2 Samuel 12
12
Natan de mi David yam ngopa hAlonid’a
1Ma didina mi sun Natan gen David. Natan mi mba gen David, mi dum ala: Suma mbà azi ni kur azì ma ngol ma tuna, tu ni ma ndjondjoîna, tu ni ma houd’a mi. 2Ma ndjondjoîna mi nga ki d’uwar ma nglona ki ma gureina ablaud’a. 3Ma houd’a mi nga ki va d’i, mi guzï ahu d’a gora hina tu, mi hat tena. Nga d’i wul avo hatam ki groma, ti nga d’i tavu ma mam tuma, nga d’i tche mbina kur kop mama, ti burî akulo kurumu. Ndat mbut ni d’igi goromba na. 4Wani akoina mi mba avo hi ma ndjondjoîna, mi ar d’uwar mam ma gureina ki ma nglona woi ta á lakoi ma mi mba avo hatama, mi vahu d’a tud’a hi ma houd’id’a, mi ngad’at kä á lakoi mama.
5David hurum zal ngola yam sa máma, mi de mi Natan ala: Avok Ma didin ma bei matna, sa máma mi ndak á tchid’a! 6Sa máma mi wurak aho’â fid’i yam ahu d’a tu ndata, yam sun nda mi lat bei djib’era ba d’a!
7Ata yi máma Natan mi de mi David ala: Sama lahle ndazina ni angû! Ma didina Alona hi Israel-lâ mi dala: Ni an ba ni manang tining amula yam Israel-lâ; ni an ba ni sud’ung ngei abo Saul. 8An hang suma avo hi salangîna, an hang aropma hi salangîna ad’ungû, an hang Israel-lâ ki suma Juda-na mi. Le ni akid’eid’a ni, an ndak á hang kam kua! 9Ni kayam me ba, ang gol zlad’a hi an Ma didinid’a is ba, ang lahle suma tchona avoron nge? Ang ar suma Amon-na a tchi Uri ma Het-na avun ayîna, ang vamamba, ang gat ad’ung atchad’a. 10Ki tchetchemba, a mba tchi sum mangâ avun ayîna hina baba, kayam ang golon is, kayamba ang vatchad’a hi Uri ma Het-na, ang gat ad’ung atchad’id’a. 11An nga ni dangû, an mba ni mba ki zla d’a tchod’a avo hatangû, an mba ni yo amiyôngâ irang kä na, mba ni hazi mi ndrang ma gevengâ, mba mi bur ki sed’ezi falei d’ad’ar! 12Ang le manga ni gumunu; an mba ni le manda ni falei woi ir Israel-lâ pet!
13David mi de mi Natan ala: An le tchod’a avok Ma didina!
Natan mi de mi David ala: Ma didina nga mi vat hurum mbei yam tcho manga, ang mba mit ti. 14Wani kayamba ang le tchod’a ang he lovota mi suma djangûna hi Ma didina á lazam ba, gor ma Batseba ti vud’ungzina mba mi mit teyo.
Batseba gorotna mi mid’a
15Bugola, Natan mi hulong avo hatamu. Ma didina mi tum gor ma atchad’a hi Uri-d’a ti vud’um mi David-na; mi ve tugud’eid’a. 16David mi tchen Alona yam gor máma, mi d’el tam bei te tena. Ata yima mi kal klavina, mi burî kä andaga. 17Suma nglo suma avo hatama a mba gevemu, a dum ala mi tchol mi bur akulo kö, wani mi min ndi, mi min te tena ki sed’ezi d’uo mi. 18Wani gorâ mi le burâ kid’iziya, mi mid’a. Azungeîna hi David-na a le mandarâ á dum yam mad’a gorâ, kayam azi dala: Ata yima gorâ nga ki iram tua na, ei dum zlad’a, mam nga mi humi d’i. Ni nana ba, ei mba vei tei ad’enga á dum zlad’a yam mad’a gorâ ge? Mam mba mi b’lak tamu!
19David mi we azungeî mama a nga kud’us tazi kä lalam, mam wala gorâ mi mit wa. Mi dazi ala: Gorâ mi mit tchu?
Azi hulong dum ala: Mi mit wa!
20Ata yi máma David mi tchol akulo, mi mbus tam mbeyo, mi le mbulâ atamu, mi tchuk baru d’a dinga atamu, mi i kur gong nga kud’ora hi Ma didinid’a, mi grif kä á kud’or Ma didina, bugola mi i avo hatamu, mi dazi ala a humï tena, mam të.
21Azungeî mama a dum ala: Ad’u zla d’a ang lat ndata nana ge? Kid’a gorâ nga ki iramba, ang d’el tang bei te tena, ang tchi mi. Ki tchetchemba, gorâ mi mid’a; ang tchola akulo, ang nga te tena!
22Mi hulong dazi ala: Kid’a gorâ nga ki iram tua d’a, an d’el tan bei te tena, an tchi mi, kayam an djib’er ala: Ni nge ba, mi we ge? Dam Alona mba mi wan hohowon mba mi tcholom akulo kla ge? 23Ki tchetchemba, mi mit wa da’. Ni kayam me ba, an d’el tan bei te tena d’ei ge? An ndak á hulongômî zu? Ni an ba, mba ni iza ad’umu, wani mam nga mi hulongî geven ndi.
24David mi b’leng hur amamba Batseba, mi kal geved’u, mi bur ki sed’ed’u. Ti vut gor mandjufâ, ti yum ala Salomon. Ma didina hurum vum heî, 25mi sun ma djogom vunama Natan gen David ala: Ami yum ala Jedidiya. (Nala, Ma didina nga mi le kamu.)
(c) DAVID MI FE NDAKA KI KID’EÎ IRA
(2.26—20.25)
David azi ki Jowap a hlazì ma ngol ma Raba-na
(Gol 1 Sun hAm 20.1-3)
26Jowap mi nde dur azì ma Raba ma Amon-na, mi hlazì ma ngol ma amula. 27Mi sun suma gen David, mi dum ala: An dur wa azì ma ngol ma Raba-na, an hle wa azì ma mbiyo ma tched’a nga kuana. 28Ki tchetchemba, ang tok Israel suma a arâ, ang vanguvora avun azì ma ngolâ, ang hlumu, ar an tan ni hlum hle ba, simiyên mi yï d’i.
29David mi tok suma pet, mi i ata azì ma ngol ma Raba-na, mi durum mi hlumu. 30Mi hleï avaval la yam amul ma kur azì ma ngol mamina#12.30 avaval la yam amul ma kur azì ma ngol mamina: Ki vun Gre’â ala: avaval la yam alo ma suma Amon-na ma a yum ala Milkom nid’a., aneget kal kilona dok hindi, ti nga kahina d’a guzut kal teglesa atat mi, a kulubut yam David. David mi hurumï ahle suma kur azì ma ngolîna ngola. 31David mi yo suma kur azinina, mi tinizi ata sun nda ngat aguna ki sïnid’a á wak ahinad’a ki djiga ma kaweina, á ka aguna kandjet ma kaweina, á tchi derengelâ mi. Mi le suma kur azì ma nglo ma Amon-na pet ni na mi. Bugola, mi hulong Jerusalem ki azigar mama pet.
Currently Selected:
2 Samuel 12: BA
Highlight
Copy
Compare
Share
Want to have your highlights saved across all your devices? Sign up or sign in
Azumeina Bible © Alliance Biblique du Tchad, 1999.
