Buzuk ka Abud’a 36
36
1Besalel, Oholiyap ki suma d’al suma Ma didina mi hazi ned’a ki d’alâ á le sun nda lara ge d’a hi zlub’u d’a kud’orina, a nde le sunda d’igi Ma didina mi he vuna na. 2Moise mi yi Besalel, Oholiyap ki suma d’alâ pet suma Ma didina mi hazi d’alâ pet suma a tin huruzi á le sun ndatina. 3Azi mba a yo he d’a hawa d’a Israel-lâ a hat á le ki sunda hi zlub’u d’a kud’orid’a woi avok Moise. Yorogo d’a lara ge pî suma a nga mba ki he d’a hawa d’a kur min mazid’id’a. 4Ata yi máma suma d’alâ pet suma a nga le sunda hi zlub’u d’a kud’orina, a ar sun mazi d’a a lata, 5a i de mi Moise ala: Suma a nga mba ki he d’a hawad’a ngola kal yam mba Ma didina mi he vuna kat á le ki sundid’a.
6Moise mi he vuna ala a i kur kangâ, a tchi wala ala: Ar mandjuf foze atcha mba ki he d’a hawa d’a yam sunda hi zlub’u d’a kud’orid’a d’uo d’a. Ni hina ba, a d’el suma á mba ki he d’a hawad’a. 7Ahle suma a minizina a ndak memet, kal lei yam sun ndata d’ö.
Zlub’u d’a a tinit irat vat mAlonid’a
8Suma d’al suma a le sun ndatina pet a ve zlub’u d’a a tinit irat vata ni ki baru d’a luluî d’a lalavat ta dogo d’a a tchilit gizeîd’a ki baru d’a botlozid’a ki d’a hleu d’a sisila ki d’a hleu d’a kekenga ndala kangus tcherebê ma sama d’alâ mi minima mi. 9Baru d’a duburok ka lara pî ni metred’a dogo yam fifid’i, bubuwat ni metred’a mbàmbà, nga mata pet nabo tat tu. 10Azi ndjak baru ndata vavahl avun tad’u. 11Baru d’a vahl hla azi ndjagat avun tata, azi tchuk ziyo ma botlozina angogangok ata vunat ma dabid’a, d’a vahl hla mbà d’a azi ndjagat avun tata, a tchuk ziyo ma botlozina angogangok ata vunat ma dabid’a mi. 12Azi tchuk ziyona ango’â avun baru d’a avoka dok vahl, a tchuk ziyona ango’â ata d’a mbàd’a ata vunat ma dabid’a dok vahl mi, a ndjak ziyo ma angok máma avun tam tu. 13Azi yor lor ra vunat gundid’a dok vahl á ndjak baru d’a a walat aduk mbàd’a avun tat tu. Ni hina ba, ti mbut zlub’u d’a tud’a.
14Azi tchil baru d’a mbàd’a ki tumus b’ogeina dogo yam tu á zlup yam zlub’u d’a ngaf tad’a. 15Baru d’a ki tumus b’ogeina ndata fiyagat ni metred’a dogo yam vavahl, bubuwat ni metred’a mbàmbà, nga mata pet nabo tat tu. 16Azi yo barud’a vahl a ndjagat vunat abo tat tu, a yo hi d’a karagaya a ndjagat abo tat tu mi. 17Azi tchuk ziyona ango’â avun baru d’a avoka dok vahl, a tchuk ziyona ango’â ata d’a mbàd’a ata vunat ma dabid’a dok vahl mi. 18Azi yor kawei ma hleu ma vunam gundina dok vahl á ndjak ki baru ndata avun tat tu tala ti mbut ni zlub’u d’a tud’a d’a. 19Azi dup vama zlup yam zlub’ud’a ma hindina ki bak gamlâ ma a tchorom hleud’ina ki bak azar ma aduk mbina kä ma a yum ala dofênina á ged’a kam akulo.
20Azi tchet agu kasiya ma bebed’ena yam zlub’ud’a, a pum akulo. 21Agu ma lara pî fiyagam metred’a vavahl, bubuwam santimetred’a dok kid’iziya yam vavahl mi. 22Ad’u agu ma bebed’e ma lara pî a tchet agu ma vunam fetina kua mbàmbà á b’alam ata tamu, a le hina kagu ma bebed’e ma ata zlub’ud’ina pet mi. 23Azi tchet agu ma bebed’ena dok mbà ata zlub’ud’a abot ma sutna. 24Azi nik kawei ma hapma dok fid’i kä ad’u agu ma bebed’e ma dok mbà máma, kaweina mbàmbà kä ad’u agu ma bebed’e ma lara pî yam agu mam ma vunam feta mbàmbàna. 25Azi tchet agu ma bebed’ena dok mbà ata zlub’ud’a abot ma norâ 26zlapa ki kawei ma hap ma dok fid’i máma mbàmbà yam agu ma bebed’e ma lara ge mi. 27Azi tchet agu ma bebed’ena karagaya ata zlub’u d’a yat ta dabi d’a abo ma fladegenid’a. 28Azi zlap agu ma bebed’ena mbà ata kengêt ma ata yat ta dabid’a máma. 29A zlabam ata tam mbàmbà ad’u kä dei gak akulo, a djinim yam mba akulod’a tu ki kawei ma b’alang b’alangâ, a zlap ma ata keng ma mbàna ni hina mi. 30Agu ma bebed’ena mba mi zlap ata yi máma pet naklavandi; kawei mam ma ad’u kä na pet ni dogo yam karagaya, mbàmbà yam agu ma bebed’e ma lara ge pet.
31Azi tchet agu ma latana hagu kasiyana vahl á ve kagu ma bebed’ena ata zlub’ud’a abot ma tuna akulo, 32vahl ata zlub’ud’a abot ma hina, vahl ata zlub’u d’a yat ta dabid’a abot ma fladegena mi. 33Azi gagu ma lata ma adu’â mi kal yam agu ma bebed’e ma adu’â gak mi ndezi woi abo hî. 34Azi gulut agu ma bebed’ena ni ki lora, a yor b’alang ma agu ma latana kal kurâ ni ki lora mi; agu ma lata máma a gulud’umî ki lora mi.
35Azi tchil baru d’a ka ir ra botlozid’a ki d’a hleu d’a sisila ki d’a hleu d’a kekenga ki d’a luluî d’a lalavata ndala kangus tcherebê ma sama d’alâ mi minima mi. 36A tchet agu kasiya ma murgulina fid’i, a gulud’um ki lora, a yor lor ra vunat gundid’a kam akulo mi, a b’alam kawei ma hapma ad’um kä fid’i, a ve ki baru d’a ka ira akulo mi. 37Azi tchil baru d’a avun zlub’ud’id’a gizeîd’a ki baru d’a par ra botlozid’a ki d’a hleu d’a sisila ki d’a hleu d’a kekenga ki d’a luluî d’a lalavata mi. Sama d’al ma tchil barud’a, mi tchilit ni mamu. 38Azi tchet agu ma murgulina vahl ki djumba kam ki kawei ma ve baru d’a ka ira akulona, a gulud’uzi ni ki lora pet, a yor lor ra vunat gundid’a yam agu ma murgulina akulo, a yor kawei ma hleuna vahl ad’um kä mi.
Currently Selected:
Buzuk ka Abud’a 36: BA
Highlight
Share
Compare
Copy
Want to have your highlights saved across all your devices? Sign up or sign in
Azumeina Bible © Alliance Biblique du Tchad, 1999.
