Ezekiyel 43
43
Ma didina mi hulong kur gong mam mba kud’ora
1Sa máma mi hlan avun agrek ma abo ma yorogonina. 2Ata yi máma an we subura hAlona hi Israel-lîd’a ti tcholï abo ma yorogona. Ti nga d’i siwel d’igi mbiyo alum ma ngolâ vunam nga mi tchi wü na, wile mata nga d’i b’o yam andagad’a mi. 3Vama mi nde tam mbei iran máma mi ni d’igi vama mi nde tam mbei iran adjeu ata yima Alona mi mba á b’lak Jerusalem-ma na, mi ni d’igi vama mi nde tam mbei kid’a an nga avun alum ma Kebar-rîd’a na mi. An grif kä avoromu.
4Subura hAlonid’a b’o mata ti kal kur vun agrek ma abo ma yorogonina, ti kal kur gong mam mba kud’ora mi. 5Muzu’â hAlonina mi hlan akulo, mi in hur atrang nga krovod’a. An we subura hAlonid’a b’o mata ti oî gong mam mba kud’ora. 6Ata yima sa máma mi nga tchola geven tua na, an hum del sama dingâ nga d’i danï zlad’a kur gong nga kud’ora hAlonid’a.
7Ma didina mi dan ala: Ang gor sana, ang gol yima wana. Zlam man nda amula ti ni ka hî, an mba ni tchuk asen ni kua, an mba ni kak ka hî aduk Israel-lâ ki iran fafat mi. Israel-lâ kamulei mazina a mba mbud’un simiyên Ma bei tchod’a ba na ndjendjed’a ki sun mazi d’a batranga ki filei mazina ki tos sa a tos mad’a amulei mazina ka hî d’a d’uo mi. 8Amulei mazina a min vun gong mazid’a ki yi mazi ma ndjendjek ma a djak kakulo avun gonga hazì mazinina go ki vun gong manda, go ki yi man ma ndjendjek ma a kal ki krovo kur gong man nda kud’orina mi. Wani ni gulumuna ba, mi walami adigami woi kaziyaziya. Ni hina ba, a mbud’un simiyên Ma bei tchod’a ba na ndjendjed’a. Ni kayam ndata ba, an b’lagazi woi kayî mana wana. 9Ki tchetchemba, azi mba ar sun mazi d’a batranga woi avoronu, a mba hut mad’a amulei mazina woi dei ki sed’en mi. Ata yi máma an mba ni kak adigazi ki iran fafat.
10Ang gor sana, ang vad’ud’a yam ngad’a hi gong mandid’a mi Israel-lâ. Ar zulona mi vazi yam tcho mazi d’a led’a pet, ar azi min tazi á gol ngad’a hi gong mandid’a djivi mi. 11Le azi nga le zulona yam tcho mazi d’a led’a gagazi ni, ang tagazi mbaktum mba ngad’a yam yina hi gong mandina, ang vazi ad’ud’a yam gongîyo suma tetengâ ki huruzi ma krovona, yam vun agrek ma kala ki ma a buzuk ki woi abuna, yam nga mamba ki zla tat pet mi. Ang b’ir gata ki vun ma hed’a yam ahle ndazina kä irazi na, ang tagazizi djiviya, kayam azi laziya, a tit kazi mi. 12Gat ta yam yina hi gong mandina ba wana: Yima akulo ma ngui ahina d’a fiyak ka ked’iwurengina pet ni yima a tinim iram vam ma kal tegles mi Ma didinina.
