Buzuk ka Abud’a 34
34
Moise mi hulong tchet ahina d’a bebed’ed’a kua
1Ma didina mi de mi Moise ala: Ang tchet ahina d’a bebed’e d’a dinga mbà d’igi d’a avoka na. An mba ni b’ir zla d’a an dangzi avok kur ra ang tot teid’a kua. 2Ang min tang avin yorogo tcholol, ang djak akulo yam ahina d’a Sinai-d’a, ang tchol akulo avoron yam ahinad’a yat ta ked’iwurenga. 3Ar sa mi djak ki sed’eng ngi, ar sa mi kal yam ahina ndata d’i, ar d’uwar ma gureina d’oze ma nglona mi te ngagad’a go kahina ndata d’uo mi.
4Moise mi tchet ahina d’a bebed’ed’a mbà d’igi d’a avoka na. Moise mi tchol ki yorogo tcholola, mi djak akulo yam ahina d’a Sinai-d’a kahina d’a bebed’ed’a abom mbà d’igi Ma didina mi hum vuna na. 5Ma didina mi tchugï asem kä kur d’ugula, mi tchol gevem go, mi yum simiyêm Ma didina. 6Ma didina mi kal avoromu, nga mi yi simiyêm ala: An ni Ma didina, an ni Ma didina, an nAlo ma we hohoud’a, an nAlo ma sumad’a, an nga ni mbut ayîna atogo d’i, an ni ma djivi manda kal teglesâ, an ni ma d’engzengâ mi. 7An ni ma nga ni ngom djivi man nda ki sumid’a gak kur atchogoi d’a dubud’ina, an ni ma nga ni vat hurun ndei yam tchilad’a, yam tchi matna, yam tcho d’a led’a hi sanid’a, wani an ni ma nga ni ar sama le tchod’a bei ka sariyad’a kam mbuo na, an ni ma nga ni ngop grod’a yam tchod’a habuyozid’ina, an ni ma nga ni ngop grozi ngolona gak kur atchogoi d’a hindid’a ki d’a fid’id’ina mi.
8Moise mi grif kä atogo zak, mi kud’or Ma didina. 9Mi dum ala: Salad’a, le ang wan hohowonu ni, ar ang tit adigamiya, kayam sum ndazina ni suma bei hum vuna, ang vat hurung ngei yam tchila mamid’a ki tcho mamid’a, ang mbud’umi sum mangâ mi.
Ma didina mi djin vunam ki Israel-lâ kua
10Ma didina mi de mi Moise ala: Gola! An nga ni djin vunan ki sed’egiya, an mba ni lahle suma atchap suma a lazi nga yam andagad’a d’oze aduk andjaf suma d’uo na ir sum mangâ. Israel suma a nguyungâ pet, a mba we sun nda ndandal la an mba ni ndagat vunat ki sed’enga.
11Ang gol tang djivi ki vun ma he ma an nga ni hangzi inina. An mba ni dik suma Amor-râ, suma Kanan-na, suma Het-na, suma Peris-sâ, suma Hef-fâ ki suma Jebus-sâ woi avorogiya. 12Agi gologi tagi djivi á djinigi vunagi ki suma agi mba kalagi kur ambas mazid’ina tala azi mbut ni dau ma vagina d’a d’i. 13Wani agi pleyêgi yi mazi ma teteng ma ngal ahle suma ngat buzuna woyo, agi togi filei mazi ma teteng ma tcheta woyo, agi kuzugi filei mazi ma a lum tetengâ woi mi. 14Ar agi grivigi kä avok alo ma ding ngi, kayam an Ma didina simiyên ala Yungôrâ. An nAlo ma yungôrâ mi. 15Ar agi djinigi vunagi ki suma kur ambas ndatina á mbud’ugi tagi ndjendjed’a kalo mazina d’oze á hum ahle suma ngat buzuna d’oze á yagi á tahle suma azi ngad’azi mi filei mazinina d’uo mi. 16Ar agi vigizi grozina mi grogina tala azi mbud’uzi ndjendjed’a á tuwal alo mazina d’oze á lobozi vunazi á mbud’uzi ndjendjed’a kalo mazina d’uo mi d’a.
17Ar agi yorogi alo ma kaweina d’i.
