Oze 4
4
ZLA D’A TETENG NGA YAM ISRAEL-LÎD’A
(4—13)
Alona mi nga ki zlad’a ki sum mama
1Agi Israel-lâ,
agi humugi zlad’a hi Ma didinid’a. Mi dala:
An nga ki zlad’a ki suma a nga kaka kur ambasina,
kayam d’engzenga d’oze sumad’a a nga kur ambasa d’i.
A wan nga ala an nAlona d’i.
2Arî gun tad’a, ka zlad’a ki mbut ira,
arî tchi tad’a, kula, mizeuna ki murud’umba,
a nga tchi matna kam kua kam kua mi.
3Kayam ndata, baktarad’a mba d’i nde yam ambasa,
suma kurutna pet kahle suma abageina
kaluwei suma akulona a mba dap peyo,
kuluf ma kur alum ma ngolîna pî mba mi dap pei mi.
Mbut ira hi suma ngat buzunid’a
4Ma didina mi dala:
Nga ni yam sama lara pî
á tchugum zlad’a kam mboze á ngobom mbi,
wani iran ni ngod’a yam ang ma ngol ma ngat buzuna.
5Ang mba puk kä falei d’ad’ar,
ang ki ndrang ma djok vuna djak,
agi mba pugugi kä andjege,
an mba ni tchang asung ngei mi.
6Sum mana a mba puk kä,
kayamba a wan nga d’uo d’a.
Wani ang tanga wan nga d’uo mi.
Kayam ndata, an mining ngi,
ang mba kak man ma ngat buzuna d’uo mi.
Kayamba ang mar yam gata hi an Alo mangîd’a,
an mba ni mar rei yam grongâ mi.
7Suma ngat buzuna ki zla tazi pet,
a d’es sei kur lovot ta an tagazizid’a,
a vrak filei ma ndjendjed’a
blangân an mala ni subur mazid’a na.
8Ahle suma ngat buzu suma
sum mana a nga hazi yam tcho mazid’ina
a mbut ni te mazina.
Ni kayam ndata ba, a min ala
sum mana a i avogovok kur tcho d’a led’a!
9Wani vama mba mi mba yam sumina,
mba mi mba yam suma ngat buzuna ni hina mi.
An mba ni ngobozi yam tit mazid’a,
an mba ni wuragazi yam tcho d’a azi lata mi.
10Azi mba te, wani azi mba hop pi,
azi mba le gaulangâ, wani azi mba zul li,
kayam azi noyôn an Ma didina woi á le gaulangâ.
11Gaulangâ ki süm guguzlu d’a adjeud’a
ki d’a awilid’a a b’lak sum mana woyo.
12Sum mana a nga djop zlad’a nata filei agu mazina.
Totogo mazid’a nga d’i hulongôzi zla d’a ded’a!
Djib’era hi gaulangîd’a ti vid’izi woyo,
a nga le gaulangâ, a wal lei dei ki an Alo mazina mi.
13A ngat ahle suma ngat buzuna akulo
yam ahinad’a yat ta ked’iwurenga,
a ngal dubang ma his djivid’ina akulo yam yima ndingâ,
ad’u agu sena, ad’u agu pepliyena,
ad’u agu tereben
suma anguzuna b’uguma mi.
Ni kayam ndata ba, grogi suma aropma a nga le gaulangâ,
grogina amiyôzina a nga le mizeuna mi.
14An mba ni mba á ngop grogi suma aropma yam gaulang mazina
d’oze grogina amiyôzina yam mizeu mazina d’uo mi.
Ni agi ba, an mba ni ngobogiya,
kayam agi tagid’a zlabagi karop suma gaulangâ
kur gong magi d’a kud’or fileina,
agi nga hagi ahle suma ngat buzuna
mi fileina ki sed’ezi
d’igi suma bei wed’a a nga ring á i kur bad’a na.
15Agi Israel-lâ,
le agi hagi tagi á le mizeuna pî,
ar suma Juda-na zlad’a vazi d’i,
ar agi igi Gilgal li,
ar agi igi Bet-Aven ndi,
ar agi gunugi tagi ala:
Ma didina ni ma bei matna d’uo mi!
16Kayam Israel-lâ ni suma yam mba ad’enga d’igi amuhl hla wei d’a a tchugut nga ziyona kat yang tu d’uo d’a na, ki tchetchemba, Ma didina mba mi polozi ni d’igi sana mi pol gro tumiyôna hur ful ma bibinina na. 17Suma Efraim-ma a zlap tazi ki fileina, agi araziya! 18Ata yima abozi mi dap tche mazid’ina, a he tazi á le gaulangâ, amulei mazina huruzi mi ve nahle mazi suma zulona mi. 19Simetna mba mi yozi mi i ki sed’eziya. A mba mbut zulona kahle mazi suma ngat buzu suma azi nga ngad’azina mi.
Currently Selected:
Oze 4: BA
Highlight
Copy
Compare
Share
Want to have your highlights saved across all your devices? Sign up or sign in
Azumeina Bible © Alliance Biblique du Tchad, 1999.
