Gat ta a hat á mbàd’id’a 19
19
Azì ma nglo ma ngei tad’a
1Moise mi de kua ala: Fata Ma didina Alo magina mi dap andjaf suma mam nga mi hagizi ambas mazid’a woi ata yima agi digizi woina, agi kagagi kur azì mazi ma nglona, agi kagagi avo hatazina mi d’a, 2ata yi máma agi managi azì ma nglona hindi kur ambas sa Ma didina Alo magina nga mi hagizi agi hlat wanda. 3Agi gagi lovota, agi walagi andaga d’a Ma didina Alo magina nga mi hagizid’a kä ad’u hindi kayambala sama lara ma tchi matnina, mi ring mi ngei tam kua d’a.
4Wana ni lovot ta sama tchi matna mi ring kur azì máma á sut tam ata yima mi tchi ndrama bei min mamba bei mi vum kurum avok ba na: 5Le sana mi i abagei ka aguna ki ndrama, mi nde ka aguna, wani andjetna siyam pat mi nde yam ndrama mi tchumu ni, sa máma mi ring kur azì ma ngol ma ding tu hazì mámina, mi sut tam 6kayambala le yina dei kla ba, ma sä atchugula kur hur mam ma zala, mi digim mi fum mi tchum mbuo d’a, kayam ma tchi ndrama máma mi vum nga kurum avok ki. 7Ni kayam ndata ba, an hagi vuna ala: Agi managi azì ma nglona hindi ni na. 8-9Wani le agi ngomogi vun ma he ma pet ma an hagizi inina, le agi tid’igi kamu, le agi lagi yam Ma didina Alo magina, le agi gagi yagi kä á le min mamba teteu mi ni, mam mba mi igi andaga magid’a avogo, mam mba mi hagi ambasa pet ta mam hle vunam kat mabuyogi ngolo á hagizid’a. Ata yi máma agi mba managi azì ma nglona kua hindi yam ma avok ma hindi ma ngei ta máma. 10Hina wani, a mba tchi sama bei zlad’a kama kur ambas sa Ma didina Alo magina nga mi hagizi agi hlat wanda d’i. Hina wani, zlad’a mba d’i vagi d’uo mi.
11Wani le sana mi ve ndrama kurumu, mi i burum kä, mi nde kam mi tchumu ni, le mi ring kur azì ma ngolâ tu hazì mámina pî, 12suma nglo suma kur azì mam ma ngolîna a sun atamu, a vumïya, a hum abo sama sä atchugula mi tchum mbeyo. 13Agi dugugi iragi woi kamu, agi wum hohowom mbi. Hina wani, agi mba d’elegi Israel-lâ á tchi sama bei zlad’a kama, agi mba kagagi ki halasa mi.
Ir hagad’a hi yinid’a
14Moise mi de kua ala: Fata agi kagagiya wa yam andaga d’a a mba b’rawagizi d’a Ma didina Alo magina mba mi hagizi agi hlata da ni, ar agi djogogi ir haga d’a a ngagizi avok ki ndroginid’a d’i.
Suma glangâsâ
15Moise mi de kua ala: Glangâsâ hi sama tunina, mi ndak nga á ve sama le tchod’a ki zlad’a d’i. Le tcho d’a tchi matna d’oze tcho d’a lara pî d’a mi lata, glangâs ma ve sana ki zlad’ina ni suma mbà d’oze suma hindi tua.
16Wani le sama glangâs ma aboina mi tchuk zlad’a yam tcho d’a sana mi lata ni, 17suma mbà ndazina a i ki zla mazid’a avok Ma didina avok suma ngat buzuna ki suma ka sariya suma a nga le sunda kur bur mámina. 18Suma ka sariyad’a a hal ad’u zla ndata djiviya. Ma glangâs máma, le mi le glangâs ma aboina yam ndrama ni, 19ata yi máma agi lagi ki sed’em d’igi mam nga hurum á le ndrama na mi. Hina wani, agi mba d’elegi tcho d’a led’a woi adigagiya. 20Suma dingâ a mba hum hina, wani a mba le mandarâ, sa mba mi le tcho d’a tchi matna adigagi d’uo d’a. 21Agi dugugi iragi woyo, agi wagi hohowa sa d’i. Sama tchi sanina, agi tchum mbeyo; sama tcho ir ndramina, agi tchom mamba mi; sama kus sï ndramina, agi kuzum mama mi; sama kus abo ndramina, agi kuzum mama mi; sama kus asem ndramina, agi kuzum mama mi.
Currently Selected:
Gat ta a hat á mbàd’id’a 19: BA
Highlight
Copy
Compare
Share
Want to have your highlights saved across all your devices? Sign up or sign in
Azumeina Bible © Alliance Biblique du Tchad, 1999.
