Amos 3
3
Suma hAlonina a mba mba ki zla mazid’a avoromu
1Agi Israel-lâ,
agi andjaf ma an buzugumi woi
yam ambas sa Ezipte-d’ina,
agi humugi zla d’a an dagizid’a.
2Ni agi hol ba, an managi aduk andjaf suma pet.
Ni kayam ndata ba, an mba ni mba á ngobogi yam tcho d’a agi lata.
Ma didina mi de zlad’a; ma djok vuna mi ba vunam mbi
3Suma mbà a tit ad’u tazi
ni bei zla mazid’a ndjak su?
4Azlona bei mi ve va ba ni,
mi to breîd’a aduk agud’a zu?
Gor azlona bei mi ve va ba ni,
mi er ad’um tchina ata yam ma domina zu?
5Aleina mi ve ki dauna
ni bei a gunum kä zu?
Dauna mi yet akulo ni bei mi ve va zu?
6Le adif fa ayîna ti tchi kur azì ma ngolâ ni,
suma a ba bei le mandarâ zu?
Na ni ndaka ti mba kur azì ma ngolâ
bei Ma didina mi wat tchu?
7Gagazi, Salad’a Ma didina nga mi le va gumun
bei mi tagam mbei mazungeî mam suma djok vuna d’i.
8Azlona le mi breyâ ni,
ni nge ba, mi le mandarâ d’uo ge?
Salad’a Ma didina le mi de ni,
ni nge ba, mi djogom vunam mbei d’uo ge?
B’laka hi Samari-d’a
9Agi tchagi wala akulo
yam azì ma amul ma Asdot-na,
yam azì ma amul ma Ezipte-na ala:
Agi togogi tagi akulo yam yima nding ma Samari-na,
agi gologi siwel la gandjaud’a
ki murud’um mba a nga lat ata tazid’a.
10Ma didina mi dala:
Azi nga we lovota á le sun nda ata yata d’i,
a nga tok ahle suma a b’ad’azi
abo suma kad’enga a hurumuzina
kur azì mazi ma amula.
11Ni kayam ndata ba, Salad’a Ma didina mi dala:
Gola! Agi suma Samari-na,
ma djangûna nga mi ngui ambasa,
mba mi b’lagagi aziyagi
ma ad’eng ma ngunguna woyo,
mba mi hurum ahle suma
kur aziyagi ma amulina mi.
Sut ta hohoud’a
12Gola! Ma didina mi dala:
A mba sut Israel suma a nga kaka kä Samari
yam azangâ ki tapi ma djifîna,
ni d’igi ma pola mi prut asema mbà
d’oze abo humba avun azlona na.
Ge humba
13Salad’a Ma didina Alo ma ad’engêm kal petna mi dala:
Agi humugiya, agi i dagi zla d’a wanda
woi mandjafâ hi Jakob-ma:
14Kur bur ma an mba ni mba á ngop Israel-lâ yam tcho mazid’ina,
an mba ni to yima ngal ahle suma ngat buzu ma Betel ma tetengâ kä woyo,
kengêm ma djidjid’engâ mba mi dris kä woi andaga mi.
15An mba ni to azì ma andolâ
kazì ma vun simetnina kä woyo.
Azì ma a d’udjom ki sï ahlo’îna mba mi b’lak keyo,
azina hi suma nglonina a mba tom kä woi ndjandjap.
An Ma didina ni de na.
Currently Selected:
Amos 3: BA
Highlight
Copy
Compare
Share
Want to have your highlights saved across all your devices? Sign up or sign in
Azumeina Bible © Alliance Biblique du Tchad, 1999.
