Gat ta a hat á mbàd’id’a 28
28
Vun ma hle ma yam djivid’ina
1Moise mi de kua ala: Le agi gagi yagi kä ad’u zlad’a hi Ma didina Alo maginid’a, le agi ngomogi zla mamba agi tid’igi yam vun mam ma he ma an hagizi inina mi ni, Ma didina Alo magina mba mi tinigi ngola yam andjaf suma yam andagad’ina pet. 2Le agi gagi yagi kä ad’u vun ma hed’a hi Ma didina Alo maginina ni, wana ni vun ma b’e ma mam mba mi b’agizi kagina:
3Mba mi b’e vuna yam suma a mba kak kur azì ma nglonina, yam suma a mba kak abagei kelâ mi. 4Mba mi b’e vunam yam grogina, yam andaga magid’a, yam d’uwar magi ma gureina ki ma nglona mi. 5Mba mi oyôgi gogologei magina kawuna, mba mi oyôgi yi magi ma lavungôna kafuta. 6Mba mi b’e vunam kagi yam i magid’a, mba mi b’e vunam kagi yam hulong magid’a mi.
7Fata magi suma djangûna a tchol dur ayîna ki sed’egid’a, Ma didina mba mi hagi ad’enga á kus kaziya. Azi a mba mba atagi á durâ ni kur lovot ta tud’a, wani azi mba ring avorogi ni ki lovota teteng kid’iziya. 8Ma didina mi b’e vunam yam ahle suma kur avurei maginina, mba mi b’e vunam kagi kur sun nda lara ge pet ta agi mba lagizi kabogid’a, mba mi b’e vunam kagi kur ambas sa mam nga mi hagizid’a mi.
9Le agi tid’igi yam vun ma hed’a hi Ma didina Alo maginina, le agi ngomomu, le agi gagi yagi kä avorom mi ni, agi mba mbud’ugi ni sum mam suma mi tinigi iragi vagina d’igi mam hlagi vunam na. 10Suma pet a mba wala a yagi ni ki simina hAlonina, a mba lagi mandaragiya. 11Ma didina mba mi lagi djivid’a, mba mi zulugi grogina, mba mi zulugi d’uwar magi ma nglona ki d’uwar magi ma gureina yam ambas sa mam gun tam kat mabuyogi ngolo á hagizid’a. 12Ma didina mba mi malagi ir akulod’a woi á sagi alona ata yam kur ambas magid’a, mba mi b’e vunam kagi kur sun nda agi mba lat kabogid’a mi. Andjaf suma dingâ a mba nde balâ abogiya, wani agi mba ndagi bal abo sa d’i. 13Le agi gagi yagi kä ad’u vun ma hed’a hi Ma didin ma an hagizi ini wana, le agi ngomomu, le agi tid’igi kam mi ni, Ma didina mba mi mbud’ugi ni suma avok suma petna, agi mba mbud’ugi suma bugolâ d’i, agi mba tagi yam suma mi. 14Ar agi d’ezegi woi yam vun ma he ma an hagizi ini wana á tchagi ta á igi abo ma ndjuf foze abo ma gula á igi bugol alo ma ding á kud’urom mbuo mi.
Ge hum mba yam ndakid’a
15Moise mi de kua ala: Wani le agi gagi yagi kä avok Ma didina Alo magina d’uo, le agi ngomogi nga vun ma he mama agi tid’igi nga kam mbuo, le agi tid’igi nga yam gat ta pet ta an hagizi ini wanda d’uo mi ni, wana ni vun ma ge ma mam mba mi gagizina:
16Mam mba mi ge vuna mi suma a mba kak kur azì ma nglonina, mi suma a mba kak abagei kelâ mi. 17Mba mi ge vuna mawu magi ma kur gagalagad’ina, mba mi ge vuna mafut magid’a ata yima a nga lavungôna kuana, 18mi grogina, mi andaga magid’a, mi d’uwar magi ma nglona ki d’uwar magi ma gureina mi. 19Mba mi gagi vuna yam i magid’a, mba mi gagi vuna yam hulong magid’a mi.
