2 Amuleina 8
8
Dabid’a hi zlad’a hatcha d’a Sunem-mba
1Bur tu Elise mi de matcha d’a mam zlid’it gorotna akulo ata yima matnid’a ala: Ndak tchol ki suma avo hata’â, agi i kagagi ata yima ndak iragi á kakina, kayam Ma didina nga mi mba ki baktarad’a yam andaga d’a Israel-lâ, baktara ndata mba d’i le ni bizad’a kid’iziya mi.
2Atcha ndata ti le d’igi sana hAlonina mi dat na, ti i ki sum matna atogo zak, ti kak sä yam andaga d’a Filistê-d’a bizad’a kid’iziya. 3Kur dabid’a hi biza d’a kid’iziya ndatid’a ti tcholï yam ambas sa Filistê-d’a ki sum matna, ti mba avo hamulâ á djobom yam aziyat kasine matna.
4Ata yi máma amulâ nga mi de zlad’a ki Gehazi azongâ hi Elise-na, nga mi djobom ala mi vum ad’u ahlena pet suma ndandal suma ma djok vuna Elise mi lazina. 5Ata yima Gehazi nga mi väd’u zlad’a hi gor ma Elise mi zlid’im akulo ata yima matnina, gol wani, gor máma asum mbi mba, ti nde d’i tchen amulâ yam aziyat kasine matna. Ata yi máma Gehazi mi de mamulâ ala: Salana, ang gol atchad’a ki gorot ma Elise zlid’im akulo ata yima matnina wana!
6Ata yi máma amulâ mi djop atchad’a. Ti vum ad’u ahlena pet. Ata yi máma na wat, amulâ mi he vuna mi sa mama ala: Ang i katcha ndata. An min ala a hulongôt ahle matna pet kawu ma azi tinim zuma kur asinet kur biza d’a ndat ti mbera dei gak inina pet mi.
Elise azi ki Hazayel
7Bur tu Elise mi i Damas, wani Ben-Hadat amul ma Siri-na mi nga tugud’eid’a. Mi hum ala: Sana hAlonina mi mba nga ka hî.
8Amulâ Ben-Hadat mi de mi Hazayel ala: Ang ve he d’a hawad’a, ang i fe sana hAlonina Elise, ang dum ala mi djop Ma didina, na ni an mba ni tchol akulo kur tugud’ei man ndata ko zu?
9Hazayel mi i ki he d’a hawa d’a djivi d’a kal tegles sa yam ambas sa Damas-sid’a ndak ir aneka hi djambala d’a zid’a dok fid’i á hat mi Elise. Kid’a mi mbaza avok ma djok vuna Elise-d’a, mi dum ala: Gorongâ Ben-Hadat mi sununï ni mam ala an djobongû, na ni mam mba mi tchol akulo kur tugud’ei mam ndata ko zi ge?
10Elise mi hulong dum ala: Ang i dum ala gagazi, mam mba mi tchol akulo. Hina pet pî, Ma didina mi tagan ala mba mi mit gagazi! 11Ata yi máma na wat, sana hAlonina mi so iram iram gola baba, mi nde tchina.
12Hazayel mi dum ala: Salana, ang tchi ni kayam me ge?
Elise mi hulong dum ala: An tchi ni kayam an we tcho d’a ang mba lat mi Israel-lîd’a. Ang mba ngalazi aziyazi ma ad’eng ma ngunguna woyo, ang mba tchi azungeî mazina woi avun ayîna, ang mba miret gugurei suma gurei mazina kä kasengû, ang mba b’as hur arop mazi suma wirâ woi mi!
13Wani Hazayel mi dum ala: Salana, an ma ndak va d’uo koko wana, an ndak á lahle suma tchotcho ndazina ni nana ge?
Wani Elise mi dum ala: Ma didina mi tagan ala ang mba mbut amul ma Siri-na.
14Hazayel mi wal ki Elise, mi hulong gen salama. Salama mi djobom ala: Elise mi dangâ na ge?
