Hebre-na 8

Jesus ni ma ngol mei ma ngat buzuna

1Zla d’a kal papa d’a ami dagizid’a ba wana: Ei nga ki ma ngol ma ngat buzu ma i kak sä akulo ata bik ka ndjufa hi zlam mba amula hAlo ma ad’eng ma kal papanina. 2Nga mi le sun nda ngat buzuna ata yima Alona mi tinim iram vam ma kal teglesâ, nala, zlub’u d’a gagazi d’a Salad’a mi minita, nga ni sana d’i.

3Kayam ma ngol ma ngat buzu ma lara pî a nga tinim á he he d’a hawad’a kahle suma ngat buzuna avok Alona. Kayam ndata, ngol mei ma ngat buzuna, mbeî mi he vama ngat buzuna mi. 4Ladjï mam nga kur duniyad’a ni, mi ndak á mbut ma ngat buzuna d’i, kayam suma ngat buzu suma a nga he he d’a hawad’ina a hat ni yam gata hi Moise-sa. 5Kayam suma a nga le sunda hahle ndazinina, ni vama taka yam angus vama akulona. Ata yima Moise mi nga mi min á ve zlub’ud’ina, Alona mi dum ala: Ang gol tang djivi ang lahle ndazina pet dedege d’igi an tagangzï akulo yam ahinad’a na. 6Wani ki tchetchemba, Jesus mi fe sun nda djivi d’a kal sun mazid’id’a, kayam mam mi ma a tinim yam vun ma djin ma awili ma kal teglesâ aduk suma kAlonina, kayam a tinim ni yam vun ma hle ma djivi ma kal teglesâ.

7Ladjï vun ma djin ma avo’â mi ni bei tchod’a ni, mi nga mba ki ma mbàna d’uo d’a. 8Wani Alona mi tin zlad’a yam sum mama d’igi mi de kur mbaktum mamba na ala:

Ma didina mi dala: Gola! Burâ nga mi mba.

Kur bur máma an mba ni djin vunan djin nda awilid’a

ki Israel-lâ ki suma Juda-na mi.

9Vun ma djin máma nga ni d’igi vun ma djin

ma an djinim kabuyozi ngolo kur bur ma an vazi abozi

ni buzuguzi woi kur ambas sa Ezipte-d’ina na d’i.

Kayam azi tit nga teteu yam vun man ma djinda d’i.

Kayam ndata, an Ma didina ni dala: An hazi azigan mi.

10Ma didina mi de kua ala:

Wana ni vun ma djin ma an mba ni djinim

ki Israel-lâ bugol bur mámina:

An mba ni tin gat manda kur djib’er mazid’a,

an mba ni b’irit krovo kur mugulazi mi.

An mba ni ka’î Alo mazina,

azi mba ka’î sum mana mi.

11Sa mba mi hat ndram

mboze mba mi de wiyema ala:

Ang we Ma didina na nga d’i,

kayam azi pet a mba wanu,

tin ad’ud’a ata suma yâna dei

gak mba yam suma gangrangâ.

12Kayam an mba ni vat hurun ndei yam tchila mazid’a,

an mba ni djib’er yam tcho mazid’a d’uo d’a.

13Ata yima Alona mi dala: Wana ni vun ma djin ma awilina na, mi mbut ma avo’â adjeud’a. Wani vama mbut adjeunid’a mi mbut ni mamara, ar go á dap peyo.

Currently Selected:

Hebre-na 8: BA

Highlight

Copy

Compare