Jeremi 15
15
*
1Ma didina mi dan ala: Le Moise azi ki Samuel a mba avoron á tchenen yam sum ndazina ni azi pî, tan mba d’i lan djivid’a yam sum ndazina d’i. Ang digizi sä woi dei avoronu, arazi a iya! 2Le a djobong ala: Ami imi ni lara ge ni, ang hulong dazi ala: Gola! Ma didina mi dala:
Nge nge pî mi nga ki vama a ngamzi kama:
Suma a ngazi tugud’ei d’a tchi matna kazina,
ti mba d’i tchaziya;
suma a ngazi ayî ma durâ kazina,
a mba tchazi avun ayî ma durâ;
suma a ngazi baktarad’a kazina,
mba d’i tchaziya;
suma a ngazi magomba kazina,
a mba yozi magomba mi.
3Ma didina mi dala: An mba ná ngobozi kahlena fid’i: A mba tchazi avun ayîna ki mbigeu d’a fiyaka, adureina a mba tanaziya, aluwei suma akulona kamburei suma abageina a mba kizagazi á b’lagazi woyo. 4An mba ni ndjoyôzi woi kur leu d’a yam andagad’id’a vivreng, yam sun nda tcho d’a Manase Ezekiyas goroma amul ma Juda-na mi lat avo Jerusalem-mba.
Ma didina mi dala: An kau wa
5Ma didina mi dala: Ndak Jerusalem,
ni nge ba, mba mi wak hohowok ke?
Ni nge ba, mba mi tchi horâ kak ke?
Ni nge ba, mba mi djop kak ala
ndak nga ni hawa ko zi ge ge?
6Ma didina mi dala: Ni ndak ba, noyôn ndeyo,
ndak han huyogogu.
Kayam ndata, an mba á b’lagak keyo,
kayam an kau wa abo djivi d’a an laksid’a.
7Kur azì ma nglo ma lara ma kur ambasina,
an sirizi woi d’igi suma a sir awuna na,
an dabazi grozina woyo, an dap sum mana woyo,
wani azi wal nga ki sun mazi d’a tcho ndata d’i.
8An zul arop suma modonod’a avo hatazi
kal les ma avun alum ma ngolîna,
an tin grangâ asum tchina falei d’ad’ar,
an mba ki ndaka kahle suma mandarâ kat atogo zak mi.
9Gro yogod’a kid’iziya suma tchazina asuzi
ti nde tcha tata abo hur ma hata,
ti seyâ, ti mid’a,
afat mata ti nik kä ni falei tua,
kayam ni vama zulona kad’u,
blangât mi sil lei mi.
Suma a arâ, an mba ni hazi abo mazi suma djangûna,
a mba tchazi woi avun ayîna mi.
Jeremi nga mi tchiya; Alona nga mi hum ad’enga
10Jeremi mi dala: Asunu, ni zla d’a hohoud’a kanu,
kayam ndak vud’un sama yalâ sama huneîd’a kur ambas ndata pet!
An he nga va mi sa ki mbiyom mbi,
an ve nga vama mbiyo abo sa d’uo mi.
Wan pî, suma pet a nga ngulunu.
11Ma didina, le an lang nga sun nda djivid’a
ki hur ma tuna d’uo,
le an tcheneng nga yam man suma djangûna
ata yima azi nga kur ndaka ki kid’eî irana d’uo ni,
ar azi ngulunu.
12Na ni sana mi ndak á kus kawei ma wura ma tcholï abo ma norîna
d’oze kawei ma hleuna woi zu?
13Ma didina mi dala: Agi suma Juda-na,
an mba ni he lovota mi suma á hurum bege magid’a
ki ndjondjoî magid’a hawa
yam tcho d’a agi lat kur ambas magid’a peta.
14An mba ni he lovota mi magi suma djangûna
á i ki sed’egi magomba kur ambas sa agi wat nga yagi tu d’uo d’a,
kayam ayî mana mi fo wa akud’a,
mba mi ngalagi woyo.
15Jeremi mi dala: Ma didina, ang we pet,
ang djib’er kanu, ang mbeï ndjununu,
ang san atchugulun ki man suma a nga djobon vunana.
Ar ang hlan ndei d’i,
kayam hurung nga mi zal atogo d’i.
Ang we ni kayam ang ba,
an nga ni ve tan kur ngula wana.
16Ma didina Alo ma ad’engêng kal petna,
ata yima an fe zla mangina, an tad’u.
Zla manga ti mbut hur ma hapma ki furîd’a kurunu,
kayam a nga yan ki simiyêngû.
17An kak nga aduk toka hi suma las suma
á san ki sed’ezi d’i.
Kayam ad’eng manga, an kak kei van tu,
kayam ang oyôn kayî mangâ.
18Ni kayam me ba,
ndak manda nga d’i i avogovok ke?
Ni kayam me ba,
mbil man ma bei tchila ba na mi min tchil luo ge?
Ang mba mbut kan ni d’igi mbiyo ma lau
ma lobon irana na,
d’oze d’igi mbiyo ma lau
ma sa nga mi tin hurum kam mbuo na na zu?
19Ma didina mi hulongôn humba ala:
Le ang hulongî gevenu ni,
an hulongông kur sun manda.
Le ba ang de ni zla d’a hawa yaka d’uo ba,
ang de ni zla d’a ndaka ni,
ang mba mbut ni vunan ma ad’u kä na.
Ni suma Juda-na ba, a mba hulongî gevengû,
ni ang ba, mba hulong gevezi d’i.
20Ma didina mi de kua ala:
An mba ni mbud’ungî d’igi gulumun ma kawei ma hleu
ma ad’eng ma ngunguna na avoroziya.
Azi mba durung ayîna, azi mba lang va d’i,
kayam an nga ki sed’eng á sud’ungû,
á prud’ung ngei mi.
21An mba ni prud’ung ngei
abo suma asa’at ndazina,
an mba ni gang akulo woi
abo suma a nga te yam suma kad’engina mi.
Currently Selected:
Jeremi 15: BA
Highlight
Copy
Compare
Share
Want to have your highlights saved across all your devices? Sign up or sign in
Azumeina Bible © Alliance Biblique du Tchad, 1999.