20Ma didina mba mi gagi vuna kur sun magi d’a lara ge pet ta agi mba lagizi kabogid’a. Agi mba tchagi tatâ, mba mi ngobogiya. Agi mba dabagi woi atogo hina zak, kayam sun nda tcho d’a agi lat noyôm mbeid’a. 21Ma didina mba mi b’alagi tugud’ei d’a tcho d’a tchi matna kagi gak agi mba dabagi woi kur ambas sa agi i hlat á te kat wanda. 22Ma didina mba mi tumugi ki tugud’ei d’a itna ki ta d’a kumura ki tugud’ei d’a hopma. Awu magina mba mi so woyo, mba mi tchora, tcheîd’a mba d’i tchum mbei mi. Ahle ndazina a mba lagi hina gagak agi mba dabagi woyo. 23Akulod’a mba d’i mbut ad’enga kagi ni d’igi kawei ma hleuna na, andagad’a mba d’i mbut ad’enga asegi kä ni d’igi kaweina na mi. 24Ma didina mba mi ar zla d’a mi sagi nalona kagid’a ta, mba mi sagi ni simetna ki guguma; a mba se kagi hina gagak agi mba dabagi woyo. 25Ma didina mba mi he magi suma djangûna ad’enga á kus kagiya, agi mba igi atazi á durâ ni kur lovot ta tud’a, wani agi mba ringîgi avorozi ni ki lovota teteng kid’iziya. Agi mba mbud’ugi ni suma mandarâ avok suma yam andagad’ina pet. 26Mad’agi mba mi mbut ni vama ted’a haluweina kamburei suma yam andagad’ina; sama mba mi digizi woi nga d’i.
27Ma didina mba mi tumugi ki mbil ma Ezipte-na ki tugud’ei d’a a yat ala emerota ki vuyoka ki ta d’a mburdjuk ka bei tchila ba d’a. 28Ma didina mba mi mbud’ugi suma lilid’a, suma duka, suma yazi b’la’â mi. 29Afata falei d’ad’ar pî, agi mba lamagi ahlena kur nduvunda d’igi sama duka mi lam ahlena kur nduvunda na; ahle suma agi ngagi hurugi kazina, agi mba fazi d’i; suma a mba djobogi vunagi ki burâ pet, a mba hurumugi mi. Wani sama mba mi ndjunugina nga d’i.
30Le sa adigagi mi ka atchad’a ni, sama ding mba mi bur ki sed’et ni mamu. Le sama ding adigagi mi min azina ni, sama ding mba mi kak kurî mamu. Le sa adigagi mi pe guguzlud’a ni, mba mi dud’ut vud’ut ta avoka d’i. 31Amuzlei magina a mba ngad’azi kä iragi hina, wani agi mba mud’uzi hliwizi d’i. A mba yo koro magina kad’enga kä iragi hina, a mba hulongôgizi d’i. Magi suma djangûna a mba yo d’uwar magina, wani sama mba á ndjunugina nga d’i. 32Grogi suma andjofâ ki grogi suma aropma, a mba yozi a hazi mandjaf suma dingâ kä iragiya. Iragi mba d’i kau abo gol la ala a mba hulongôzi zi ge d’a, wani ad’engêgi mba d’i dap pei abo gola mi. 33Andjaf suma agi wazi nga yagi tu d’uo na, a mba tawu magina, a mba tahle suma agi mba fazina, a mba djobogi vunagi burâ ki burâ, a mba mired’egi kä kasezi mi. 34Ahle suma agi mba golozi ki iragi ndazina, agi mba kagi guruta aboziya.
35Ma didina mba mi tumugi ki mbil ma bei tchila ba na ata guguvagiya, ata ab’alagiya, mba mi tumugi tinï ad’ud’a ata asegi kä dei gak i kagi akulo mi.
