Galat-na Wana ni modo zla d’a kuruta
Wana ni modo zla d’a kuruta
Paul mi tchi wala yam Zla d’a Djivid’a mi suma Galat suma Asi-na, kur tit mam mba mbàd’a ki d’a hindid’a. Suma Galat-na a he gagazid’a mi (Sun SS 16.6 ki 18.23).
Bugol Paul, suma dingâ a mba d’uziya. Azi hat kretiyê suma a nga ni Juif-fâ d’uo ndazina ala mbeî a ge yazi kä ad’u Gata hi Moise-sa, mbeî a ngat bayâd’a mi. Paul mi wala hat ndata nga d’i ndjak ki Zla d’a Djivid’a hi Jesus Christ-sa d’i. Hat ndata nga d’i mbut kretiyê suma Galat-na magumeina hi Gatina. Dam a gum wa humam yam zla ndata kid’a mi nga avo Efes-sa kla. Kayam ndata, mi b’ir mbaktum ndata mi kretiyê suma Galat-na á bud’uzi woi akulo kua.
Paul mi min hulongôzi yam Zla d’a Djivi d’a azi humut avok kikidjid’a. Kayam ndata, mi had’azi zlad’a ad’u hindi:
Ta avoka, mi de zlad’a ni yam tit mam mba tata, nala, yam mbut ta mam mbut kretiyênid’a, yam hur ma tu ma mi lum ki suma nglo suma gol Toka avo Jerusalem-ma (nala, kretiyê suma a nga ni Juif-fâ d’uo na a nga ad’u Gata hi Moise-sa d’i), yam zla d’a adigam ki Pierre yam sun nda led’a hi Pierre-ra mi. Paul mi de woi ala mam tamba ni ma a sunuma hi Jesus Christ-sâ, ni Jesus Christ ba, mi tinim ma a sunuma (sapitre d’a 1–2).
Ta mbàd’a, mi vad’ud’a yam Zlad’a hAlona d’a kur Vun ma Djin ma Adjeunid’a, mi tak kei ala suma a nga fe suta nata lovot ta ge yam mba kä ad’u Gata hi Moise-sid’a d’i, wani nata lovot ta he gagazid’a yam Jesus Christ-sa hol (sapitre d’a 3–4).
Ta hindid’a, mi yazi á tit ad’u ad’enga hi Muzu’â hAlonina ata pat ta mi pad’azi woid’a. Kayam Muzu’â nga mi mbud’i lovot meid’a gak ei djogei tit ta awilid’a. Vama ngolâ mi tagei ni od’a (sapitre d’a 5–6).
Djivid’a Tok ka lara ge ki kretiyê ma lara ge, mi ge yam kä ad’u zla ndata ki hur ma tuna, kayam mi tit d’igi sama a pad’am mbei kur magomba gagazina na. t Wana ni wal mata
Zla d’a avoka 1.1-10
Ad’enga hi Paul ma a sunumid’a 1.11–2.21
Zla d’a Djivid’a hi sumad’a hAlonid’a 3.1–4.31
Pat ta woid’a ki ge yam mba kä d’a hi kretiyênid’a 5.1–6.10
Zla d’a dabid’a 6.11-18
Currently Selected:
Galat-na Wana ni modo zla d’a kuruta: BA
Highlight
Share
Copy
Want to have your highlights saved across all your devices? Sign up or sign in
Azumeina Bible © Alliance Biblique du Tchad, 1999.