Daniel 10
10
Vama hindina: Sama tchuk baru d’a luluîd’a atama
1Kur biza d’a hindi d’a Sirus amul ma Perse-na nga mi tamulid’a, a ndäd’u zlad’a woi mi Daniel ma a yum ala Beltasar-râ. Zla ndata ni zla d’a gagazid’a. A dum ala: Ayî ma ngolâ nga mi mba. Daniel mi ve zla ndata, mi wäd’u vama nde tam mbei irama mi.
2Ata yi máma an Daniel ni kak kur yor tad’a gak dimasa hindi. 3Kur dimas sa hindi ndata, an te nga te ma djivi d’oze ni mut nga hliu d’oze ni tche nga süm guguzlu d’oze ni le nga mbul atan nduo mi. 4Kur bur ma dok mbà yam fid’ina hi til ma avo’îna, an nga avun alum ma ngol ma Tigre-na. 5An hle iran akulo, an gol yina, an gol wani, sana mi tchuk baru d’a luluîd’a atamu, mi djin d’ik ma lor ra bei zozota ba d’a furum mi. 6Tamî d’igi ahina d’a guzut kal teglesa na, iram wile ni d’igi wiled’a halonid’a na, iram mba gola ni d’igi sin akud’a na, abom kasem a wile ni d’igi kawei ma hleu ma a hegem mbeina na. Ata yima nga mi de zlad’ina, an hum delem nga d’i siwel d’igi dela hablaud’id’a na. 7Wani ni an Daniel tu ba, ni we vama nde tam mbei iran máma. Suma ki sed’ena a we nga vama nde tam mbei iran máma d’i. Wani a mbut mandarâ heheb’ek, a nde ring á ngei taziya. 8An ar van tu á gol vama ngol ma nde tam mbei iran máma. Wani ad’engên nga d’i, tan tchuk susub’ok, ad’engên dap pei pepet mi. 9Ata yima an hum sa máma delem mba de zlad’ina, an hak hik, an puk kä ki iran andaga. 10Ata yi máma abo sana mi donu, mi tcholon akulo ki guguvan kabonu, wani an nga ni zlak tua. 11Bugola, sama mi tchuk baru d’a luluîd’a atama, mi dan ala: Daniel, ang ma Alona mi le kang heîna, ang hum zla d’a an nga ni dangzid’a, ang tchol akulo ata yima ang nga kuana. Ki tchetchemba, a sunun ni gevengû. Ata yima an hum zla ndatina, an tchol akulo, nga ni zlaga.
12Mi dan kua ala: Daniel, ang le mandar ri. Tin ad’ud’a kur bur ma avok ma ang mbut tang hohoud’a ang ge yang kä avok Alo mangâ á wäd’u vama lena, mi hum tchen manga. Kayam ndata, an mbeï geveng ná hang humba. 13Wani amul ma kur leu d’a Perse-d’ina mi tchol ad’enga ki sed’en gak burâ dok mbà yam tu. Wani Michel ma ngol ma aduk malaika suma nglonina, mi mba mi ndjununu, kayam amul ma kur leu d’a Perse-d’ina mi d’elen nga kaka gevem kä. 14Ki tchetchemba, an mba nala ang wäd’u ahle suma a nga mba yam sum mangâ kur atchogoi d’a nga d’i mbad’ina d’a. Kayam vama nde tam mbei irang máma mi de zlad’a yam vama nga mi mbana.
15Ata yima nga mi dan zla ndatina, an pe iran kä andaga. An nga ni gol ki vunan ma du’â. 16An gol sama dingâ mi hle tam d’igi sana na, mi don vunanu. Vunan mi hulong mal leyo, an de mi sama nga tchola vorona ala: Salana, ni kayam vama nde tam mbei irana ba, djib’er manda b’lak ngola, ad’engên nga d’uo wana. 17Ni nana ba, an mala ni sana na ni ndak á de zlad’a ki ang salana ata yima ad’engên nga d’uo muzugan ka ndat mi na ge? 18Ata yi máma hina wat ma mi hle tam d’igi sana na na mi don vunan kua, mi han ad’enga. 19Bugola, mi dan ala: Ang ma Alona mi le kang heîna, ar ang le mandar ri. Ar ang kak ki b’leng nga halasa, ang ve tang ad’enga, ang ve tang ad’enga.
Ata yima nga mi dan zlad’ina, an hulong fad’enga. An dum ala: Ang de, kayam ang han ad’enga da’.
20Mi djobon ala: Ang we d’op zla d’a an mba geveng kata zu? Ki tchetchemba, an nga ni hulong á dur ayîna kamul ma Perse-na. Ata yima an ina, amul ma Gre’â nga mi mba. 21Wani an nga dang vama a b’irim kä kur mbaktum mba gagazid’ina. Sama mi ndjunun á dur ki suma djangû ndazinina nga d’i, ni ma ngol magina Michel hol.
Currently Selected:
Daniel 10: BA
Highlight
Copy
Compare
Share
Want to have your highlights saved across all your devices? Sign up or sign in
Azumeina Bible © Alliance Biblique du Tchad, 1999.
