2 Sunda Hamuleinid’a 22
22
Amul la ted’a hi Ahaziya-d’a
(Gol 2 Amul 8.25-29; 9.27-29)
1Suma Jerusalem-ma a tin Ahaziya Joram gorom ma gorâ amula balum abumu, kayam ades azigar suma Arap-ma a mbeï kur kangâ, a tchi grom suma nglona woi pet. Ni hina ba, Ahaziya Joram goroma mi kak amula yam suma Juda-na. 2Kid’a mi kak amulid’a, bizamî dok mbà yam mbà, mi tamula avo Jerusalem bizad’a tu. Asum a yat ala Atali ni Omri goromba. 3Mi tit kur lovot ta tchod’a d’igi suma hi Ahap-ma na, kayam asum ti dum d’al ma tchona. 4Mi le sun nda tchod’a avok Ma didina d’igi suma hi Ahap-ma na, kayam bugol matna habuma, a dumî d’al ma bam mbeina. 5Mi tit yam d’al mazina, mi i ki Joram Ahap amul ma Israel-lâ goroma á dur ayîna ki Hazayel amul ma Siri-na kur azì ma Ramot ma kur ambas sa Galät-tina. Kur ayî máma suma Siri-na a ge Joram mbilâ. 6Mi hulong avo Jisreyel á tchil mbilim ma suma Siri-na a gumzi avo Rama ata yima dur ayîna ki Hazayel amul ma Siri-nina. Ata yi máma Azariya, nala, Ahaziya Joram goroma amul ma Juda-na, mi i á d’u Joram Ahap goroma avo Jisreyel, kayam mam nga tugud’eid’a ngola heî.
7Kur minda hAlonid’a mi zut Ahaziya mi i á d’u Joram á bam mbeyo. Ata yima mi mbazina, a i ki Joram á ngaf ki Jehu Nimsi gorom ma Alona mi tinim iram vam á dap suma hi Ahap-ma woina. 8Ata yima Jehu nga mi ka sariyad’a yam suma hi Ahap-mina, mi fe suma nglo suma Juda-na ki Ahaziya b’oziyoma grozi suma a nga le sunda hi Ahaziya-d’ina, mi tchazi woyo. 9Mi tin ad’um á hal Ahaziya. A vumî Samari ata yima mi i ngei kuana, a mbam mi Jehu, a tchumu, a tozom mi. Kayam a dala: Ni Josafat ma mi hal Ma didina ki hur ma tunina goroma. Sama hi Ahaziya ma ar á tamulina nga d’uo d’a.
Atali ti hlad’enga
(Gol 2 Amul 11.1-3)
10Ata yima Atali Ahaziya asum ti hum ala gorotna mi mit wa na, ti tchola, ti tchi andjaf ma amul ma Juda-na woi pet. 11Wani ata yima a nga tchazina, Joseba namulâ Joram goromba ti ve Jowas Ahaziya goroma gumun ngeid’a aduk amulâ groma, ti hum abo atcha d’a wuluta kur gong nga burâ. Ni hina ba, Joseba Ahaziya wiyemba Joram goromba, atchad’a hi ma ngat buzuna Jehojada-d’a, ti sut Jowas sei bei Atali ti tchumu.
12Jowas mi ar kaka ki sed’ezi kur gong nga kud’ora hAlonid’a ngeid’a gak bizad’a karagaya. Wani Atali nga d’i tamula yam ambasa.
Currently Selected:
2 Sunda Hamuleinid’a 22: BA
Highlight
Copy
Compare
Share
Want to have your highlights saved across all your devices? Sign up or sign in
Azumeina Bible © Alliance Biblique du Tchad, 1999.
