Buzuk ka Abud’a 27
27
Yima ngal ahle suma ngat buzuna
1Ma didina mi de mi Moise kua ala: Agi minigi yima ngal ahle suma ngat buzuna ni kagu kasiyana. Agi minimî abo tam tu; fiyagam metred’a mbà ki nus metred’a, bubuwam metred’a mbà ki nus metred’a mi, fiyagam mba akulod’a metred’a tu ki nus metred’a. 2Agi pad’am kengêm ma fid’ina adivadif abo tam tu, agi gulud’umî ki kawei ma hleuna mi. 3Agi lagi yi mam ma ko butna ki pel mama, hal mama, kiyor mam ma siyam hindina kanduru ma yo akud’a. Ahle mam suma sunda pet agi lazi ni ki kawei ma hleuna. 4Agi tchiligi kawei ma hleuna iram ndjâ d’igi abeyabei na, agi nigigi b’alang ma kawei ma hleuna fid’i ata kengêm ma fid’i máma. 5Agi tinigi kawei ma iram ndjâna ei kä ad’u yima ngal ahle suma ngat buzuna dei gak mba akulo huyogom d’ad’ar. 6Agi kagi agu kasiyana karangâlina mbà yam yima ngal ahle suma ngat buzuna, agi gulud’um ki kawei ma hleuna. 7Agi kalagi karangâlina kur b’alang ma nga keng yima ngal ahle suma ngat buzuna mbàmbàna á hlum kakulo. 8Agi lagi yima ngal ahle suma ngat buzuna ni kagu ma bebed’ena, agi aram hurum zula kä hawa, agi lumî d’igi an tagangzi yam ahinad’a kä na.
Baru d’a a gat gulumuna yam zlub’ud’id’a
9Ma didina mi de kua ala: Agi gagi barud’a gulumuna ngui zlub’ud’a, agi lumî ki baru d’a luluî d’a lalavata. Abo ma sutna agi lum fiyagam metred’a dok vahl. 10Agi pagi agu ma murgulina dok mbà ki kawei ma hleu ma a tinim ad’ut kä na dok mbà mi, kawei ma vunam gunda ma yam agu ma murgulinina ki kawei ma lata ma akulo katna, agi lumî ki kawei ma hapma. 11Agi minigi ma ata abo ma norâ fiyagamî hina dedege mi; agi pagi agu ma murgulina dok mbà ki kawei ma hleu ma ad’um kä na dok mbà mi. Kawei ma vunam gunda ma yam agu ma murgulinina ki kawei ma lata ma kam akulona, agi lumî ki kawei ma hapma mi. 12Gulumun máma bubuwam mba abo ma fladegenid’a, agi lat fiyagat metred’a dok mbà yam vahl, agi pat agu ma murgulina dogo ki kawei ma hleu ma ad’um kä na dogo mi. 13Bubuwam mba abo ma yorogonid’a metred’a dok mbà yam vahl mi. 14-15Abom ma hina, agi ngam metred’a kid’iziya ki nus metred’a, abom ma hina, agi ngam metred’a kid’iziya ki nus metred’a mi. Agi pagi aguna kua hindi hindi ki kawei ma hleu ma ad’um kä na hindi hindi mi. 16Agi tchiligi barud’a avun gulumun ma a gum mbei yam zlub’ud’ina ki baru d’a par ra botlozid’a gizeîd’a ki d’a hleu d’a sisila ki d’a hleu d’a kekenga ki d’a luluî d’a lalavata mi. Ar sama d’al ma we barud’a tchilina, mi tchilit ni mamu, mi b’alat akulo ata aguwat ma fid’ina ki kawei mam ma hleu ma ad’um kä na fid’i mi. 17Agu ma atama pet, agi djinimî ki kawei ma hapma; kawei ma vunam gundina ni ma hapma mi, ma ad’u kä na ni ma hleuna mi. 18Agi ngagi fiyaka hi gulumun mámid’a metred’a dok vahl, bubuwam metred’a dok mbà yam vahl, fiyagam mba akulod’a metred’a mbà ki nus metred’a mi. Agi lumî ki baru d’a luluî d’a lalavata, agi lagi kawei ma ad’u agu ma murgulina kä na ni ki kawei ma hleuna.
19Ahle suma a le sunda kur zlub’ud’ina pet ki tcheble ma b’alat ki kä na pet ki ma hi gulumunina pet mi, agi lagizi ni ki kawei ma hleuna.
Mbul lalamba
20Ma didina mi de kua ala: Moise, ang he vuna mi Israel-lâ, a yorongî mbul olif ma d’igila hirwilingâ, kayam lalamba ti ngal burâ ki burâ. 21Ar Aron azi ki groma a tin lalamba kur zlub’u d’a ngaf tad’a avok baru d’a ka ir ra nga avok zanduk manid’a, kayam ti ngal avoron an Ma didina andjege dei gak yorogo. Gat ndata ti arî gat ta didinda yam Israel-lâ kur atchogoi mazid’a pet.
Currently Selected:
Buzuk ka Abud’a 27: BA
Highlight
Share
Compare
Copy
Want to have your highlights saved across all your devices? Sign up or sign in
Azumeina Bible © Alliance Biblique du Tchad, 1999.
