Hebre-na 5

1Kayam ma ngol ma ngat buzu ma lara pî a manam naduk suma á le sunda avok Alona kaziya. Mam nga mi he he d’a hawad’a kahle suma ngat buzuna yam tchod’a hi sumid’a. 2Mam tamba nga mi we hohowa suma bei wed’a ki suma vit teina, kayam mam tamba ni ma amangeîna. 3Kayam ndata, le ni nana pî, mi ndak á ngat buzuna yam tcho mamba d’igi mam nga mi ngat yam tchod’a hi sumid’a na mi. 4Sana mi ndak á subur tam á mbut ngol ma ngat buzuna yam tam mbi, wani ni ma Alona yum d’igi mi yi Aron na na.

5Hina mi, Christ mi subur nga tam á mbut ma ngol ma ngat buzuna yam tam mbi, wani Alona mi de woi kam ala:

Angî Gorona,

an vud’ung ini.

6Mi de kua ala:

Angî ma ngat buzuna gak didin d’igi Melkisedek na.

7Kid’a Jesus mi nga yam andagad’id’a, mi tchen Alo ma mi ndak á sud’um mbei abo matnina tchen nda hud’a, mi tchi ki simina iram mi. Alona mi humumu, kayam mi ge yam kä ad’umu. 8Kayam mam mi Goroma pî, mi hat á ge yam kä kur ahle suma mam fe ndaka kuana. 9Ata yima mi ndak memetna, mi mbut Sala sut ta didinda yam suma pet suma a nga ge yazi kä ad’uma. 10Ata yi máma, Alona mi yum ala mam mi Ma ngol ma ngat buzuna d’igi Melkisedek na.

Golei tei djiviya, arei he gagazid’a woi d’i

11Ami nga ki zla d’a ngola á dagi yam zla ndata, wani ad’enga á vad’ud’a, kayam agi mbud’ugi aneka á hum zlad’a. 12Kayam agi lagi bizad’a ngola, agi ndak á hat suma, wani agi nga minigi sama ding á had’agi zla d’a adjeu d’a agi humut avun Alonid’a kua. Djivid’a agi tagi navuna, wani agi minigi nambira á tched’a. 13Kayam sama lara pî ma nga mi tchambirina, nga mi we zla d’a d’ingêra d’i, kayam mam mi gogorâ tua. 14Wani avuna ni yam suma a djengâ, suma a ne woi tetet á wal ir djivid’a ki tchod’ina.

Currently Selected:

Hebre-na 5: BA

Highlight

Copy

Compare