2 Sunda Hamuleinid’a 19
19
Josafat mi tin suma ka sariyad’a kur Juda
1Josafat amul ma Juda-na mi hulong avo hatam Jerusalem ki halasa. 2Jehu Hanani ma djok vuna goroma mi ndeï á d’ugulomu, mi dum ala: Ni kayam me ba, ang ndjun sama asa’atna ge? Na ni ang le yam vama Ma didina mi noyôm mbeina zu? Ni kayam ndata ba, Ma didina hurum zal kang wana. 3Wani mi fahle suma djivina atangû, kayam ang pleî agu ma murguli ma a pum malo d’a a yat ala Asera-d’a woi kur ambas manga. Ang tin hurung á halam mi.
4Josafat mi kak avo Jerusalem. Bugola, mi nde nguid’a aduk sum mama, mi tinï ad’ud’a Berseba dei gak mba yam ahina d’a Efraim-mba, mi hulongôzï mi Ma didina Alona habuyozi ngolona. 5Mi tin suma ka sariyad’a kur azì ma nglo ma ad’eng ma ngungu ma lara ge ma kur ambas sa Juda-d’ina pet. 6Mi dazi ala: Agi gologi tagi kahle suma agi mba lazina, kayam agi mba kagi ni sariyad’a hi sumid’a d’i, wani agi mba kagi ni sariyad’a hi Ma didinid’a, kayam mam tamba mba mi kak ki sed’egi ata yima agi mba kagi sariyad’ina. 7Kayam ndata, agi lagi mandara Ma didina, agi gologi tagi djivi ata yima agi mba kagi sariyad’ina, kayam mbut ira nga ata Ma didina Alo meina d’oze nga mi man sa yam ngol mamba d’oze nga mi ve bege d’a mbut ira abo sa d’uo mi.
8Kid’a a hulongî avo Jerusalem-mba, Josafat mi tin suma hi Levi-na ki suma ngat buzuna ki suma nglo suma avok andjafâ hi Israel-lâ suma avo Jerusalem-ma á ka sariyad’a hi Ma didinid’a, á min zlad’a aduk suma mi. 9Mi hazi vuna ala: Agi lagi ni mandara Ma didina ki d’engzenga ki hur ma tuna bei mbàmbàd’a ba. 10Kur sariya d’a lara d’a b’oziyogi suma a nga kaka kur azì mazi ma nglona a mba mbagizid’a, le ni d’a hi mat ma tchid’a, d’oze d’a hi gatid’a, d’oze d’a hi vun ma hed’a, agi gazi humaziya, kayambala zlad’a kak kazi avok Ma didina ba, hurum mi zal kagi ki b’oziyogina d’uo d’a. Agi lagi ni hina, ar zlad’a kak kagi avok Ma didina d’i. 11Gola! Ma ngol ma ngat buzuna Amariya ni ma ngol ma kagi yam ahlena hi Ma didina petna. Zebadiya Ismael gorom ma te yamba kur azì ma Juda-na ni ma yam ahlena hamulâ petna, suma hi Levi-na ni magi suma nglo suma ka sariyad’a. Agi kagagi ngingring, kagi sariya d’a d’ingêra! Ar Ma didina mi kak ki sama mba mi le djivid’ina!
Currently Selected:
2 Sunda Hamuleinid’a 19: BA
Highlight
Copy
Compare
Share
Want to have your highlights saved across all your devices? Sign up or sign in
Azumeina Bible © Alliance Biblique du Tchad, 1999.
