Isai 63
63
Ma sä atchugul ma a lum mandarama
1Ni nge ba, mi tcholï Edom kur azì ma ngol ma Bosra-na
ki baru d’a hleud’a ki baru d’a wiled’a atam
nga mi tit ki subur tad’a kad’engêm pet na ge?
Ni an Ma didin ma nga ni de zla d’a gagazid’ina,
ni an ma nga kad’enga á sut sumina.
2Ni kayam me ba, baru mangâ mi mbut hleud’a atang nge?
Ni kayam me ba, mi mbut hleud’a atang
d’igi baruna hi sama mi miret guguzlud’a kä kur zulutna na ge?
3Ni an tu ba, ni miret guguzlud’a ata yi mat ma mireta.
Sa aduk sum mana sa mi nga ki sed’en ndi.
Kayam ndata, kur ayî mana, an mired’ezi kä,
an ndjirebezi woi kur ayî man ma bibiliuna,
buzuwazi mi yam ata baru mana,
mi tub’ak ata baru mana pepet mi.
4Kayam bur ma sä atchugula nga kurun adjeu dei,
biza d’a wurak yam sum manid’a ti mba wa.
5An gol iranu, wani an fe nga sama ndjunun ndi.
An le atchap kayamba sama ndjunun nga d’uo d’a.
Ata yi máma ad’eng manda ti ndjununu,
ayî man ma bibiliuna mi ndjunun mi.
6Kur ayî mana an miret suma kä kasenu,
an gurud’uzi woi kayî man ma bibiliuna,
an vozi buzuwazi kä woi andaga mi.
Djivi d’a Ma didina mi lazizi adjeud’a
7An mba ni de woi yam o d’a bei dabid’a hi Ma didinid’a
ki gile d’a ei gilei Ma didina
yam djivi d’a mi lat ki sed’eid’a.
An mba ni de woi yam djivi mam mba yam Israel-lîd’a,
yam djivi d’a mi lat ki sed’ezid’a ki we hohou mamba
ki o mam mba bei dabi d’a kal teglesa mi.
8Adjeu mi dala: Gagazi, azi ni sum mana,
azi ni gro suma bei ka zlad’a ba na.
Kayam ndata, mam mi ma sud’uzina.
9Kur ndak mazid’a pet mi sun nga sama ding á ndjunuzi d’i,
wani ni mam tamba ba, mi sud’uziya.
Kur o mamba ki we hohou mamba mi ndjunuziya,
mi hlanek mazid’a kamu,
mi zizi akulo ahlabam kur tit mazi d’a fiyaka pet mi.
10Wani azi som vunamu,
a zal hur Muzuk mam ma bei tchod’ina,
mi mbut mazi ma djangûna,
mi mbut sama mi duruzi ayînina mi.
11Ata yi máma sum mama a djib’er
yam bur ma kalâ yam atchogoid’a hi Moise-sa, a dala:
Mam ma mi djagazi alum ma ngolâ woi ma polozina,
mi nga ni lara ge?
Ma mi tin Muzuk mam ma bei tchod’a adigazina,
mi nga ni lara mi ge?
12Mam ma mi tit yam bik ka ndjufa hi Moise-sa
ki sib’ik mambina mi nga ni lara ge?
Ni mam ma wal mbina woi aduk mbà avorozi
tala simiyêm mi yi gak didinu d’a.
13Ni mam ma djagazi alum ma galileina
d’igi akulum ma mi djang hur fulâ
bei asem mi dap mi puk kä ba na na na.
14A nga sulugot kä kur hora
d’igi amuzleina a sulugot kä ata yima hatna na,
Muzu’â hi Ma didinina nga tinizi ata yima tuk tad’a.
Hina mi, Ma didina, ang tin sum mangâ
kayam simiyêng mi fe subura kaziya.
Tchen nda hud’a
15Ang ma sä kaka akulo
ata yi mang ma ang tinim iram vam ma suburina,
ang golï irang kä.
Zlezleû manga ki djivi manga a nga ni lara ge?
Ang ar bei hat hurung kan bei wan hohowon nana ge?
16Kayam angî Abumiya.
Abraham mi wami nga d’i,
Israel ko mi wami nga d’ala ami ni na d’a d’uo mi.
Ni ang Ma didina tu ba, nAbumiya,
ni ang ma yang kad’u tinda dedei ala
Mami ma sutä na.
17Ma didina, ni kayam me ba,
ang arami ami vid’imi woi hina dei ki gat manga ge?
Ni kayam me ba, ang b’alami hurumi
hina kiki á lang mandarang nge?
Ang hulongî yam azungeî mangâ,
yam andjaf ma ang tum djonina mi.
18Ami mang suma yed’etna ami kagami
yam ambasa ni hina ndjö.
Mami suma djangûna a miret
yi mang ma a tinim iram vama kä kaseziya.
19Ami lami biza d’a ablaud’a
ni d’igi suma ang te nga kazi yang tu d’uo na na,
d’igi suma a yazi nga ki simiyêng yazi tu d’uo na na mi!
Wani ladjï ang haû nakulod’a woyo,
ladjï ang tchugï naseng kä ni,
ahuniyôna a giget wa avorongû!
Currently Selected:
Isai 63: BA
Highlight
Copy
Compare
Share
Want to have your highlights saved across all your devices? Sign up or sign in
Azumeina Bible © Alliance Biblique du Tchad, 1999.
