Ad’u Tinda 38

Zla d’a yam Juda ki Tamar-ra

1Wani ata yi máma Juda mi wal lei ki b’oziyoma, mi kal avo hi sama ding ma Adulam-ma, simiyêm ala Hira. 2Sama Kanan-na simiyêm ala Suwa, mi nga kua. Juda mi we goromba, mi vat atchad’a, mi gat huyogomu. 3Ti ve wirâ, ti vut gor mandjufâ, mi yum ala Er. 4Ti ve wirâ kua, ti vut gor mandjufâ, ti yum ala Onan. 5Ti vut gor ma dingâ kua, ti yum ala Sela. Kid’a ti vut Sela-d’a, Juda navo Kizip.

6Juda mi vatchad’a mi gorom ma ngolâ Er, simiyêt ala Tamar. 7Juda gorom ma ngolâ Er ni sama tchona avok Ma didina; mi tchum mbeyo.

8Juda mi de mi Onan ala: Ang i vatchad’a hi wiyengîd’a, ang djok andjaf wiyengâ. 9Wani Onan mi wala andjaf máma nga ni mama d’uo. Ni kayam ndata ba, ata yima lara ma mi zlap katchad’a hi wiyemid’ina, mi ar sumurum ti vo kä woi andaga, kayam mi min djok andjaf wiyema d’i. 10Vama mi luma mi le nga Ma didina tam djivi d’i; mi tchum mbei mi.

11Juda mi de makunomba Tamar ala: Ndak i kak modonod’a avo habuk gak gorona Sela mi djeng tua. Mi de hina ni kayambala goroma mba mi mit d’igi b’oziyoma hina d’eyu d’a. Tamar ti i kak avo habud’u.

12Bugol la burâ kal ngolid’a, Suwa goromba atchad’a hi Juda-d’a ti mid’a. Kid’a Juda hurum b’leng dad’a, mi i Timna ki banama Hira ma Adulam-ma gen suma tchau tumiyô mama.

13A de mi Tamar ala: Gola! Akuno’â nga mi i Timna a tchau tumiyô mama. 14Ti fok baru d’a modonod’a woyo, ti zlup tat ki baru d’a dinga ala sa wat ti, ti i kak avun azì ma Enayim-ma, avun lovot ta i Timna-d’a, kayam ndat ti wala Sela mi djeng wa da’, wani nga bei mi vad’u.

15Juda mi wat d’igi atcha d’a gaulangâ na, kayam ndat ti zlup irad’u. 16Mi wat nga d’ala nakunomba d’a d’i, mi i geved’u, mi dat ala: An min bur ki sed’egu.

Ti hulong dum ala: Ang han ni me ba, ang bur ki sed’en nge?

17Mi hulong dat ala: An mba ni hak ahuna.

Ti hulong dum ala: Djiviya! Ang dengên va gak bur ma ang sununï ahunina.

18Mi dat kua ala: Ndak min an dengê’î me ge?

Ti hulong dum ala: Ang han tampong mangâ ki ziyomu, ki totogo d’a nga abonga mi. Mi hattchiya, mi bur ki sed’ed’u. Ti ve wirâ ki sed’emu, 19ti tchol ti iya, ti fok baru d’a ti zlup ki tata woyo, ti tchuk baru mat ta modonod’a atad’u.

20Juda mi sunï ahuna abo banam ma Adulam ma adigazi katchad’ina ala mi yomï ahle mama abod’u, wani mi fat nga d’i. 21Mi djop suma azina ala: Atcha d’a gaulangâ fata kaka avun lovot ta i Enayim-mba ni lara ge?

A dum kua ala: Atcha d’a gaulang nga ka hî d’i.

22Mi hulong gen Juda, mi dum ala: An fat nga d’i. Suma azina a dan ala atcha d’a gaulang nga hatazi d’i.

23Juda mi hulong dum ala: Ei arat ahle ndazina abot na, kayam ei mbud’i zulona d’i. An sunung kahuna, ang fat nga d’i.

24Bugol til ma hindina a mba de mi Juda ala: Akunonga Tamar ti mbut wa gaulangâ. Gola! Ti ge wa wirâ ki gaulang matna.

Juda mi dazi ala: Agi it abagei kel ngalat teyo.

25Kid’a azi it sä woi kela, ndat ti ge sunda de makunotna ala: Sama gan wirîna ahligiyem ba wana! Ang we tampong ma wana, ziyom ki totogod’a ni hi nge ge?

26Juda mi waziya, mi dala: Ndat ti d’ingêr kalan anu, kayam an hat nga mi gorona Sela d’i. Bugola, mam dok zlap nga ki sed’et ti.

27Ata yima ti nde vutina, gola, ngoneîd’a nga kurud’u. 28Ata yima nga d’i vutna, ma dingâ tu ndeï abom mbeyo; atcha d’a vud’aropma ti vumu, ti djinim baru d’a hleu d’a para del abomu, ti dala: Wana ni ma ndeï avo’â. 29Bugola, mi hulong abom krovo, wiyema ndeya; atcha d’a vud’aropma ti dala: Ni kayam me ba, ang tcho azì grona woi ge? Ni kayam ndata ba, azi yum ala Peres#38.29 Peres: Nala, Tchod’a.. 30Wiyema ndeï bugol ki ziyo ma hleuna abomu; azi yum ala Zera.

Currently Selected:

Ad’u Tinda 38: BA

Highlight

Copy