Hazayel mi hulong dum ala: Mi dan ala gagazi, ang mba tchol akulo.
15Wani tcha ndjivinda Hazayel mi yo borogona, mi tchugum aduk mbina, mi baram ir amulâ. Bugola, amulâ mi mid’a, Hazayel mi vrak tamula blangâmu.
(b) AMULEI SUMA JUDA-NA KAMULEI SUMA ISRAEL-LÂ
(8.16—17.4)
Joram mi tamula yam Juda-na
(Gol 2 Sun hAm 21.2-20)
16Kur biza d’a vahl hla Joram Ahap gorom ma amul ma Israel-lâ nga mi tamulid’a, Joram Josafat goroma mi kak amula yam suma Juda-na mi. 17Kid’a mi kak amulid’a, bizamî dok hindi yam mbà. Mi tamula avo Jerusalem bizad’a klavandi. 18Mi le sun nda tchod’a d’igi amulei suma Israel-lâ na, d’igi suma hi Ahap-ma na mi, kayam mi ve Ahap goromba atchad’a, mi le sun nda tchod’a avok Ma didina mi.
19Wani Ma didina mi min b’lak leu d’a Juda-d’a woi d’i, kayam mam hle vunam mazong mama David ala mam mba mi ar ad’u andjavam á tamula blangâm gak didin.
20Kur atchogoi mamba suma Edom-ma a tchol huneîd’a ki suma Juda-na, a min ala suma Juda-na a te kazi d’i, a tin amula yam taziya. 21Joram mi i Sayir ki pus mam ma dur ayîna pet. Kandjege dangâla mi tcho aduk suma Edom suma a nguyuma zlapa ki nglo suma yam pus mam ma dur ayînina. Wani azigar suma Juda-na a ring avo hataziya. 22Suma Edom-ma a kak djangûna ki suma te yam suma Juda-na kur atchogoi ndata gak ini. Suma Libina-na a tchol huneîd’a ki sed’em kur atchogoi ndata mi.
23Sunda hi Joram mba ara kahle suma mi lazina pet a b’irizi nga kä kur Mbaktum mba de zlad’a yam Sunda hAmulei suma Juda-nid’a. 24Joram mi mit mi i azulei kä ad’u abuyom ngolo. A tozom kur Azì ma ngolâ hi David-na. Goroma Ahaziya mi vrak tamula blangâmu.
Ahaziya mi tamula yam Juda-na
(Gol 2 Sun hAm 22.1-6)
25Kur biza d’a dogo yam mbà d’a Joram Ahap goroma amul ma Israel-lâ nga mi tamulid’a, Ahaziya Joram goroma mi kak amula yam suma Juda-na mi. 26Kid’a mi kak amulid’a, bizamî dok mbà yam mbà, mi tamula avo Jerusalem bizad’a tu. Asum a yat ala Atali Omri amul ma Israel-lâ goromba.
27Ahaziya mi tit kur lovot ta tchod’a d’igi suma hi Ahap-ma na. Mi le sun nda tchod’a avok Ma didina d’igi andjafâ hi Ahap-ma na, kayam mi ve Ahap goromba atchad’a.
28Mi i ki Joram Ahap goroma á dur ayîna ki Hazayel amul ma Siri-na kur azì ma Ramot ma Galät-na. Kur ayî máma suma Siri-na a ge Joram mbilâ. 29Mi hulong avo Jisreyel á tchil mbilim ma suma Siri-na a gumzi avo Rama ata yima dur ayîna ki Hazayel amul ma Siri-nina. Ata yi máma Ahaziya Joram gorom ma amul ma Juda-na, mi i á d’u Joram Ahap goroma avo Jisreyel, kayam mam nga tugud’eid’a ngola heî.
Currently Selected:
2 Amuleina 8: BA
Highlight
Copy
Compare
Share
Want to have your highlights saved across all your devices? Sign up or sign in
Azumeina Bible © Alliance Biblique du Tchad, 1999.
