Suma ka sariyad’a 13
13
Vuta hi Samson-nda
1Israel-lâ a nde le sun nda ding nga Ma didina tam nga d’i lum djivi kat tuo d’a kua avoromu. Ni kayam ndata ba, Ma didina mi hazi abo suma Filistê-na gak bizad’a dok fid’i.
2Sama ad’u andjafâ hi Dan-na mi nga Sora, a yum ala Manowa; amamba ti ni gendreged’a, ti nga d’i vut ti. 3Malaikana hi Ma didinina mi nde tam mbei ir atcha ndata, mi dat ala: Gola! Nda’î gendreged’a, ndak nga d’i vut ti. Wani ndak mba d’i ve wirâ, ndak mba d’i vut gor mandjufâ. 4Ki tchetchemba, ndak gol tak djiviya, ndak tche süm guguzlu d’oze süm ma ayî d’i, ndak te vama ndjendje d’uo mi, 5kayam ndak nga d’i ve wirâ, ndak mba d’i vut gor mandjufâ, a mba tinim vel kam mbi. Kayam gor máma a mba tinim iram vam mAlona ei ni kuruk dei. Ni mam ba, mba mi tin ad’ud’a á sut Israel-lâ woi abo suma Filistê-na.
6Atcha ndata ti de mi ndjuvut ala: Sana hAlonina mi mbeï gevenu, iramî d’igi ir malaikana hAlonina na; ni vama mandarâ. An djobom nga ala: Ang tcholï ni lara ge d’i, mi tagan nga simiyêm mbuo mi. 7Mi dan ala: Gola! Ndak mba d’i ve wirâ, ndak mba d’i vut gor mandjufâ. Ki tchetchemba, ndak tche süm guguzlu d’oze süm ma ayî d’i, ndak te vama ndjendje d’uo mi. Kayam gor máma a mba tinim iram vam mAlona ei ni kuruk dei gak mat mama.
8Manowa mi tchen Ma didina ala: Salad’a, ar sana hAlona ma ang sunumina mi mbeï gevemi kua, mi had’ami vama ami mba lum ki gor ma a mba vud’um máma.
9Alona mi hum tchenda hi Manowa-d’a, malaikana hAlonina mi mbeï gen atcha ndata kua, ti nga kaka hur asinena kä. Wani ndjuvut Manowa mi nga gevet ti. 10Ti ring atogo zak, ti de mi ndjuvut ala: Gola! Sama mba fata gevena, mi nde wa tam mbei iranu!
11Manowa mi tchol mi i ad’u amamba, mi i gen sa máma, mi dum ala: Angî sama de zlad’a fata katcha d’a wandina zu?
Mi hulong dum ala: Ni anu!
12Manowa mi dum ala: Djiviya! Fata zla manga ndaka, ni gad’a me ba, ami mba tit kat ke? Ami mba lami ni nana ki gor máma ge?
13Malaikana hi Ma didinina mi hulong de mi Manowa ala: Ar atchad’a ti d’el tat yam ahlena pet suma an dat kazina. 14Ti te vud’a guguzlud’a d’uo mi na, ti tche süm guguzlu d’oze süm ma ayî d’uo mi, ti te vama ndjendje d’uo mi. Ar ti ngom tat yam ahlena pet suma an hat vuna kazina.
15Manowa mi de mi malaikana hi Ma didinina ala: Ang humumiya, ang ve tang kei, ami ngad’ang gor ahu b’ëna tu.
16Malaikana hi Ma didinina mi hulong de mi Manowa ala: Le ang d’elen kä wan pî, an mba ni te te mangâ d’i. Wani le ang min he vama ngat buzu ma ngala mi Ma didina ni, ang he! Manowa mi we nga d’ala ni malaikana hi Ma didinina d’a d’i.
17Ata yi máma Manowa mi de mi malaikana hi Ma didinina ala: Simiyêng ana ge? Kayambala fata zla d’a ang data ndaka, ami mba suburungû d’a.
18Malaikana hi Ma didinina mi hulong dum ala: Ni kayam me ba, ang djobon yam simiyên nge? Simi máma ni simi ma atchapma.
19Manowa mi ve gor ahu b’ëna ki he d’a hawad’a, mi hazi vama ngat buzu ma ngala mi Ma didina yam ahinad’a. Ata yima Manowa azi kamamba a nga goloma, malaikana nga mi lahle suma atchapma. 20Ata yima akud’a sinat nga d’i trâ akulo yam yima ngal ahle suma ngat buzuna ti i irat akulo hur alonina, malaikana hi Ma didinina nga mi djak akulo aduk sin akud’a yam yima ngal ahle suma ngat buzuna. Ata yima Manowa azi kamamba a we hina na, a grif kä andaga. 21Malaikana hi Ma didinina mi vit ir Manowa azi kamamba. Ata yi máma Manowa mi wala ni malaikana hi Ma didinina. 22Manowa mi de mamamba ala: Gagazi, ei mba boi ni woyo, kayam ei wei Alona!
23Amamba ti hulong dum ala: Ladjï Ma didina mi min á tchï woyo ni, nga mi ve vama ngat buzu ma ngala ki he d’a hawad’a aboi d’i, nga mi arei ei wei ahlena hina pet toze mi arei ei humî ahle suma atchapma hina d’uo mi.
24Atchad’a hi Manowa-d’a ti vut gor mandjufâ, a yum ala Samson. Mi djengâ, Ma didina mi b’e vunam kamu. 25Muzu’â hi Ma didinina mi nde le sunda ki sed’em avo Mahane-Dan, aduk Sora ki Estawol.
Currently Selected:
Suma ka sariyad’a 13: BA
Highlight
Copy
Compare
Share
Want to have your highlights saved across all your devices? Sign up or sign in
Azumeina Bible © Alliance Biblique du Tchad, 1999.
