Gat ta a hat á mbàd’id’a 7
7
Israel-lâ ni suma a tinizi irazi vazina
1Moise mi dazi kua ala: Ma didina Alo magina mba mi kalagi kur ambas sa agi mba hlata, mba mi dik andjaf ma ablauna woi avorogiya, nala, suma Het-na, suma Girgas-sâ, suma Amor-râ, suma Kanan-na, suma Peris-sâ, suma Hef-fâ ki suma Jebus-sâ, andjaf ma kid’iziya máma, nandjaf ma ablau ma sib’ik mamba kalagina. 2Fata Ma didina Alo magina mba mi hagizi abogi agi duruzi dabazi woid’a, agi djinigi vunagi ki sed’ezi á wazi hohowozi d’i. 3Agi ndjagagi vunagi ki sed’ezi á vigizi d’i, agi hagi grogi suma aropma mi grozina d’i, agi vigigi grozi suma aropma mi grogina d’uo mi. 4Le hina d’uo ni, a mba wal grogina woi ki Ma didina, a mba kud’or alo ma dingâ. Ma didina hurum mba mi zal kagi ngola, mba mi dabagi woi atogo zak mi.
5Wana ni vama agi lum ki sed’ezina: Agi pleyêzi yi mazi ma teteng ma ngal ahle suma ngat buzuna woyo, agi togi angus ahle mazi suma tcheta woyo, agi kuzugi filei mazi ma teteng ma nga tchola avun agre’îna woyo, agi ngalazi filei mazi ma teteng ma a tched’ema woi mi. 6Kayam agi ni suma a tinigi iragi vagi mi Ma didina Alo maginina. Mi managi ni kayambala agi kagagi ni sum mama tazid’a aduk suma yam andagad’a ka hina ped’u d’a.
D’engzenga hi Ma didinid’a yam vun mam ma djinda
7Moise mi dazi kua ala: Nga ni kayambala agi kalagi ni suma kablaud’a ba, Ma didina mi zlap tam ki sed’egi mi managi ni na d’a d’i. Wani agi ni suma akid’eina kal suma dingâ pet. 8Wani Ma didina mi le kagiya, mi ndak vun gun tad’a mi gun tam mabuyogi ngolod’a. Kayam ndata, mi pad’agi woi kad’eng mamba, mi tchugugi akulo woi kur yima a lagi magomba kuana abo Faron amul ma Ezipte-na.
9Agi wagi ala Ma didina Alo magina nAlona, nAlo ma d’engzeng ma nga mi ngom vun mam ma djinda ki djivi mamba yam suma a nga le kam suma a nga ngom vun mam ma hed’a gak kur atchogoi d’a dubud’ina. 10Wani nga mi ngop suma a noyôma, nga mi dabazi woi mi, nga mi le lilinga á ngop sama mi noyôma d’uo mi. 11Agi ngomogi vun ma hed’a ki gat ta teteng nga an hagizi inid’a, agi tid’igi kat mi.
12Wani ata yima agi humugi vun mam ma hed’ina, le agi ngomomu, le agi nga tid’igi kam mi ni, Ma didina Alo magina mba mi ngom vun mam ma djinda ki djivi mam mba mi hle vunam kat mabuyogi ngolod’a ki sed’egi mi. 13Mba mi le kagiya, mba mi b’e vunam kagiya, mba mi zulugiya, mba mi zulugi grogina mi. Andaga magid’a mba d’i wul ahlena, nala, awuna, süm guguzlud’a ki mbul olifâ, mba mi zulugi amuzleina kaho’â yam ambas sa mi gun tam kat mabuyogi ngolo á hagizid’a. 14Ma didina mba mi b’e vuna kagi kal andjaf ma dingâ pet. Sum magina, mandjuf foze atcha d’oze aduk d’uwar magina ma mba mi b’al gendreged’ina nga d’i. 15Ma didina mba mi ngomogi woi abo tugud’ei d’a lara ge pet, mba mi kid’eyêgi iragi ki tugud’ei d’a tcho d’a tchi mat ta agi wad’ï avo Ezipte-d’a d’i, wani mam mba mi tumî ki suma a noyôgina.
16Agi mba dabagi suma pet suma Ma didina Alo magina mba mi hagizi abogina bei wazi hohowozi ba. Agi kud’urogi alo mazina d’i, kayam ni mam ba, mba mi mbut dau ma vagina.
Ma didina ni ma ngom sum mamina
17Moise mi dazi kua ala: Dam agi mba dagi kurugi ala: Andjaf máma mi kalei kablaud’a. Ni nana ba, ei mba digim mbei ge kla. 18Ar agi lazi mandarazi d’i. Agi djib’eregi yam vama Ma didina Alo magina, mi lum ki Faron ki Ezipte-na petna, 19kahle suma nglo suma kuk suma agi wazi ki iragina, kahle suma simata, kahle suma atchapma, kabom ma ad’engâ ki bigam mba zid’a kam akulo zi ata yima mi buzugugï woina. Ma didina Alo magina mba mi le ki suma pet suma a nga avorogi suma agi lazi mandarazi wana ni na mi. 20Ma didina Alo magina mba mi sun azlanguru ma ahlogahlo’â atazi gak mba mi dap suma a ar suma a mba ngei kä avorogina woyo. 21Ar agi zlagagi avorozi d’i, kayam Ma didina Alo magina mi nga adigagiya. NAlo ma ngol ma suma a lum mandarama. 22Ma didina Alo magina mba mi dik andjaf máma woi avorogi nde nde, ar agi dabazi woi atogo zak tala amburei suma abageina a zul zul ba a vigigiya d’a d’i. 23Ma didina Alo magina mba mi hagizi abogiya, mba mi b’rawazi woi avorogi yayak gak a mba dap peyo. 24Mam mba mi hagi amulei mazina abogiya; agi tchazi simiyêzi woi yam andagad’a ka hî. Ma mba mi tchol avorogi tu pî nga d’i gak agi dabazi woyo. 25Agi ngalagi filei mazi ma a tched’em d’igi alona na na woyo, agi lagi d’od’oka yam kawei ma hapma ki lor ra a gulud’uzi ki d’a tala agi yozi yo ba á mbut dau ma vigigina d’a d’i. Kayam ahle ndazina nahle suma ndjendjed’a ir Ma didina Alo magina. 26Ar agi kalagi vama ndjendjed’a avo hatagi tala agi mbud’ugi ndak b’laka d’igi va máma na d’a d’i. Ar agi b’lagam mbeyo, agi golomî vama ndjendjed’a, kayam nahle suma a he vuna kazi á b’lagazi woina.
Currently Selected:
Gat ta a hat á mbàd’id’a 7: BA
Highlight
Copy
Compare
Share
Want to have your highlights saved across all your devices? Sign up or sign in
Azumeina Bible © Alliance Biblique du Tchad, 1999.
