Ester 7
7
Ester ti tchen amulâ yam sum matna, a tchi Haman mi
1Amulâ azi ki Haman a i avo hamula Ester á te te ma luna. 2Kur bur ma mbà máma ata yima azi nga tche süm guguzlud’ina, amulâ mi de mi Ester kua ala: Ndak halî me? Vama ndak minima, an mba ni haksiya. Le nabo leu manda pî, an mba ni haksiya.
3Amula Ester ti dum ala: Amulâ, le tang lang djivid’a kanu, le zla ndata djivid’a irangû ni, ang sud’un ki sum mana. Wana ni tchen manda. 4Kayam ami ki sum mana a guzumi ni woi á b’lagami á tchami woyo, á lud’ud’umi woi mi. Le a guzumi woi ná mbud’umi magumeina go ni, an mba ni de zla d’i. Wani ma djangû mamina mba mi fe lovota á wuragang yam b’lak mamid’a d’i.
5Amulâ Asuwerus mi djop amula Ester ala: Sa máma ni nge? Sama nga hurum á lahle ndazina, mi nga ni lara ge?
6Ester ti dum ala: Ma djangû ma nga mi djobomi vunamina ni Haman ma asa’at ma wana!
Ata yi máma Haman vunadigam pat fek avok amulâ kamula abo mandarâ. 7Amulâ mi tchol akulo avun te ma luna kayîna, mi i kur asine mam ma amula. Haman ar tchola gen Ester á tchenet hur ma vata yam tchi mamba, kayam mam wala amulâ nga wa hurum kam á tchid’a da’. 8Kid’a amulâ mi tcholï kur asine mam ma amula mi mba kur gong nga tenid’a, mi we Haman mi pe nga yam kä ata azang ma Ester nga denga kama. Ata yi máma amulâ mi dala: Ni me na ge? Mi min mi le ni vama tcho kamula Ester avoron ka hî avo hatan ndju?
Kid’a amulâ mi mal vunam á de zla ndata hina d’a, ata yi máma hina wat a ve Haman, a d’ud’um iram mbei ki barud’a. 9Ma dingâ tu aduk azungeîna a yum ala Harbona mi de mamulâ ala: Gola! Haman mi min nga aguna fiyagam mba akulod’a metred’a dok mbà yam vahl yam Mardose ma mi de zla manga djivid’ina.
Amulâ mi dazi ala: A tchugum ziyona kelem akulo ata agu máma!
10A gap Haman akulo ata agu ma mi minim yam Mardose-na. Ata yi máma amulâ hurum b’lengâ.
Currently Selected:
Ester 7: BA
Highlight
Share
Compare
Copy
Want to have your highlights saved across all your devices? Sign up or sign in
Azumeina Bible © Alliance Biblique du Tchad, 1999.