Yima ngal ahle suma ngat buzuna kahle suma ngat buzuna
13A nga yima ngal ahle suma ngat buzuna kagu ma nga ma ndak nus metred’ina. Zul la nguyumba bubuwat ni nus metred’a, zulut ta i kä d’a ni nus metred’a mi. Vunam ma dalal ma akulo avun zulina fiyagamî santimetred’a dok mbà yam vahl mi. 14Yima ngal ahle suma ngat buzu máma mi ni minda akulo yam tam hindi. Tinï ad’um kä andaga dei gak mba ata ma tuna ni metred’a tu. Kengêm ar rei santimetred’a dok vahl dok vahl ngui woi d’uhl. Tin yam ma tuna i akulo ata dabid’a hi ma mbànid’a, fiyagamî metred’a mbà. Kengêm ar rei santimetred’a dok vahl dok vahl ngui woi d’uhl mi. 15Tin yam ma mbàna i akulo ata dabid’a hi ma hindinid’a, fiyagamî metred’a mbà mi. Yima ngal ahle suma ngat buzuna mi nakulo yam vama hindi máma, a pad’am kengêm ma fid’ina akulo djedjed’eng mi. 16Yima ngal ahle suma ngat buzuna, fiyagam ki bubuwam nabo tazi tu, ni metred’a karagaya karagaya. 17Yam ma mbàna, fiyagam ki bubuwam nabo tazi tu mi, ni metred’a kid’iziya kid’iziya. Vunam ma dalalâ fiyagam mba akulod’a ni santimetred’a dok mbà yam vahl. Santimetre d’a dok vahl hla ad’u kä d’a ni nguid’a woi ki b’irlima. Azi djak akulo ni ki vama nga tinda ndjendjek ma abo ma yorogonina.
18Alona mi dan ala: Ang gor sana, An Salad’a Ma didina nga ni dangû: Vun ma he ma an hangzi yam yima ngal ahle suma ngat buzunina ba wana: Fata a minim wa ni, ar suma a we lovota á he he d’a hawa d’a ngala, á yam buzuna kamba mi. 19Ang he suma ngat buzu suma hi Levi suma ad’u andjafâ hi Sadok suma an hazi vuna á lan sundina gor amuhlâ. Azi hum vama ngat buzuna á fe vat hurâ atanu. An Salad’a Ma didina ni de na. 20Ang gom buzuwam do’, ang dom akulo ata yima ngal ahle suma ngat buzuna kengêm ma adivadif fid’ina nguyum mbei d’uhl. Ang yam buzuna ata vama ad’um kä ma ata kengêm ma fid’ina zlapa ki vunam ma dalalâ mi. Hina wani, ang mba tin yima ngal ahle suma ngat buzuna iram vam kanu.
21Bugola, ang hlamuhl ma a ngad’am á hum he d’a hawad’a yam tchod’ina, ang i ngalam mbei ata yima ding ma a kam iram vam yam sun ndatina woi bugol gong man nda kud’ora. 22Kur bur ma mbàna, ang he mbekmbere ma bei daka ba na vama ngat buzuna á fe hur ma vata atanu. Hina wani, ang mba mbut yima ngal ahle suma ngat buzuna yed’et, ang mba tinim iram vam kan d’igi ang le ki gor amuhlâ na mi. 23Abong le dap wa ata he d’a hawa ndata da ni, ang ve gor amuhl ma bei dakina tu, gamlâ ma bei dakina tu mi, 24ang mbazi avoron an Ma didina. Suma ngat buzuna a ngad’aziya, a tchuk ndjuvuna kaziya, a hazi he d’a hawa d’a ngala mi an Ma didina. 25Ang mba han mbekmberena ki gor amuhlâ ki gamlâna suma bei daka suma aduk d’uwarîna ahle suma ngat buzu suma yam tchod’ina burâ ki burâ gak burâ kid’iziya. 26Hina wani, kur bur ma kid’iziya máma, suma ngat buzuna a hahle suma ngat buzuna á mbut yima ngal ahle suma ngat buzuna yed’et, á tinim iram vam kan mi.
27Bugol bur ma kid’iziya máma, tin ad’ud’a kur bur ma klavandina ar avok hî wani, suma ngat buzuna a han vama ngat buzu ma ngala ki vama ngat buzu ma zlap darigïd’a suma suma a mba handjina yam yima ngal ahle suma ngat buzunina. Hina wani, an mba ni vagi atanu. An Salad’a Ma didina ni de na.
Currently Selected:
Ezekiyel 43: BA
Highlight
Copy
Compare
Share
Want to have your highlights saved across all your devices? Sign up or sign in
Azumeina Bible © Alliance Biblique du Tchad, 1999.