18Agi ngomogi vun til ma a lum kavungô ma bei angufina. Kur burâ kid’iziya, ata yima ngam kur til ma Abip-mina, agi tagi avungô ma bei angufina d’igi an hagi vuna na, kayam ni kur til ma Abip-ma ba, an buzugugï woi kur ambas sa Ezipte-d’a.
19Gro suma agi vud’uzi avo’â pet ni mana, d’uwar magi ma ndjof ma a vud’um avok aduk amuzleinina d’oze aduk aho’îna ni mana. 20Gor koro ma a vud’um avo’â, agi mbud’um ki gor timina. Le sama mi mbud’um nga d’uo ni, agi kuzum mogonomu, agi mbud’ugi yam grogi suma a vud’uzi avo’â pet.
Ar sa mi mba avoron abom hawa d’i.
21Agi lagi sunda burâ karagaya, agi ngomogi bur ma kid’iziya ma sabat ma tuk tad’a. Le ni ata yima zuma d’oze ata yima duta pî, agi ngomomu.
22Agi lagi vun til ma Pantekot-na ata yima agi nga vagi yam awu ma avo’â hi vun til ma duta ata vun dabid’a hi bizad’ina.
23Kur bizad’a tu andjof magina pet a mba tok avoron an Ma didina Alona hi Israel-lîna yazi hindi. 24Ata yima an mba ni dik andjaf suma woi avorogina, an mba ni hud’ugi id’a avogovogo. Sama mba mi le d’od’oka yam ambas magid’a ata yima agi mba togogi avoron an Ma didina Alo magina yagi hindi kur bizad’a tud’ina nga d’i.
25Agi hagi avungô ma a lum kangufina zlapa ki buzuna hi vama agi ngad’andji buzunina d’i. Agi aragi hliu vama agi ngad’am á vun til ma Pa’îna akulo gak yorogo d’i. 26Agi mbagi kahle suma a ne avok kur asinegina kur gonga hi an Ma didina Alo maginid’a, ar agi yagi gor ahuna kambira hasumba d’i.
27Ma didina mi de mi Moise ala: Ang b’ir zla d’a an djin vunan ki sed’eng ki Israel-lîd’a kä kur mbaktumba.
28Moise mi kak sä hî ki Ma didina burâ dok fid’i falei kandjege, mi te nga avu d’uo, mi tche nga mbiyo d’uo mi. Ma didina mi b’ir zla d’a a djin vunazi kata kä kur ahina d’a bebed’e d’a tcheta, nala, vun ma he ma dogona.
Moise mi hulong kur kangâ
29Moise mi tchugï asem kä yam ahina d’a Sinai-d’a, kahina d’a bebed’e d’a tcheta abom mbà. Ata yima mi tchugï asem kä yam ahinad’ina, Moise mi we nga d’ala bugol la mam de zlad’a ki Ma didinid’a, iram nga d’i wile ni wile d’a d’i. 30Ata yima Aron azi ki Israel-lâ pet a we Moise-sâ, gol wani, iram nga d’i wile. Azi le mandarâ á hut gevemu. 31Moise mi yaziya. Aron azi ki suma nglo suma avok toka hi Israel-lîd’a pet a mba gevemu. Moise mi dazi zlad’a.
32Bugola, Israel-lâ pet a hud’ï gevemu, mi vazi ad’u vun ma he ma Ma didina mi humzï yam ahina d’a Sinai-d’ina pet mi.
33Kid’a mi dabazi zla d’a ded’a dapa, mi zlup barud’a woi iramu. 34Ata yima Moise mi kal avok Ma didina á dum zlad’ina, mi yo baru d’a iramba woi gak mi ndabu tua. Ata yima mi nde woi abuna, mi de zla d’a Ma didina mi hum vuna kata mi suma Israel-lâ. 35Israel-lâ a gol ir Moise. Gol wani, iram nga d’i wile. Moise mi hulong barud’a tchuka iram gak ata yima mi kal á de zlad’a ki Ma didinina tua ba, mi yot tei iramu.
Currently Selected:
Buzuk ka Abud’a 34: BA
Highlight
Share
Compare
Copy
Want to have your highlights saved across all your devices? Sign up or sign in
Azumeina Bible © Alliance Biblique du Tchad, 1999.
