Ezekiyel Wana ni modo zla d’a kuruta
Wana ni modo zla d’a kuruta
Ezekiyel ni ma ngat buzuna kur gong nga kud’ora hAlona d’a avo Jerusalem-mba. Nebukanezar amul ma Babilon-na mi hle Jerusalem kur biza d’a 597 d’a avok vuta hi Jesus Christ-sa. Ata yi máma mi yo suma Juda-na zlapa ki Ezekiyel, mi izi magomba sä Babilon.
Bugol go ki biza d’a fid’id’a, Alona mi yi Ezekiyel, mi mbud’um mam ma djok vuna. Kur andaga d’a a nga lazi magomba kuad’a, Ezekiyel mi tin ad’u djok vun Alona woi mi Juif suma a nga kaka Babilon-na ki Juif suma a ar kaka avo Jerusalem tua na mi.
Bugol la Nebukanezar mi hle Jerusalem yam á mbàd’a mi b’lak gong nga kud’ora hAlonid’a woi kur biza d’a 587 d’a avok vuta hi Jesus Christ-sid’a, Ezekiyel mi djok vun zla d’a b’leng hurâ ki tin hurâ mi.
Mbaktumba hi Ezekiyel-la wal mata nad’u fid’i:
Wal la avoka ni sapitre d’a 1–24-d’a. Ezekiyel mi djok vuna yam ayî ma mba mi mba yam Jerusalem-ma.
Wal la mbàd’a ni sapitre d’a 25–32-d’a. Ezekiyel mi djok vuna ala ayîna hAlonina mba mi nde yam andjaf suma ding suma a mbut ir Israel-lâ a djobozi vunazina ni hina dedege mi.
Wal la hindid’a ni sapitre d’a 33–39-d’a. Ezekiyel mi djok vuna bugol b’laka hi Jerusalem-mba, mi sun zla d’a b’leng hurâ ki tin hurâ mi Israel-lâ.
Wal la fid’id’a ni sapitre d’a 40–48-d’a. Ezekiyel mi vad’ud’a yam gong nga kud’ora hAlona d’a awili d’a mi wat kur adïd’id’a, yam wal la a wal andagad’a aduk andjaf Israel ma dogo yam mbànid’a mi.
Adïd’a ti de Ezekiyel teteng. Mi lahlena teteng á tak zla d’a djok vuna woi mi. Mi hat ala Alona mi nga ni kur gong nga kud’ora hAlona d’a avo Jerusalem-mba hol li, wani mi nga ata yima dingâ, mi nga kur Babilon mi. Gol 11.16. Mi dala sama lara pî, a mba kam sariyad’a kamî yam sun mam mba mi lata hol. Gol sapitre d’a 18-d’a. Mi zut sama lara pî ala mi tit kur lovot ta d’ingêra. t Wana ni wal mata
Alona mi yi Ezekiyel 1–3
Ayîna hAlonina mba mi nde yam Jerusalem 4–24
Ayîna hAlonina mba mi nde yam andjaf suma dingâ 25–32
Alona mi hle vunam mi sum mama 33–37
Ezekiyel mi djok vuna yam Gok 38–39
Adïd’a ti de Ezekiyel yam gong nga kud’ora hAlona d’a awilid’a, yam andagad’a hi Israel-lîd’a mi 40–48
Currently Selected:
Ezekiyel Wana ni modo zla d’a kuruta: BA
Highlight
Copy
Compare
Share
Want to have your highlights saved across all your devices? Sign up or sign in
Azumeina Bible © Alliance Biblique du Tchad, 1999.