Ad’u Tinda 30
30
1Ata yima Rachel ti wala ndat ti vut nga gor mi Jakob puo na, ti nde le yungôra ata wiyeta, ti de mi Jakob ala: Ang han grona! Le hina d’uo ni, an mba ni mid’a!
2Jakob hurum zal ata Rachel ngola, mi dat ala: An mbut nAlona ba, ni d’elek bei vuta zu?
3Ti hulong dum ala: Ang gol wei manda Bilha wana: Ang vad’u; ti vut gorâ, an ni gum adiganu, kayam an fe gorâ atad’u.
4Ti hum wei mata Bilha atchad’a; Jakob mi bur ki sed’ed’u. 5Ti ve wirâ, ti vud’um gor mandjufâ. 6Rachel ti dala: Alona mi lan djivid’a, mi hum zla manda, mi han gor mandjufâ. Ni kayam ndata ba, ti yum ala Dan.
7Bilha weid’a hi Rachel-la ti ve wirâ kua, ti vut gor ma mbàna mi Jakob. 8Rachel ti dala: An deng tan ata Alona, an ndjiget ki wiyenda, an kus wa. Ti yum ala Neftali.
9Ata yima Lea ti wala ndat ti ka bei vuta na, ti ve wei mata Zilpa, ti hat mi ndjuvut Jakob atchad’a. 10Zilpa weid’a hi Lea-d’a, ti vut gor mandjufâ mi Jakob. 11Lea ti dala: Ni djiviya me na ge? Ti yum ala Gad.
12Bugola, Zilpa weid’a hi Lea-d’a, ti vut gor ma mbàna mi Jakob kua. 13Lea ti dala: An le furîd’a, kayam gro aropma a mba de kan ala: D’a furîd’a. Ti yum ala Aser.
14Kur bur ma ze gemena, Ruben mi i abagei kur asinena, mi feï vud’agu ma a yum ala mandragorâ#30.14 mandragorâ: Nala, Vud’agu ma djok andjafâ. Suma adjeuna a djib’er ala vud’agu máma mi ndjunuzi á vuta. na, mi mbam masum Lea. Rachel ti de mi Lea ala: An nga ni tchenegu, ndak hanï ni mandragorâ hi goro’îna nde.
15Lea ti hulong dat ala: Ndak hle ndjuvun abon wani ndagak nga d’uo tua ba, ndak hal á hle mandragorâ hi goronina kua d’ei zu?
Rachel ti dat ala: Djiviya! Jakob mi bur ini ki sed’ek yam mandragorâ hi goro’îna d’ang.
16Wani fladege d’a Jakob mi tcholï hur asinena á mba avod’a, Lea ti nde woi á d’ugulomu, ti dum ala: Ang bur ini avo hatanu, kayam an wurak kang ki mandragorâ hi goronina. Jakob mi bur ki sed’et andjege ndata.
17Alona mi hum tchenda hi Lea-d’a, ti ve wirâ, ti vut gor ma vahlâ mi Jakob. 18Ti dala: Alona mi han wa wurak manda, kayam an he wei manda mi ndjuvunu. Ti yum ala Isakar.
19Lea ti ve wirâ kua, ti vut gor ma karagayana mi Jakob. 20Ti dala: Alona mi han he d’a hawa d’a djivid’a, ihî wani, ndjuvun mba mi lan ad’unu, kayam an vud’um grona karagaya. Ti yum ala Zabulon. 21Bugola, ti vut gor atchad’a, ti yat ala Dina.
22Bugola, Alona mi djib’er yam Rachel, mi humud’u, mi malat lovota á vuta. 23Ti ve wirâ, ti vut gor mandjufâ, ti dala: Alona mi pad’an ndei kur zulo mana. 24Ti yum ala Josef, ti dala: Ar Ma didina Alona mi han gor mandjufâ kua.