36Ma didina mba mi igi kamul ma agi mba tinigizi kagina aduk andjaf suma agi d’oze abuyogi ngolo a wazi nga yazi tu d’uo na. Ata yi máma agi mba kud’urogi alo ma ding ma ahinad’a ki ma aguna. 37Agi mba mbud’ugi ni vama atchapma, vama lasa ki vama sanda aduk andjaf suma Ma didina mba mi igi adigazina.
38Agi mba zaragi awuna ngola kur asinegiya, wani agi mba dud’ugi nakid’eid’a, kayam me djera mba d’i b’lagam mbeyo. 39Agi mba pagi guguzlud’a, agi mba lat sunud’u, wani agi mba tchat sumut ti, agi mba dud’ut vud’ut tuo mi, kayam ndjuvulâ mba mi dabat ted’a. 40Agi mba pagi agu olifâ kur ambas magid’a pet, wani agi mba fagi mbul ma lá atagi d’i, kayam olifâ mba mi galal lei avok bei ned’a. 41Agi mba vud’ugi gro andjofâ ki gro aropma, wani a mba kak ki sed’egi d’i; a mba yozi magomba izi yam ambas sa dinga. 42Vud’agu magina kawu magina, a mba mbut ni tena habureinina.
43Angoyogei suma a mba kak adigagina, a mba i avogovogo, a mba kalagi kad’enga, wani agi mba dadagagi woi bugolo. 44Agi mba ndagi balâ aboziya, azi mba nde va abogi d’i. Azi mba ka’î suma avo’â, agi mba kagagi ni suma bugolâ.
45Ma didina mba mi gagi vuna hina baba, agi mba dabagi woyo, kayam me agi mba gagi yagi kä avok Ma didina Alo magina á ngom vun ma he mama ki gat mam mba mi hagizi ala agi tid’igi kad’u d’a d’i. 46Gat ndata mba d’i arî d’igi vama ge humba na kagi agi kandjavagiya.
47Le agi lagi nga sunda mi Ma didina Alo magina ki furîd’a ki hur ma tuna ata yima agi nga kur duzîd’ina d’uo ni, 48agi mba lagi magomba mi magi suma djangû suma Ma didina mba mi sunuzi atagina ki meid’a ki vun ma sod’a ki gandilad’a. Agi mba kid’agagi woi ata ahlena pet. Ma didina mba mi gagi djuk ma kaweina kelegi gak agi mba dabagi woyo. 49Ma didina mba mi tcholï kandjaf ma dei ma sä avun dabid’a handagad’a ma agi nga humum vunam mbuo na. Mba mi sir asem kagi kä d’igi agigilauna mi sir asem yam vama mi vuma na. 50Ni suma irazi ti d’us hina gugurup suma a nga ge yazi kä avok momorogeina d’uo suma a nga we hohowa gogor ruo mi na. 51Azi mba yogi d’uwar magina kawu magina; agi mba bogi woi abo meid’a. Azi mba aragi awu magi d’oze süm guguzlu d’oze mbul loze d’uwar magi ma nglona groma d’oze magi ma gureina groma d’uo mi gak agi dabagi woyo. 52Azi mba nguyugi kur azì ma nglo ma lara ge pet ma yam ambas sa Ma didina Alo magina mba mi hagizid’ina, a mba durugi gak a to gulumun ma fiyak ma ad’eng ma agi tinigi hurugi kam ala agi mba ngeyegi kuana woyo. Azi mba nguyugi kur azì ma nglo ma lara ge pet ma yam ambas sa Ma didina Alo magina mba mi hagizid’ina. 53Fata magi suma djangûna a mba nguyugi a mba lagi ndakid’a, agi mba mud’ugi grogi suma kurugina, agi mba mud’ugi hliwa grogi suma andjofâ ki hliwa grogi suma arop suma Ma didina Alo magina mba mi hagizina. 54Sama adigagi ma halas ma wäd’u zlad’a heîna, mba mi d’us iram ata b’oziyoma, ata amam mba mi le kat heîd’a ki grom suma a mba ar aboma mi. 55Mi min he hliwa grom suma mam nga mi mud’uzina mi sa tu adigazi d’i, kayam va mam ma ding ar nga d’i abo ndak ka magi suma djangûna a mba lagizi ata yima a mba nguyugi aziyaginid’a. 56Atcha d’a halas sa wäd’u zlad’a heîd’a ti min tin aset kä andaga d’uo d’a, mba d’i d’us irat ata ndjuvut ma ndat le kam heîna ki grotna ki gorota. 57Ti mba d’i d’el grot suma ndat ti vud’uzina á mut gor ma ndat vud’um awilina ki oto’oma ki sed’ed’u, kayam ndat mba d’i te te matna ni gumunu, kayam ndat nga ki vama te ma ding ngi abo ndak ka magi suma djangûna a mba lagizi ata yima a mba nguyugi aziyagina.
