2 Sunda Hamuleinid’a 12
12
Sisak amul ma Ezipte-na mi hlazì ma nglo ma Juda-na
(Gol 1 Amul 14.25-28)
1Ata yima Robowam leu mamba fad’enga mam tamba mi sira ngingi mi na, mi ar gata hi Ma didinid’a woyo. Israel-lâ pî a ar gata hi Ma didinid’a woi ki sed’em mi. 2Kur biza d’a vahl hla Robowam nga mi tamulid’a, Sisak amul ma Ezipte-na mi mba mi dur suma Jerusalem-ma, kayam azi le tchod’a avok Ma didina. 3Sisak mi mba ki pus ma dur ayîna 1200, suma djang akulumeina 60.000 ki azigarâ suma Libi-na ki suma Su’â ki suma Etiyopi-na suma ablawazi ndak nga a ndumba d’uo na. Ni suma a tcholï Ezipte ki sed’ema. 4Mi hlazì ma nglo ma ad’eng ma ngungu ma yam ambas sa Juda-d’ina, gak mi mba Jerusalem. 5Ata yi máma Semaya ma djok vun Alona mi i gen Robowam ki suma nglo suma Juda suma a nga toka Jerusalem abo Sisa’â, mi dazi ala: Gola! Ma didina mi dala: Agi aran ndeyo! An tan pî ni aragi woi mi! An hagiya wa abo Sisak!
6Nglo suma Israel-lâ kamulâ a hulong yazi kä, a dala: Ma didina ni Ma d’ingêrâ!
7Ata yima Ma didina mi we d’ala a hulong wa yazi kä d’a, mi hulong de mi Semaya ala: Sum ndazina a hulong wa yazi kä. Kayam ndata, an mba ni b’lagazi woi d’i, an mba ni le lovota á sut suma dingâ adigazi tcha, an mba ni i ki hur man ma zala gak ar Sisak mi b’lak Jerusalem mbei d’uo mi. 8Hina pet pî, a mba ge yazi kä ad’umu, a mba we sun nda a lat ki anda, ki sun nda a mba lat mamulei suma dingîd’a mi.
9Sisak amul ma Ezipte-na mi i dur suma Jerusalem-ma, mi yo ndjondjoî d’a kur gong nga kud’ora hi Ma didinid’id’a ki ndjondjoî d’a kur azina hamulîd’a pet, mi yo mboriyo suma lor suma Salomon mi yorozina pet mi. 10Wani amulâ Robowam mi yor mboriyo suma kawei ma hleuna, mi vragazi balumu, mi hazi abo azigar suma nglo suma a ngom vun agre’â hamulîna. 11Wani bur ma lara ma amulâ mi i kur gong nga kud’ora hi Ma didinid’ina, azigar suma ndjola a mba a yo mboriyo ndazina woyo. Bugola, a hulongôzi ata yazi ma ngomba.
12Kayam Robowam mi ge yam kä ad’umu, Ma didina hurum vat tei kamu, mi tchum nga woi gau d’i. Ahle suma djivina a nga yam ambas sa Juda-d’a tua.
Amul la te d’a dabid’a hi Robowam-mba
(Gol 1 Amul 14.21-24,29-31)
13Robowam mi fad’enga, mi tamula avo Jerusalem. Ata yima mi kak amulina, bizamî dok fid’i yam tu. Asum a yat ala Näma, ni d’a Amon-nda. Mi tamula avo Jerusalem bizad’a dogo yam kid’iziya. Nazì ma ngol ma Ma didina mi manam kur ambas sa Israel-la pet á kak aduk sum mama kuana. 14Robowam mi le tchod’a, kayam mi tin nga hurum á le minda hi Ma didinid’a d’i.
15Sunda hi Robowam mba avoka ki d’a dananda, a b’irit nga kä kur Mbaktumba hi Semaya ma djok vun Alonid’a ki D’a hi Ido ma nga mi wahle suma a nga mbanid’a. Kid’a Robowam mi nga ki iramba, nga mi dur ayîna ki Jerobowam teteu. 16Robowam mi mit mi i azulei kä ad’u abuyom ngolo, a tozom kur Azì ma ngolâ hi David-na. Goroma Abiya#12.16 Abiya: D’oze Abiyam. Gol 13.1, 1 Amul 14.31; 15.1. mi vrak tamula blangâmu.
Currently Selected:
2 Sunda Hamuleinid’a 12: BA
Highlight
Copy
Compare
Share
Want to have your highlights saved across all your devices? Sign up or sign in
Azumeina Bible © Alliance Biblique du Tchad, 1999.
