Gat ta a hat á mbàd’id’a 14
14
Alona mi d’el tchi mat ma a tchim ata yam mbuo na
1Moise mi de kua ala: Agi ni Ma didina Alo magina groma, agi ngad’agi tagi kahle suma sïna d’oze welegi yagi woi yam mat ma tchid’a d’i. 2Kayam agi ni suma a tinigi iragi vagi mi Ma didina Alo maginina, Ma didina Alo magina mi managi á kak sum mama tazid’a aduk suma pet suma yam andagad’ina.
Ahle suma ndak á mutna kahle suma ndak á mutna d’uo na
3Moise mi de kua ala: Ar agi mud’ugi vama ndjendje d’i. 4Wana nahle suma agi mud’uzina: amuhlâ, timina, b’ëna, 5azar ma a yum ala serfena#14.5 azar ma a yum ala serfena: Nala, ki vun francais-na a yum ala Cerf., du’â, azar ma a yum ala daima#14.5 azar ma a yum ala daima: Nala, ki vun francais-na a yum ala Daim., ahu abeid’a, dewed’a, gayangâ ki pandrid’a mi. 6Azurei suma abozi mi graka suma a gihl hatnina pet, agi mud’uziya. 7Wani agi mud’ugi ni suma abozi grakina go d’i, suma a gihl hatnina go d’uo mi. Ahle suma agi gologizi nahle suma ndjendjed’ina ba wana: djambala, aveveta ki mumuruguma, kayam a gihl hatna, wani abozi mi nga graka d’i. 8Ar agi mud’ugi kozongâ d’i; abom graka ko, wani nga mi gihl hatna d’i. Ar agi mud’ugi ahle ndazina d’i, agi dozi harazi d’uo mi.
9Ahle suma aduk mbina suma agi tazina ba wana: Agi tagi ni kuluf ma ki djedjerem ki b’logom ma nga aduk alum ma nglona kalum ma gureinina mi. 10Wani ahle suma a nga ki djedjerâ ki b’lo’â d’uo na, agi tazi d’i, agi gologizi nahle suma ndjendjed’a.
11Aluwei suma yed’etna pet, agi mud’uziya. 12Wani suma agi mud’uzi d’uo na ba wana: B’aruna, agigilauna ki b’aru ma vik kulufâ, 13araka, tokseid’a, aba’â kandjavam pet mi, 14gagauna kandjavam pet, 15arigeta, atukturuna, akeketna ki bolona kandjavam pet mi, 16tchohôd’a, iwiud’a, alei sïna#14.16 alei sïna: Nala, ki vun francais-na ala Cygne., 17bud’ufa, kokorona, madjepma, 18taglarâ, garuma kandjavam pet mi, alei d’a hle tat d’igi bizikorona na d’a kabebeina.
19Ahle suma giging suma a dram kä na pet, agi golozi nahle suma ndjendjed’a, ar agi mud’uzi d’i. 20Aluwei suma yed’etna pet, agi mud’uziya. 21Agi mud’ugi vama mat ti. Agi hagizi ni mangei ma nga avo hatagina, kayam mi mud’umu, d’oze agi guzum mbei abo angeina, kayam agi ni suma a tinigi iragi vagi mi Ma didina Alo maginina. Ar agi yagi gor ahuna kambira hasumba d’i.
Gat ta hat yam dimid’a
22Moise mi de kua ala: Kur biza d’a lara ge pet, agi pad’agi vun dima hahle suma agi fazi kur asinegina. 23Agi mba tagizi avok Ma didina Alo magina ata yima mam mba mi manam á tin simiyêm kuana, nala, dima hawu maginina, hi süm guguzlu magid’ina, hi mbul maginina, gro d’uwarâ hi d’uwar magi ma nglona ki d’uwar magi ma gurei ma a vut avo’â mi, kayambala agi had’agi á le mandara Ma didina Alo magina burâ ki burâ d’a. 24Fata Ma didina Alo magina mi b’e wa vunam kagi mi zulugiya wa ahlena duzî ba, agi ndak á i ki dima gak ata yima mam mba mi manam á tin simiyêm kuana d’uo abo yagi ma deina ni, 25agi guzugi dim máma woyo, agi igi ki bege ndata ata yima Ma didina Alo magina mi manam á kud’urom kuana. 26Ni kua ba, agi mba guzugi ahle suma agi minizina, nala, d’uwar ma nglona ki ma gureina, süm guguzlud’a ki süm ma ding ma ayîna. Agi ki sum magina, agi tagizi avok Ma didina Alo magina ki furîd’a. 27Ar agi maragi yam ma hi Levi ma mba mi kak avo hatagina d’i. Kayam mam nga ki b’raud’a d’oze djo ma te zlapa ki sed’egi d’i.
28Kur dabid’a hi biza d’a hindid’a, agi mbagi ki dim ma kur biza d’a hindi ndatina, agi tchugum kä kur azì ma agi mba kagagi kuana. 29Ma hi Levi ma nga ki b’raud’a d’oze djo ma te ki sed’egi d’uo na, angeina, ma hokuyod’a, katcha d’a modonod’a suma a mba kak avo hatagina, a mba mba, a tumu, a hoba, kayambala Ma didina Alo magina mi b’e vunam kagi kur sun nda lara ge pet ta agi mba lat kabogid’a d’a.
Currently Selected:
Gat ta a hat á mbàd’id’a 14: BA
Highlight
Copy
Compare
Share
Want to have your highlights saved across all your devices? Sign up or sign in
Azumeina Bible © Alliance Biblique du Tchad, 1999.
