Galat-na 3
3
Gata d’oze he gagazid’a
1Agi Galat suma lilid’a, sama mbud’ugi iragi ni nge ge? Agi suma a tchagi wal matna hi Jesus Christ mám ma ata agu ma b’ala woi pid’a’â, 2an nga ni djobogi va tu. Na ni agi fagi Muzu’â hAlonina ni yam sunda hi gat ta agi lata, d’oze ni yam Zla d’a Djivi d’a agi humut ta agi hagi gagazid’a kata zu? 3Agi ni lilid’a zu? Agi tinigi ad’ud’a yam Muzu’â hAlonina, agi min dabat kad’eng magid’a zu? 4Agi fagi ndaka ni hawa nä? Le ni na ni, ni hawa mi. 5Ata yima Alona mi hagi Muzuk mamina, mi lahle suma ndandalâ adigagi ni yam sunda hi gat ta agi lata, d’oze ni yam Zla d’a Djivid’a agi humut ta agi hagi gagazid’a kata zu?
6D’igi mbaktumba hAlonid’a ti de yam Abraham na ala: Mi he gagazid’a yam Alona. Ni kayam ndata ba, Alona mi ndumum ma d’ingêrâ. 7Kayam ndata, djivid’a agi wagi ala suma a he gagazid’ina, azi nandjaf ma gagazina hi Abraham-ma. 8Kayam Alona mi de kur mbaktum mamba avok ala mam mba mi mbut andjaf suma dingâ d’ingêr yam he gagazi mazid’a. Mi de Zla d’a Djivid’a mi Abraham adjeu ala: An mba ni b’e vunan yam andjaf suma pet ni kang angû. 9Kayam ndata, Abraham mi he gagazid’a, Alona mi b’e vunam kam mi. Hina, suma he gagazid’ina pet, Alona nga mi b’e vunam kazi d’igi mi b’e vunam yam Abraham na mi.
10Kayam suma a ge yazi kä ad’u gatina, Alona mi gazi vuna. Kayam mbaktumba hAlonid’a ti dala: Sama kid’ak á ngom ahlena pet suma gata dum kazi á led’ina, Alona mi gum vuna. 11Kayam sana nga mi mbut d’ingêr avok Alona ni yam sunda hi gat ta mi lata d’i, kayam mbaktumba hAlonid’a ti dala: Sama d’ingêrâ mba mi kak karid’a ni yam he gagazi mamba. 12Kayam ndata, ge yamba kä ad’u gata nga ni yam he gagazi d’a mAlonid’a d’i, wani mbaktumba hAlonid’a ti dala: Sama nga mi tit teteu yam vun ma hed’a hi gata pepet na, mba mi kak karid’a ni kad’u.
13Ata yima Christ mi mbut sama Alona mi gum vuna keina, mam pad’ei woi ad’u vun ma ge ma gata ti geizina. Kayam mbaktumba hAlonid’a ti dala: Sama a gabam akulo ata agunina, ni sama Alona mi gum vunina. 14Christ mi le hina kayam b’e vun ma Alona mi hle vunam mi Abraham kama, mi mba yam andjaf suma dingâ ni yam Jesus Christ. Kayam ndata, Alona mi hei Muzuk mam ma mi hle vunam kama ni yam he gagazi meid’a.
Gata ki vun ma hled’a
15B’oziyona, an nga ni dagi zla d’a d’ogola hi sumid’a. Le sana mi hle vunam yam va, le suma pet a le glangâsâ kamu ni, sama ndak á pad’am mbei d’oze mi tchuk kam kuana nga d’i. 16Ni hina ba, Alona mi hle vunam mi Abraham kandjavamu. Mi de hina ni yam andjavam ma ablauna d’i, wani mi dala: Ad’u andjavangû, nala, ni sama tuna, ni Christ. 17Wana ni vama an min duma. Vun ma djin ma Alona djinim avok deina, gat ta mbeï bugol bizad’a kikis fid’i yam dok hindi d’a, ndak á tchi vun ma djinda hAlonina woi d’i, ndak á mbut vun mam ma hled’a vama hawana d’uo mi. 18Wani le sana mi fe he d’a hawad’a hAlona d’a d’igi vama djona hina d’a ni yam tit ta nga mi tit yam gatid’a ni, nga ni yam vun ma hled’a hAlonina d’uo d’a. Wani Alona tak suma mamba mi Abraham ni yam vun mam ma hled’a.
19Ni kayam me ba, Alona mi tin gata ge? Mi tinit á tak tcho d’a led’a abua, gak andjafâ hi Abraham ma Alona hlum vunam kama mi mba. Malaikana a he gat ndata mi Moise ma aduk suma kAlonina. 20Ma aduk suma kAlonina nga ni yam sa tu d’i. Wani Alona ni tu.
Alona mi tin gata ni kayam me ge?
21Na ni gata nga d’i kak djangûna ki vun ma hled’a hAlonina zu? Nga na d’i! Le gat ta Alona mi hat adjeud’a ndak á he arid’a mi suma ni, sana mi ndak á mbut d’ingêr avok Alona yam ngom mba mi ngom gata mi. 22Wani mbaktumba hAlonid’a ti dala suma kur duniyad’ina pet a nga ni kä ad’u ad’enga hi tchod’id’a. Hina wani, suma a he gagazid’ina a fe he d’a hawa d’a Alona mi hle vunam kata ni yam he gagazi mazi d’a yam Jesus Christ-sa.
23Avok ka bei he gagazid’a ti mba tua d’a, gata nga d’i ngomei djinda kä á djup he gagazid’a nde mat ta woid’a. 24Hina, gata ti ngomei gak mbad’a hi Christ-sa, kayam ei mbud’i suma d’ingêrâ avok Alona yam he gagazid’a. 25Ki tchetchemba, ei nga fei lovota á he gagazid’a. Kayam ndata, ei nga kä ad’u sama ngom mbuo d’a.
26Ni kayam he gagazid’a ba, agi pet mbud’ugi Alona groma zlapa tu ki Jesus Christ. 27Kayam agi pet suma a lagi batemba zlapa tu ki Jesus Christ-sâ, agi tchugugi wa Jesus Christ atagiya. 28Ki tchetchemba, wala nga aduk Juif-fâ kandjaf suma dingâ d’i, nga aduk magumeina ki gro vuta d’i, nga aduk andjofâ karopma d’uo mi. Agi pet ni zlapa tu ki Jesus Christ. 29Le agi ni suma hi Christ-sâ ni, agi nandjafâ hi Abraham-ma mi. Agi ni suma te djo ma Alona mi hle vunam kama mi.
Currently Selected:
Galat-na 3: BA
Highlight
Share
Copy
Want to have your highlights saved across all your devices? Sign up or sign in
Azumeina Bible © Alliance Biblique du Tchad, 1999.