Ad’u Tinda 45

Josef mi tak tam mi b’oziyoma

1Josef mi ndak á ve tam avok suma pet suma a nga ki sed’ema d’i, mi de ki delem akulo ala: Ar suma pet a buzuk keyo! Ata yima sa tu nga gevem mbuo na, mi tak tam mi b’oziyoma. 2Mi nde tchina ki delem akulo; Ezipte-na a hum tchi máma, zla tchi máma mi i gak avo hi Faron. 3Josef mi de mi b’oziyoma ala: Ni an Josef! Abun nga ki iram tua zu? B’oziyoma a hulongôm nga zla d’a ded’a d’i, kayam vunadigazi d’i pat fek avoromu.

4Mi dazi kua ala: Agi hud’ugï geven go. Azi hud’ï gevemu. Mi dazi kua ala: Ni an wiyegina Josef ma agi guzum mbei á im Ezipte-na. 5Ki tchetchemba, agi djib’eregi ngol luo, agi had’agi hurugi d’ala agi guzun ndei ka hî d’a d’i. Wani nAlona ba, mi sununï avorogi ka hî á sud’ugiya.

6Gola! Baktarad’a ti le bizad’a woi yam andagad’a ni mbà da’, wani ar bizad’a vahl, sa mba mi zum mbi, sa mba mi dut tuo mi. 7Alona mi sununï ka hî avorogi kayam andjavagi mi dap pei yam andagad’a d’i; mi sununï ná ngomogi á sud’ugi sut ta ngola. 8Ni agi ba, sununï ka hî d’i, wani nAlona ba, mi mbud’un ma sun ma ngolâ hi Faron-na, mi tinin á te yam suma avo hatama, á te yam Ezipte-na pet mi.

9Agi igi atogo, agi dagi mabun ala wana ni zla d’a gorongâ Josef mi dangzid’a ala: Alona mi mbud’un wa ma te yam Ezipte-na pet; ang mbeï avo hatanu, ang le lilinga d’i. 10Ang mbeya, ang mba kak yam ambas sa Gosen-nda go ki anu, ki grongâ ki grong ngolona, ki d’uwar mang ma gureina ki ma nglona kahle mangâ pet. 11Ata yi máma an mba ni hang tena ki sum mangâ ki d’uwar mangâ, kayam agi kid’agagi va d’i, kayam baktarad’a ti ar bizad’a vahl tua.

12Agi tagi wagi ki iragiya, ang Benjamin we ki irang mi, ni an tan ba, ni dagi zlad’a ki vunanu. 13Agi i dagi mi Iba yam pat man nda an nga ki sed’et avo Ezipte-d’a, agi dum yam ahlena pet suma agi wagizina, agi igi atogo, agi hlumî ka hî.

14Josef mi bet wiyema Benjamin kok, azi djak a nde tchina. 15Mi bet b’oziyom suma dingâ ki tchina hina kokok mi. Bugola, b’oziyoma a yo seretna ki sed’emu.

Faron mi de mi Josef ala mi yoï abum Ezipte

16Suma hi Faron-na a hum ala: Josef b’oziyoma a mba wa Ezipte. Faron ki mam suma sunda a le furîd’a. 17Faron mi de mi Josef ala: Ang de mi b’oziyongâ a djin ahlena huyok koro mazina, a hulong yam ambas sa Kanan-nda, 18a yoï abuzi ki sum mama, a mbazï ka hî. An mba ni kagagi kur ambas sa djivi d’a kal la nga kur Ezipte-d’a, azi mba te te ma djivi ma yam ambasina.

19Ang dazi ala an dala: Agi yogi pusâ hakulumei suma kur ambas sa Ezipte-d’ina, agi yogï grogina kamiyôgina, agi hlagï abugiya, agi hulongôgïya. 20Ar agi djib’eregi yam ahle suma ar sä blogogina d’i, kayam ahle suma djivi suma kal suma kur ambas sa Ezipte-d’ina a mba arî magina.

21Israel groma a le d’igi Josef mi dazi na. Josef mi hazi pusâ hakulumeinina d’igi Faron mi hum vuna na. Mi hazi te ma a tumza irazi glovotna mi. 22Nge nge pî, mam hum baru ma djifâ tutu, wani mi he mi Benjamin bege d’a hapa kikis hindi ki baru ma djifâ vahl mi. 23Mi yo korona dogo á yo ahle suma djivi suma Ezipte-na, mi yo koro d’a aropma dogo á yo awuna kavuna ki te ma dingâ kua, mi sunuzi mabum yam tit ta glovota. 24Bugola, mi de mi b’oziyoma ala: Ar agi yalagi tagi glovot tuö wö, mi arazi a iya.

25Josef b’oziyoma a buzuk kei kur ambas sa Ezipte-d’a, a mbaza Kanan gen abuzi Jakob. 26Azi dum ala: Josef nga ki iramu! Mam tamba ni ma te yamba kur ambas sa Ezipte-d’a pet!

Wani Jakob mi hle nga tam b’enek ki, kayam mi he nga gagazid’a yam zla mazid’a d’i. 27Azi dum zla d’a Josef mi dazizid’a pet. Mi we pusâ hakulumei suma goroma Josef mi sunumï á hlum ki na; ata yi máma abuzi Jakob tam gra. 28Israel mi dala: Zla ndata ndaga! Gorona Josef mi nga ki iram tua; an i ni wum tua ba, an mid’a.

Currently Selected:

Ad’u Tinda 45: BA

Highlight

Copy