kal petna,
angî ma kuk hur suma d’ingêrîna,
angî ma fek hur sana ki djib’era hi sanid’ina.
An mba ni we atchugul la ang mba sazizid’a,
kayam an ar zla manda nabongû.
13Agi suma, agi hlagi sawala mi Ma didina,
agi gilemu,
kayam mi prut suma hohoud’a woi
abo suma a nga lazi tchod’ina.
*
14Jeremi mi de kua ala:
Ar a ge vuna mi bur ma an vut kurâ,
ar sa mi b’e vuna yam bur ma asun ndi vud’un kuana d’i.
15Ar a ge vuna mi sama mi i de zlad’a mabun ala:
A vud’ung ini gor mandjufâ,
ar tang lang djivid’a na.
16Ar sa máma mi mbut ni
d’igi azì ma nglo ma Ma didina mi b’lagam mbei
bei mi wum hohowom ba na na,
ar mi hum tchina ki yorogod’a,
ar mi hum tau d’a ayîna ki falei d’ad’ar mi.
17Ladjï Alona mi tchandja kur asun bei vuta go ni,
hotei!
Ladjï asun ndi ar wa ni d’igi asuwan na ni,
hotei!
Ladjï an baza kur asun ki iran fafad’u ni,
hotei!
18Ni kayam me ba, an nde woi kur asun
á fe ndaka ki pupuluka
á dap burun kur zulona na ge?
Currently Selected:
Jeremi 20: BA
Highlight
Copy
Compare
Share
Want to have your highlights saved across all your devices? Sign up or sign in
Azumeina Bible © Alliance Biblique du Tchad, 1999.
