Oze 1
1
ZLA D’A YAM OZE AZI KAMAMBA KI GROMID’A
(1—3)
1Wana ni zla d’a Ma didina mi dat mi Oze Beri goroma kur atchogoid’a hi Jerobowam Jowas goroma amul ma Israel-lîd’a, ni kur atchogoid’a hi Oziyas ki Jotam ki Ahas ki Ezekiyas amulei suma Juda-nid’a mi.
Suma hi ma djok vunina ki zla d’a Alona mi dat avoka
2Wana ni zla d’a Ma didina mi dat avok mi Oze-d’a: Mi dum ala:
Ang i veï atcha d’a nga d’i le gaulangîd’a.
Gro suma ang mba vud’uzi ki sed’etna
a mba le ni gaulangâ hina mi#1.2 Gro suma ang mba vud’uzi ki sed’etna a mba le ni gaulangâ hina mi: D’oze: Ang veï grot suma ti vud’uzi ki gaulangîna, d’oze: Grotna a mba le d’igi asuzi na..
Kayam suma kur ambasina a he tazi á le gaulangâ,
a hazigazi mi an Ma didina.
3Oze mi i veï Gomer Diblayim goromba. Ti ve wirâ, ti vud’um gor mandjufâ. 4Ma didina mi dum ala:
Ang yum ala Jisreyel,
kayam ar ndjö an nga ni mba á ngop andjafâ hi Jehu-na
yam mat ma mi tchum avo Jisreyel-lâ.
An mba ni d’el leu d’a ted’a aduk andjafâ hi Israel-lâ.
5Kur bur máma an mba ni kus
ahle suma sïna hi azigar suma Israel-lîna woi
kur hor ra Jisreyel-la.
6Gomer ti hulong ve wirâ, ti vut gor atchad’a. Ma didina mi de mi Oze ala:
Ang yat ala Lo-Ruhama (nala, Bei we hohoud’a),
kayam an mba ni we hohowa Israel-lâ
á vat hurun ndei kazi gagak kuo d’a.
7Wani an mba ni we hohowa suma Juda-na.
An Ma didina Alo mazina,
an mba ni sud’uziya,
wani nga ni ki yeûd’a d’oze mbigeu d’a fiyaka
d’oze ki durâ d’oze kakulumeina
d’oze ki suma djang akulumeina d’uo mi.
8Kid’a Gomer ti ar Lo-Ruhama bei hapona dad’a, ti ve wirâ kua, ti vut gor mandjufâ. 9Ma didina mi de mi Oze ala:
Ang yum ala Lo-Ammi (nala, Ni sum mana d’i!),
kayam agi nga ni sum mana d’i,
an nga ni magina d’uo mi.
Currently Selected:
Oze 1: BA
Highlight
Copy
Compare
Share
Want to have your highlights saved across all your devices? Sign up or sign in
Azumeina Bible © Alliance Biblique du Tchad, 1999.
