2 Samuel 10
10
Hanun mi mbut suma sunda hi David-na zulona
(Gol 1 Sun hAm 19.1-5)
1Bugol ahle ndazina, amul ma Amon-na mi mid’a; goroma Hanun mi vrak tamula blangâmu. 2David mi dala: An mba ni le djivid’a ki Hanun Nahas goroma d’igi abum mi lan djivid’a na mi. David mi sun azungeî mama á b’lengêm hurum yam matna habuma.
Kid’a azungeîna hi David-na a mbaza yam ambas sa Amon-ndid’a, 3suma nglo suma Amon-na a de mi salazina Hanun ala: Ang djib’er ala ná subur abung ba, David mi sunungî suma á b’lengêng hurung wan d’ang zu? Ná we fet azì ma ngolâ á b’lagam mbei ba, mam sunï azungeî mama geveng wan nduo zu?
4Ata yi máma Hanun mi yo azungeîna hi David-na, mi welezi dudumazi woi abo tutu, mi ngad’azi baru mazina woi avun ad’uzi djudjum. Bugola, mi yagazi akulo. 5A mba de zla ndata mi David. David mi sun suma á d’uguloziya, kayam sum ndazina amang ngei heî. Amulâ mi dazi ala: Agi kagagi sä Jeriko gak dudumagi se tua ba, agi mbagï avo.
David mi dur ayîna ki Amon-na ki Siri-na
(Gol 1 Sun hAm 19.6-19)
6Suma Amon-na a we d’ala azi mbut tchod’a avok David’u d’a, a yo azigar suma asemba aduk suma Siri suma avo Bet-Rehop-ma ki suma Siri suma avo Soba-na 20.000, a yo suma avo hamul ma Mäka-na 1000, a yo suma avo Top-ma 12.000, a wurak beged’a kaziya.
7David mi huma, mi sun Jowap azi ki azigar suma gangrangâ pet atazi á durâ. 8Suma Amon-na a buzuk kei a ndjar avun azina. Suma Siri suma Soba-na ki suma Rehop-ma ki suma Top-ma ki suma Mäka-na, a ndjar sä woi abagei kel vazi mi. 9Kid’a Jowap mi we d’ala ayîna mba mi dur ini navogom ki blogom mi d’a, mi man Israel suma a we durîna, mi ndjarazi ir suma Siri-na. 10Suma a arâ mi hazi abo wiyema Abisai, mi ndjarazi ir suma Amon-na. 11Mi dum ala: Le suma Siri-na ad’enga kal kanu ni, ang mbeï ndjununu; le suma Amon-na ad’enga kal kangû ni, an iza ni ndjunung mi. 12Ang ve tang ad’enga, ei soi tei ad’enga yam sum meina, yam azì mei ma nglona hAlo meinina. Ar Ma didina mi le vama hurum vuma!
13Jowap ki azigar mama a i avok á dur suma Siri-na; suma Siri-na a wet ringâ avoromu. 14Kid’a suma Amon-na a we suma Siri-na a wet ringâ hina d’a, a wet ringâ avok Abisai mi, a tchuk avo hataziya. Kid’a Jowap mi durï suma Amon-na dura, mi hulongî Jerusalem.
15Kid’a suma Siri-na a wala Israel-lâ a kus wa kaziya d’a, a tok azigar mazina tu. 16Hadadezer mi sun suma á yoï suma Siri suma sä abo alum ma Efrat-na woi hina, azi mba Helam; Sobak ma ngolâ hi azigarâ hi Hadadezer-râ, mi nga avoroziya. 17Suma a mba de zla ndata mi David. David mi tok Israel-lâ pet, a djak alum ma Jurdê-na, a mba Helam. Suma Siri-na a ndjar avok David, a nde durumu, 18wani a wet ringâ abo Israel-lâ. David mi tchi azigar mazi suma a nga ki pus ma dur ayînina kikis kid’iziya, mi tchi suma djang akulumeina 40.000, mi ge Sobak ma ngolâ hi azigar mazinina mbilâ; mi mit ata yi máma wat.
19Kid’a amulei suma ad’u Hadadezer-râ a we d’ala Israel-lâ a kus kaziya d’a, a ve banad’a ki Israel-lâ, a ge yazi kä ad’uziya. Suma Siri-na a ar bei ndjun suma Amon-na.
Currently Selected:
2 Samuel 10: BA
Highlight
Copy
Compare
Share
Want to have your highlights saved across all your devices? Sign up or sign in
Azumeina Bible © Alliance Biblique du Tchad, 1999.
