2 Amuleina 20
20
Ezekiyas mi sut tei kur tugud’ei mamba
(Gol Is 38.1-8; 2 Sun hAm 32.24)
1Kur atchogoi ndata Ezekiyas mi ve tugud’eid’a á matna. Ma djok vun Alona Isai Amot goroma mi mba gevemu, mi dum ala: Ezekiyas, Ma didina mi ala: Ki tchetchemba, ang de vunang mi sum mangâ, kayam ang mit ni mid’a, ang nga tchol akulo d’uo d’a.
2Ata yi máma Ezekiyas mi mbut iram sä gumun gonga, mi tchen Ma didina ala: 3Ma didina, ang djib’er yam tit ta an nga ni tit avorong memet ki hur ma tuna burâ ki burîd’a; an nga ni le sun nda djivid’a avorong burâ ki burâ mi. Ezekiyas mi tchi ngola.
4Wani kid’a Isai mi nga bei mi ndei woi hur azina hamulîna tua d’a, Ma didina mi dum ala: 5Ang hulong gen Ezekiyas amulâ hi sum manina, ang dum ala: Ma didina Alona habung ngolo David-na mi dala: An hum tchen manga, an we simi mangâ mi. Gola! An nga ni tcholong akulo. Kur bur ma hindina ang mba fad’enga á i kur gong man nda kud’ora. 6An nga ni hang bizad’a kua dogo yam vahl. Kal pet, an mba ni sud’ung ngei ki suma kur azì ma ngol ma Jerusalem-ma abo amul ma Asiri-na, an mba ni ngom azì ma ngol máma yam subur manda, yam d’engzenga hazong mana David-ta mi.
7Isai mi de mi suma gevema ala: Agi hlagi mbuka hi vut tulumid’a. Azi hlad’u, a tinimzi ata yam ma hopma kayam mi tchol akulo.
8Ata yi máma Ezekiyas mi djop Isai ala: Ni simata me ba, an mba mi wala Ma didina mi sud’un wa, kur bur ma hindina an mba ni i kur gong mamba ge?
9Isai mi dum ala: Ma didina mba mi hang vama simata á we ki ala mam nga mi ndak vun vama mam hle vunam kama. Ang min ala: Anguzuna mi i avok yam vama djak akulo ma abung Ahas mi minima asem ma tita dogo, d’oze mi didak bugol ir asem ma tita dogo zu?
10Ezekiyas mi hulong dum ala: Nga ad’enga á anguzuna mi i avok asem ma tita dogo d’a d’i! An min mi didak bugol ir asem ma tita dogo!
11Ata yi máma Isai ma djok vun Alona mi tchen Ma didina; Ma didina mi hulong anguzuna bugol yam yima djak akulona asem ma tita dogo.
Ezekiyas mi ve suma sunda hamul ma Babilon-nina atamu
(Gol Is 39.1-8)
12Kur atchogoi ndata amul ma Babilon-na Berodak-Baladan Baladan goroma, mi hum ala Ezekiyas mi ve tugud’eid’a. Kayam ndata, mi sunumï mam suma sunda ki mbaktumba ki he d’a hawad’a abozi mi. 13Ezekiyas mi vazi atamu, mi tagazi aziyam ma mam nga mi ngom ahle mam suma guzuzi kal teglesâ kuana pet, nala, kawei ma hapma, lora, mbul ma his ma afufuîna ki mbul ma guzum kal teglesâ. Mi tagazi yima ahle mam suma dur ayîna a nga kuana kahlena pet suma a nga ata yi mam ma ngom ahlenina. Vama Ezekiyas arazizi bei taka ma kur aziyam ma amulina, d’oze ma kur leu mambina nga d’i.
14Bugola, Isai ma djok vun Alona mi mba gen amulâ Ezekiyas, mi dum ala: Sum ndazina a dangâ na ge? A tcholï ni lara ge?
Ezekiyas mi hulong dum ala: Azi tcholï ni yam andaga d’a Babilon-nda dei.
15Isai mi dum kua ala: Azi golî me avo hatang nge?
Ezekiyas mi hulong dum ala: A wahle suma avo hatana pet. Vama ata yan ma ngom ahlena ma bei an tagazizina nga d’i!
16Ata yi máma Isai mi dum ala: Ang hum zla d’a Ma didina mi data. 17Mi dala: Bur tu ahle suma a nga kur aziyang ma amulina pet kahlena pet suma abuyong ngolo a togozi gak inina, a mba yozi izi Babilon pepet. Va mba ar ka hî d’i. 18Azi mba yo grong suma kurung suma ding suma ang mba vud’uzina, a mba mbud’uzi suma ngom aropma hur azina hamul ma Babilon-nina.
19Ezekiyas mi hulong de mi Isai ala: Zlad’a hi Ma didina d’a ang dandji wanda ni zla d’a djivid’a. Nala, an mba kak ki halasa ki djivid’a ata yima an nga ki iran tua na hina d’uo zu?
20Sunda hi Ezekiyas sa ara kad’eng mam mba dur ayîna ki min nda mam min yima ve mbina ki djugot ta mi djugot ir yima djang mbina ei avo Jerusalem-mba mi, a b’irizi nga kä kur Mbaktum mba de zlad’a yam Sunda hAmulei suma Juda-nid’a.
21Ezekiyas mi mit mi i azulei kä ad’u abuyom ngolo. Goroma Manase mi vrak tamula blangâmu.
Currently Selected:
2 Amuleina 20: BA
Highlight
Copy
Compare
Share
Want to have your highlights saved across all your devices? Sign up or sign in
Azumeina Bible © Alliance Biblique du Tchad, 1999.
