Ad’u Tinda 35

Jakob mi tchol Sikem mi i Betel

1Alona mi de mi Jakob ala: Ang tchola, ang i Betel, ang kak sä kua. Ang min yima ngal ahle suma ngat buzuna mi an Alo ma ni nde tan ndei irang ata yima ang nga ring abo wiyengâ Esau-na.

2Jakob mi de mi suma avo hatama ki suma a nga zlapa ki sed’ema ala: Agi tchugugi filei ma nga avo hatagina woyo, agi mbud’ugi tagi yed’et, agi tchugugi baru ma dingâ atagiya. 3Ei tcholeya, ei i Betel; an i ni min yima ngal ahle suma ngat buzuna mAlo ma mi hulongôn humba ata yima an nga kur ndakina, ni Ma mi nga ki sed’en kur tit manda ata yima lara ge petna.

4Azi he Jakob filei ma teteng ma nga abozina, ki ngangam ma nga humazina. Jakob mi ngeyezi kä ad’u agu ma ngolâ, go ki Sikem. 5Azi tchol iya; mandarâ hAlonina mi ve suma kur azì ma nguyuzina; sama i bugol Jakob ki groma nga d’i.

6Jakob mi mbaza Lus, nala Betel, yam andaga d’a Kanan-nda, mam ki suma zlapa ki sed’ema pet. 7Mi min yima ngal ahle suma ngat buzuna kua, mi yi yi máma ala El Betel#35.7 El Betel: Nala, Alo ma Betel-lâ., kayam ni kua ba, Alona mi nde tam mbei iram ata yima mam nga mi ring abo wiyemina.

8Debora d’a wul Rebekid’a ti mid’a; a tozot avo Betel ad’u aguna. Agu máma a yum ala Agu ma tchi matna ad’uma.

9Kid’a Jakob mi tcholï Padan-Aram mi mbad’a, Alona mi nde tam mbei iram kua, mi b’e vunam kamu, 10mi dum ala: Simiyêng ala Jakob; a dok yang ala Jakob puo d’a, wani a mba yang ala Israel. Ni hina ba, Alona mi yum ala Israel.

11Mi dum kua ala: An nAlo ma ad’engên kal petna; ang vud’a, andjavang zul ngola; andjaf suma kablaud’a hi sumid’a a mba buzugï ni kurungû, amuleina a mba buzugï ni kurung mi. 12Andaga d’a an hat mi Abraham ki Isak-ka, an mba ni hangziya, an mba ni hat mandjavang ma a mba vud’um blogongâ mi.

13Alona mi tchol mi aram ata yima mi dum zlad’a kuana. 14Jakob mi tin ahinad’a akulo kad’ut ata yima Alona dum zlad’a kuana, mi he süm guguzlud’a he d’a hawad’a kat mAlona, mi vot mbulâ kat mi. 15Jakob mi yi yima Alona mi dum zlad’a kuana ala Betel#35.15 Betel: Gol 28.19..

Rachel ti vut Benjamin, ti mid’a

16Jakob ki sum mama a ar Betel, a iya. Kid’a azi mba go á kal Efrata-d’a, Rachel ti nde vuta; vuta lat heî. 17Wani ata yima vuta nga d’i lat heîna, atcha d’a vud’aropma, ti dat ala: Ndak le mandar ri, ndak vut ni gor mandjufâ d’ei. 18Ata yima ndat ar go á matnid’a, ti yum ala Benoni#35.18 Benoni: Nala, Gor ma Ndaka., wani abum mi yum ala Benjamin#35.18 Benjamin: Nala, Gor máma ni bigan nda ndjufa..

19Rachel ti mid’a; azi tozot avun lovot ta i Efrata-d’a, nala, Betelehem. 20Jakob mi tin ahina d’a ge humba yam asuwad’u; gak ini a nga yat ala Ahina d’a ge hum mba yam asud’a hi Rachel-lid’a.

21Israel mi tchol iya, mi ve zlub’u mamba huyok azì ma a yum ala Mikdal-Eder-râ. 22Wani ata yima Israel mi nga kaka kur ambas ndata tua na, Ruben mi i mi bur ki Bilha amam mba gora; Israel mi hum mi.

Jakob groma ni dogo yam mbà. 23Lea grotna ni Ruben ni Jakob gorom ma ngolâ, Simeon, Levi, Juda, Isakar ki Zabulon.

24Rachel grotna ni Josef ki Benjamin.

25Bilha weid’a hi Rachel-la grotna ni Dan ki Neftali.

26Zilpa weid’a hi Lea-d’a grotna ni Gad ki Aser. Azi pet ni Jakob grom suma mi vud’uzi avo Padan-Aram-ma.

Isak mi mid’a

27Jakob mi mba avo habum Isak avo Mamre go ki Kiriyat-Arba, nala, Hebron; ni yima Abraham azi ki Isak a kak kua adjeuna. 28Bizad’a hi Isak-ka ni kis yam dok klavandi. 29Isak mi mbut mamara kikra, bizam kal ngola mi, mi mid’a; groma Esau azi ki Jakob a tozomu.

Currently Selected:

Ad’u Tinda 35: BA

Highlight

Copy