Isai 34
34
Sariya d’a a kat yam Edom-mba
1Agi andjaf suma, agi hud’ï go á humba
agi suma, agi tinigi humagiya.
Ar andagad’a kahle suma kurutna pet a huma,
ar duniyad’a kahle suma a nga kurutna pet a hum mi.
2Kayam Ma didina hurum mi zal yam andjaf suma pet,
hur mam ma zal ma gugulu’â mi nga yam azigar mazina mi.
Mi nga hurum á dabazi woyo,
mba mi tchimizi woi ngingidjip mi.
3Mad’azi mi nga tchuka kä andaga,
mad’azi nga mi his hir,
buzuwazi nga mi djangî kä ata ahinad’a mi.
4Ahle suma akulona pet a mba lau woyo,
a mba d’ut akulod’a d’igi sana mi d’ut mbaktumba na;
ahle suma kurutna pet a mba yak kei
d’igi hum guguzlud’a d’oze hum tuluma mi yak keina na mi.
5Gola! Mbigeud’a hi Ma didinid’a
ti ndeï woi kur akulod’a.
Nga d’i ka suma Edom suma Ma didina
mi kazi sariyad’a kazi á dabazi woina.
6Mbigeu mamba ti nga tchora ki buzuwazi
d’igi buzuwa gro tumiyôna ki buzuwa mbekmberena
suma a ngad’azi buzunina na,
mbuluzi nga b’ala atat
d’igi mbul ma yam b’orozom gamlânina na mi.
Kayam Ma didina mi ngat buzuna
kur azì ma ngol ma Bosra-na kur ambas sa Edom-mba.
Ni mat ma tchi ma tcho ma kal lei nde na.
7Avünda kamuzleina kamuzlei digilina
a mba puk kä ki sed’eziya,
andagad’a ti mba d’i ka guruta abo buzuna,
andaga d’a gugud’upa ti mba d’i ras ki mbulâ mi.
8Kayam ni bur ma hlatchugula hi Ma didinina,
ni biza d’a a wurak nge nge pî
yam sun nda tcho d’a mi lat ki Siyon-ndid’a.
9Toliyon nda Edom-mba mba d’i mbut ni d’igi dubangâ na;
andaga mat ta gugud’upa mba d’i mbut d’igi sufred’a na mi;
andaga mata mba d’i mbut ni d’igi dubang ma nga mi ngalâ na.
10Andjege ki faleya ti nga d’i mit tei d’i,
andozot mba mi d’uzî hina gak didin.
Atchogoid’a katchogoid’a mba d’i mbut ni hur fulâ,
sa mba mi kal kua d’uo mi.
11Bud’ufa ki tchetchema a mba hlad’u,
iwiud’a ki gagauna a mba kak kuru,
Alona mba mi ngat ki ziyo mam ma b’lak yina,
blangât mba mi arî kä hawa kikid’ik.
12Kur bur máma sama ngol ma tin sa amul nga d’uo d’a,
mat suma nglona a mba wazi d’uo mi.
13Azlupa mba d’i wul kur azì mat ma ngolâ.
Kekerezeuna kaweid’a a mba deî kur azì mat ma ad’eng ma ngunguna,
mba d’i mbut ni yima kaka hi hânina,
mba d’i mbut ni yima kaka harigetina mi.
14Azurei suma abageina a mba ngaf hâna kua,
mbekmberena mba mi yi tam kua,
mba d’i mbut ni yima kaka hi muzuk ma tchonina,
mba mi fe yima tuk tama kua mi.
15Guguyo suma ayîna a mba ge zula kua,
a mba tchuk asezi kua, a mba ezlemu,
a mba tok grozina ad’u anguzad’u.
Ni kua ba, aba’â mba mi tok tam kua hahalang mi.
16Agi halagi kur mbaktumba hi Ma didinid’a, agi ndumud’u.
Ma agi mba fum kua d’uo na nga d’i;
azi pet a mba fazi ni kakap, ma kaleina nga d’i.
Kayam ni Ma didina ba, mi he vuna,
ni Muzuk mama ba, mba mi togoziya.
17Mi le togina kaziya,
mi ngazi andagad’a ki ziyona kabomu;
ti arî va mazid’a gak didin,
a mba kak kat atchogoid’a katchogoid’a mi.
Currently Selected:
Isai 34: BA
Highlight
Copy
Compare
Share
Want to have your highlights saved across all your devices? Sign up or sign in
Azumeina Bible © Alliance Biblique du Tchad, 1999.