58Le agi ngomogi nga vun ma hed’a hi gata pet ma a b’irim kur mbaktum mba wandina d’uo, le agi tid’igi nga kam mbuo, le agi lagi nga mandara simi ma subur ma kal papana hi Ma didina Alo maginina d’uo mi ni, 59Ma didina mba mi tumugi agi kandjavagi ki mbil ndod’ina ki tugud’ei d’a nglo d’a teteng nga hagi djib’erid’a.
60Ma didina mba mi mba ki tugud’ei d’a tcho d’a tchi mat ta Ezipte d’a agi zlagagi avorota; ti mba d’i arî b’ala kagi na. 61Ma didina mba mi mba kandjaf tugud’ei d’a lara ge ki mbil ma a dum nga zlam kur mbaktum mba gat ta wanda d’uo na gak agi dabagi woyo. 62Agi zulugi nablaud’a d’igi tchitchiud’a hina wan pî, agi mba aragi nakid’eid’a hina yegre, kayam agi mba gagi yagi kä ad’u Ma didina Alo magina d’i. 63D’igi Ma didina tam lum djivid’a á lagi djivid’a á zulugi hina mi, tam mba lum djivid’a á dabagi woi á b’lagagi woi na mi. A mba yogi woi yam ambas sa agi nga igi á hlat á te kat wanda. 64Ma didina mba mi b’rawagi woi yayak aduk suma dingâ tinï ad’ud’a avun dabid’a handagad’id’a abo hî dei gak nde woi abo hî. Agi mba kud’urogi alo ma ding ma agi d’oze abuyogi ngolo a wum nga yazi tu d’uo ma ahinad’a ki ma aguna. 65Aduk andjaf sum ndazina agi mba kagagi tchugot ti, agi mba fagi yima kak ma djivina d’i. Ma didina mba mi pad’agi vunadigagi fek; agi mba mbud’ugi hohoud’a, agi mba kagagi ni ki yor tad’a mi. 66Agi mba kagagi navun matna teteu, agi mba lagi mandarâ andjege ki faleya, agi mba dagi ala: Ami wani mba sud’umi d’uo. 67Yorogo agi mba dagi ala: Ladjï ni fladege ni d’ö ge, fladege agi mba dagi ala: Ladjï ni yorogo ni d’ö ge, abo mandar ma mba mi oî kurugi abo ahle suma agi mba wagizi ki iragina. 68Ma didina mba mi hulongôgi yod’a ki batod’a, mi igi Ezipte. Agi mba wagi lovot ta an dagi kat ala agi mba wat tuo d’angû d’a. Ata yi máma agi mba halagi lovota á guzugi tagi woi abo magi suma djangûna d’igi magumeina na, wani agi mba fagi sama guzugina d’i.
Currently Selected:
Gat ta a hat á mbàd’id’a 28: BA
Highlight
Copy
Compare
Share
Want to have your highlights saved across all your devices? Sign up or sign in
Azumeina Bible © Alliance Biblique du Tchad, 1999.
