2 Samuel 4
4
Bäna azi ki Rekap a tchi Isebäl
1Kid’a Isebäl Saul goroma mi hum ala Apner mi mit sä Hebron mi d’a, mi mbut amangeîd’a; Israel-lâ pet a mbut mandarâ hehebek mi.
2Isebäl Saul goroma mi nga ki nglo d’a avok azigarîd’a mbà. Ma hina a yum ala Bäna, ma hina a yum ala Rekap; azi ni Rimon ma Bërot ma ad’u andjafâ hi Benjamin-nina groma. 3(Ambas sa Bërot-ta a ndumut ni mi suma Benjamin-na. Suma Bërot suma adjeu ndazina a ring a i Gitayim, a kak sä kua gak ini.) 4Jonatan Saul goroma goroma nga, a yum ala Mefibäl. Kid’a a hum zla matna hi Saul azi ki Jonatan-na avo Jisreyel-lâ, bizamî vahl. Atcha d’a hum tenid’a, ti hlum á ring ki sed’emu. Ata yima nga d’i b’at tat á ringîna, mi nde kä abod’u, mi mbut gugutud’a.
5Rekap azi ki Bäna Rimon ma Bërot-na groma a i ki faleid’a avo hi Isebäl; mi nga burâ kä á tuk tam faleya. 6Azi kal krovo kur gonga d’igi a yo nawuna na, a tchogom hayam tup. Rekap azi ki wiyema Bäna a ringâ. 7Nala, kid’a Isebäl nga mi tuk tam yam azang mama kur gong mam mba burîd’a, azi kal kur gonga krovo, a tchogomu, a tchumu, a ngad’am yamu, a hlad’u, a hle lovot ta Araba-d’a, a tit kandjeged’a baba, 8a mbaza ki yam Isebäl mi David avo Hebron, a dum ala: Amulâ, ang gol yam Isebäl Saul goroma wana. Mang ma djangû ma min á tchangâ, Ma didina mi hle ini atchugula salana amul mana ki Saul azi kandjavamu.
9David mi hulong de mi Rekap azi ki wiyema Bäna Rimon ma Bërot-na groma ala: Ma didina ni Ma bei matna, ni ma pad’an ndei kur ndaka lara ge petna. 10Sama mba mi dan fata ala: Gola! Saul mi mit wa na, mi djib’er ala mam dan ni zla d’a djivid’a. An vum ni tchum sä avo Siklak á wuragam yam zla d’a djivi ndata! 11Le agi suma tchona tchagi sama d’ingêrâ avo hatam kur yi mam ma burâ ni, an mba djobom mad’am atagiya, ni tchagi woi yam andagad’a d’uo zu?
12David mi he vuna mi azigar mama ala a tchaziya. A ngad’azi abozi kasezi woyo, a b’alazi akulo avun apo d’a Hebron-nda. A hle yam Isebäl, a tozot kur zula hi Apner-ra avo Hebron.
Currently Selected:
2 Samuel 4: BA
Highlight
Copy
Compare
Share
Want to have your highlights saved across all your devices? Sign up or sign in
Azumeina Bible © Alliance Biblique du Tchad, 1999.
