Amos 9
9
Vama vahl ma nde tam mbei ir Amos-sâ
1An we Salad’a mi nga tchola yam yima ngal ahle suma ngat buzuna, mi dala: Agi tumugi agu ma murgulina yam mba djumba, ar agu ma avun gong nga kud’orina mi giged’a!
An mba ni kuzuzi yazi woi pet;
ad’uzi d’a ara, an mba ni tchazi woyo.
Sa tu pî mba mi ndak á ring ngi,
sa mba mi sut tu d’uo mi.
2Le azi kal kä ata yima azuleina pî,
an mba ni i kua ni yoziya;
le azi dja’î akulo pî,
an mba ni tchuguzi asezi kä.
3Le azi i ngei akulo yam ahina d’a Karmel-la
yat ta ked’iwurenga pî,
an mba ni halazi kua, ni vigiziya;
le a ngei iran kä kur alum ma ngolâ pî,
an mba ni he vuna mi gugui ma aduk mbina kä na
mba mi ed’eziya.
4Le mazi suma djangûna a yozi a izi avo hatazi pî,
an mba ni he vuna a mba tchazi sä kua,
an mba ni tin iran kazi ná lazi djivid’a d’i,
wani ná lazi tchod’a.
5Salad’a Ma didin ma ad’engêm kal petna,
mi tin abom yam andagad’a, ti giged’a;
suma a nga kaka katna pet, a nga yor taziya.
Ti hop akulo ki zla tat pet d’igi alum ma Nil-lâ na,
ti mba d’i hulong kä d’igi alum máma na mi.
6Alona mi min yam ma kaka sä akulo,
mi tin hur alo mama kä yam andagad’a,
nga mi yï mbiyo alum ma ngolâ,
nga mi kus sei yam andagad’a.
Simiyêm ala Ma didina.
Sariya d’a ka d’a yam suma a le tchod’ina
7Ma didina mi dala: Agi Israel-lâ,
agi iran ni d’igi suma Etiyopi-na na d’uo zu?
Ni an ba ni buzugugï woi yam ambas sa Ezipte-d’a
d’igi an buzugï suma Filistê-na woi Kaftor na,
d’igi an buzugï suma Siri-na woi Kir na mi d’uo zu?
8Gola! An Salad’a Ma didina iran nga tinda
yam leu d’a le tchod’a,
an mba ni b’lagat tei yam andagad’a.
Hina pet pî, an mba ni dap andjafâ hi Jakob-ma woi pet ti.
9Gola! An he wa vuna, a mba yik Israel-lâ
aduk andjaf suma d’igi a yik awuna na
bei ir nde kä andaga tu ba.
10Suma pet suma a le tchod’a aduk sum mana
suma a nga dala: Ndaka mba d’i mba kami d’i
d’oze mba d’i domi d’uo mi na,
a mba tchazi avun ayîna.
Zla d’a bugol b’lakid’a
11Ma didina mi dala: Kur bur máma
an mba ni hulong min yima kaka hi David ma mi dris kä woina akulo,
an mba ni min ir gulumun ma tcho woina akulo,
an mba ni min yima b’lak keina akulo,
an mba ni minim d’igi adjeud’a na.
12Kayam azi hle suma Edom suma arâ
kandjaf suma dingâ pet
suma a nga yan simiyêna.
An Ma didin ma nga ni ndak
vun ahle ndazinina ni de na.
13Ma didina mi dala: Burâ nga mi mba,
kur bur máma ma zuma
mba mi tes ma zed’a ped’et,
ma miret guguzlud’a
mba mi tes ma zarat kä na ped’et mi.
Süm guguzlu d’a awilid’a
mba d’i djangî akulo yam ahuniyôna
gak mi hle yam yima ndingâ woi pepet.
14An mba ni hulongî
man suma Israel-lâ woi kur magomba.
A mba min azì ma nglo ma b’lak keina akulo,
a mba kak kuru,
a mba pe guguzlud’a,
a mba tchat sümud’u,
a mba zum asinena,
a mba tum awu máma mi.
15An mba ni hulong pe sum mana
yam andaga mazid’a.
Sa mba mi pad’azi woi
yam andaga d’a an hazizid’a d’uo d’a.
Wana ni zla d’a an Ma didina Alo magina ni data.
Currently Selected:
Amos 9: BA
Highlight
Copy
Compare
Share
Want to have your highlights saved across all your devices? Sign up or sign in
Azumeina Bible © Alliance Biblique du Tchad, 1999.