Jakob mi mbut ma ndjondjoîna
25Bugol la Rachel ti vut Josef vuta, Jakob mi de mi Laban ala: Ang aran an i avo hatan yam andaga manda. 26Ang han amiyôn suma an lang sunda kazina ki grona, an iya; ang tang we sun nda an langzid’a.
27Laban mi dum ala: Ang humun djiviya; Ma didina mi dan ala mam b’e vunam kan ni kayam angû. 28Ang ngan wurak manga, an mba ni wuragangziya.
29Jakob mi hulong dum ala: Ang tang we ni nana ba, an lang sunda ngola, an polong d’uwar mangâ ge. 30An fang ahligiyengî hina yegre go, a zul ki tchetchemba ni kayam anu; Ma didina mi b’e vunam kangî kayam an mi. Ki tchetchemba, ni mindja ba, an mba ni le sunda yam aziyan nge?
31Laban mi dum ala: An hangî me ge?
Jakob mi hulong dum ala: Ang han va d’i. Le ang min zla d’a an dangzid’a ni, an mba ni polong tumiyô mangâ kua. 32An mba ni kal ini aduk ahok mangâ, an mba ni var tumiyô suma tazi d’udjod’a ndundub’u’â ki suma tazi tchetchefâ ki gro tumiyô suma wurana; aduk b’ogeina, suma tazi d’udjod’a ndundub’u’â ki suma tazi d’udjod’a tchetchefâ. Ndazina ni wurak manda. 33Ndjivin nda ang mba mba á gol wurak mandid’a, ang mba wala an ni sama d’ingêrâ; ahok b’ogei suma tazi nga ndundub’uk kuo na, suma tazi nga tchetchef fuo na d’oze tumiyô suma tazi nga wurad’a d’uo na, le a nga aduk mandjiyo ni, ndata ni kula.
34Laban mi dum ala: Djiviya! Ang le d’igi ang de na. 35Kur bur máma tamba Laban mi var ahok mbekmbere suma tazi d’udjod’a kikringâ ki suma tazi tchetchefâ, ahok b’ogei suma aropma pet suma tazi ndundub’u’â ki suma tazi tchetchefâ, suma tazi b’ub’ulu’â ki gro tumiyô suma wurageina, mam hazi mi groma. 36Mi wal ki Jakob adigazi ndak á tita burâ hindi. Jakob nga mi pol d’uwarâ hi Laban ma arâ.
37Jakob mi yo abo agu ma arina hi peplena, amandena ki platana, mi ndalazi hapa b’ub’uluk. 38Mi tchuk abo agu ma mi ndalama kä avok aho’â ata yima azi mba á tche mbinina, a nga vik wureina mi. 39Azi nga ful tazi avok abo agu mi ndalam máma, azi nde vut gro suma tazi d’udjod’a kikringâ ki suma tazi ndundub’u’â ki suma tazi tchetchefâ.
40Kid’a Jakob mi ka tumiyô mama irazi vazid’a, mi yo gro aho’â pet suma tazi d’udjod’a kikringâ ki suma tazi wurad’a suma a nga kur kangâna hi Laban-nina, mi mbut sama d’uwarâ heîna, mi tinizi irazi vaziya, mi zlabazi nga ki suma hi Laban-na d’i. 41Ata yima lara ma ahok suma gangrangâ a ful tazina, Jakob mi tchuk abo agu máma kä avorozi ata yima azi nga tche mbina kuana; hina azi ful tazi avok abo agu máma. 42Ata yima suma agengâ a nga ful tazina, mam nga mi tchuk abo agu máma kä avorozi d’i. Kayam ndata, ahok suma agengâ ni suma hi Laban-na, suma gangrangâ ni suma hi Jakob-ma mi.
43Ni hina ba, Jakob mi mbut sama ndjondjoîna, mi nga kaho’â ablaud’a, yuguneina, azungeîna, djambala ki korona mi.
Currently Selected:
Ad’u Tinda 30: BA
Highlight
Share
Copy
Want to have your highlights saved across all your devices? Sign up or sign in
Azumeina Bible © Alliance Biblique du Tchad, 1999.
