Ma tchi wala 8
8
1Ni nge ba, ni ma ned’a ge? Ni nge ba, mi we á väd’u ahlena woi ge? Ned’a hi sanid’a ti nga d’i zud’um á le furîd’a, iram mba d’us dudurupa pî, ti mbut djivid’a.
Sama ned’a mi ge yam kä avok amulâ
2An nga ni dangû, ang ngom vun ma hed’a hamulîna, kayam gun nda ang gunum tang avok Alonid’a. 3Ar ang b’at tang á tchila yam vun mam ma hed’a d’i, ar ang ve tang ad’enga á le vama lum tam djivi d’uo na d’uo mi. Kayam mam nga mi lahlena pet suma hurum minizina. 4Zlad’a hamulâ d’a lara ge pet ti nga kad’enga, sama ndak á djobom ala: Ang le na ni me na ge nga d’i. 5Sama nga mi ngom vun ma he mamina, nga mi kal kur ndaka d’i; sama ned’a nga mi we yima ndak á led’a ki lovot ta ndak á led’id’a mi. 6Kayam sun nda le d’a lara ge pet, a mba kat sariyad’a kat bur tu, kayam asa’ata hi sumid’a ti kal kaziya. 7Kayam ndata, sana nga mi we vama nga mi mbana d’i. Ni nge ba, mba mi dum ala: Ahle ndazina a mba mba ni hina ge? 8Sana mi nga kad’enga á d’el simetna d’i. Hina mi, mi ndak á d’el tam bei matna d’uo mi. Ata yima ayî ma durâ mi nga na, sama mi prut tam mbeina mi nga d’i. Hina mi, asa’ata ti ndak á sut salat ma mi latna d’uo mi.
Djib’er ra yam tita hi sanid’a
9An wahle ndazina pet, an he tan ni wahle suma suma a nga lazi yam andagad’a ka hina woi tetet. Yima dingâ mi nga, sana nga mi te yam ndrama á lum ndaka. 10Ata yi máma an we suma a tos suma asa’atna kur zula. Sum ndazina a hulongî a nga suburuzi kur lovota, a mar rei yam sun mazi d’a asa’at ta azi lata. Wana ni sun nda hawa yaka d’ei. 11Ni kayamba a nga ngop sama le sun nda tchod’a atogo zak kuo d’a ba, suma a he tazi á le tchod’a ngola ni na. 12An we le ma le tchod’a, mi le tchod’a yam kis, nga mi te ngola tatâ yam andagad’a pî, an wala suma a nga le mandara Alonina a mba kak ki halasa kayam azi nga le mandarâ avoromu. 13Wani sama asa’atna nga mi kak ki halasa d’i, mba mi te tatâ yam andagad’a d’uo mi, mba mi kal lei atogo d’igi anguzuna mi pretna, kayam mam nga mi le mandarâ avok Alona d’i. 14Ahle suma hawa yak suma a nga le yam andagad’ina ba wana: Sunda hi suma d’ingêrîd’a nga d’i mba yam suma asa’atna, sunda hi suma asa’atnid’a nga d’i mba yam suma d’ingêrâ mi. An nga ni dala: Ndata ni zla d’a hawa yaka d’ei.
15Kayam ndata, an nga ni he ngola mi furîd’a, kayam vama djivi ma yam sana ka hî yam andagad’ina nga d’i. Ni ted’a ki tched’a ki furîd’a hol. Wana ni vama djivi ma ki sed’em kur sun mamba kur bur ma Alona mi humzi yam andagad’a ka hina. 16Ata yima an he tan á we ned’a, á wahle suma a nga le yam andagad’a ka hina, 17ata yi máma an wala le sana d’el tam bei bur sena kandjege ki falei pî, mi ndak a we sunda hAlona pet ta nga mi lat yam andagad’a ka hid’a d’i. Le sana mi halat ki ndaka pî, mam mba mi fat ti. Le sama ned’a mi dala: An fad’u pî, nga mi fat ti.
Currently Selected:
Ma tchi wala 8: BA
Highlight
Share
Copy
Want to have your highlights saved across all your devices? Sign up or sign in
Azumeina Bible © Alliance Biblique du Tchad, 1999.
